سەناتور بيبيگۇل جەكسەنباي پلاتفورمالىق جۇمىسپەن قامتۋدى قۇقىقتىق رەتتەۋ جانە تسيفرلىق سەرۆيستەر ارقىلى جۇمىس ىستەيتىن ازاماتتاردىڭ قۇقىقتارىن قورعاۋ ماسەلەلەرىن كوتەردى. دەپۋتات ءوز ساۋالىندا سوڭعى جىلدارى قازاقستاندا ونلاين-پلاتفورمالار ارقىلى, اسىرەسە جەتكىزۋ جانە جولاۋشىلار تاسىمالى سالاسىندا جۇمىسپەن قامتۋ قارقىندى دامىپ كەلە جاتقانىن اتاپ ءوتتى, دەپ حابارلايدى Egemen.kz.
ساراپشىلاردىڭ باعالاۋىنشا, 394 مىڭعا جۋىق ازامات تسيفرلىق سەرۆيستەر ارقىلى تابىس تاۋىپ وتىر, ال ينتەرنەت-پلاتفورمالاردى ورىنداۋشىلاردىڭ جالپى سانى كوبەيىپ كەلەدى.
ساۋالدا پلاتفورمالىق ورىنداۋشىلاردا نەگىزگى ەڭبەك كەپىلدىكتەرىنىڭ جوقتىعىنا, سونىڭ ىشىندە تابىستىڭ تۇراقسىزدىعىنا, ساقتاندىرۋدىڭ بولماۋىنا, داۋلاردى شەشۋدىڭ اشىق تەتىكتەرى مەن پلاتفورمالار تاراپىنان قابىلداناتىن بىرجاقتى شەشىمدەردەن قورعاۋدىڭ جوقتىعىنا ەرەكشە نازار اۋدارىلدى. وسىعان بايلانىستى, دەپۋتات اتاپ وتكەندەي, حالىقارالىق تاجىريبە بۇل سالانى جۇيەلى رەتتەۋگە كوشۋ قاجەتتىگىن كورسەتىپ وتىر.
قازاقستان تسيفرلىق قىزمەتتەر ەكسپورتىن كەڭەيتەدى
«تسيفرلىق جانە سالىقتىق ينفراقۇرىلىمدى رەتتەۋ بويىنشا مەملەكەتتىك جۇيەلەر مەن پلاتفورمالار اراسىنداعى ينتەگراتسيانى رەتكە كەلتىرىپ, اقپاراتتىق قاتەلىكتەردەن تۋىنداعان بارلىق نەگىزسىز بەرەشەكتەر مەن ءوسىمپۇلداردى اۆتوماتتى تۇردە جويۋ تەتىگىن ەنگىزۋدى قاراستىرۋ كەرەك. سالىقتىق جۇكتەمەنى جەڭىلدەتۋ ءۇشىن الەۋمەتتىك تولەمدەردى ەسەپتەۋ كەزىندە شىعىنداردى, ياعني جانارماي, كولىك جوندەۋدى شەگەرىپ تاستاۋ ادىستەمەسىن دە قاراستىرۋدى ويلاستىرۋ كەرەك. قۇقىقتىق مارتەبە جانە تاريفتىك كەپىلدىكتەر باعىتىندا پلاتفورمالىق جۇمىستىڭ ەرەكشەلىكتەرىن ەسكەرەتىن جەكە زاڭنامالىق اكت ازىرلەۋدى, وندا «تاۋەلسىز قىزمەتكەر» مارتەبەسىن بەكىتىپ, ەڭ تومەنگى ساعاتتىق تولەم ستاندارتتارىن ەنگىزۋدى قاراستىرۋ كەرەك. ورىنداۋشىلاردى جۇمىس كەزىندەگى جازاتايىم وقيعالاردان, جول-كولىك وقيعاسىنان, جاراقات جانە ت.ب. مىندەتتى ۇجىمدىق ساقتاندىرۋ پلاتفورمالارىمەن بىرلەسە جولدارىن قاراستىرۋ كەرەك. پلاتفورمالاردى تاپسىرىس ءبولۋ پرينتسيپتەرىن اشۋعا جانە اككاۋنتتاردى بۇعاتتاۋ شەشىمدەرىن ادامنىڭ قاتىسۋىمەن قايتا قاراۋعا مۇمكىندىكتەردى قاراستىرۋ كەرەك», دەپ اتاپ ءوتتى سەناتور.
ءسوزىنىڭ سوڭىندا سەناتور بۇل سالادا جۇيەلى زاڭنامالىق شارالاردى ازىرلەۋ ەڭبەك نارىعىنىڭ اشىقتىعىن ارتتىرۋعا, ازاماتتاردىڭ قۇقىقتارىن قورعاۋدى قامتاماسىز ەتۋگە جانە ەلدەگى پلاتفورمالىق ەكونوميكانىڭ تۇراقتى دامۋىنا جاعداي جاساۋعا مۇمكىندىك بەرەتىنىن باسا ايتتى.