بالۋاندارىمىز بىشكەكتەگى ازيا چەمپيوناتىندا جەتى جۇلدە الدى

الماتبەك التىن الدى

بىلتىرعى ازيا چەمپيوناتىندا قازاقستاننىڭ گرەك-ريم كۇرەسى شەبەرلەرىنىڭ قورجىنىنا التىن مەدال تۇسپەگەن ەدى. امماندا قوس كۇمىس پەن قوس قولانى قاناعات تۇتتىق. بۇل كورسەتكىشكە قازاق جانكۇيەرلەرىنىڭ كوڭىلى تولمادى. ويتكەنى, گرەك-ريم كۇرەسىندە جەڭىسپەن ورىلگەن باي ءداستۇرىمىز بار. ءدال وسى سپورت ءتۇرىن سەرىك ەتكەن بالۋاندارىمىز كەزىندە تولاعاي تابىستارعا قول جەتكىزىپ, سارى قۇرلىقتا ۇستەمدىك قۇردى.الەمدە دە پوزيتسيامىز جوعارى بولدى. سوندىقتان دا يوردانياداعى ساتسىزدىكتى «كەزدەيسوقتىق» دەپ قابىلدادىق.

الاتاۋدىڭ ارعى بەتىندەگى باسەكە بىزدەر ءۇشىن كوڭىلسىزدەۋ باستالدى. العاشقى كۇنى بوزكىلەمدە بەلدەسكەن بەس بالۋاننىڭ بىردە-بىرەۋى فينالعا شىعا المادى. تۇساۋكەسەر كەزدەسۋلەرىندە يراندىق موحامماد پاناحاسانيدەن ۇتىلعان نۇرزات قابدارقىموۆ (55 كگ) پەن جاپونيالىق يۋتا نارادان جەڭىلگەن جوھار ۇزاروۆ (130 كگ) بىردەن كورەرمەندەر قاتارىنا قوسىلدى. جەرەبە سايفوللا قۇرماندى (63 كگ) تۇركىمەنستاندىق ازاتجان اچيلوۆپەن جولىقتىرعاندا قانداسىمىزدىڭ ايقىن جەڭىسكە قول جەتكىزەتىنىنە ەش كۇمان بولمادى. بىراق قاتەلەسكەن ەكەنبىز. بىشكەكتە ازاتجان سايفوللاعا سان سوقتىردى. شىنى كەرەك, سول ساتكە دەيىن قازاقستاننىڭ گرەك-ريم كۇرەسى مەكتەبىنىڭ تۇلەگى تۇركىمەنستاننىڭ وكىلىنەن ۇتىلادى دەگەن وي ءۇش ۇيىقتاساق تا تۇسىمىزگە دە كىرمەگەن. ولارعا قاراعاندا قاھارمان قيسىمەتوۆتىڭ (77 كگ) تۇزى جەڭىل ەكەن. العاشقى اينالىمدا ول قىرعىزستاننىڭ ماقتانىشى اقجول ماحمۇدوۆتان ويسىراي ۇتىلعانىمەن, جۇلدەلى ورىن ءۇشىن تالاسۋ قۇقىعىن ساقتاپ قالدى. سەبەبى, اقجول فينالعا دەيىن جەتىپ, جەرلەسىمىزگە جول اشىلدى. بىراق قيسىمەتوۆ وزىنە بەرىلگەن مۇمكىندىكتى پايدالانا المادى. جۇبانىش بەلدەسۋدە جاپونيالىق يسامي نوريكيتانى ۇتقان ول ءۇشىنشى ورىن ءۇشىن باسەكەدە وزبەك دونيورحون ناكيبوۆتىڭ الدىندا شاراسىز كۇي كەشتى.

35 جاستاعى نۇرسۇلتان تۇرسىنوۆ (87 كگ) تۇساۋكەسەر كەزدەسۋىندە  وڭتۇستىك كورەيانىڭ وعىلانى سەۋنگحۆان ءليدى ەش قينالماي جىققانىمەن, جارتىلاي فينالدا 20 جاستاعى جەرگىلىكتى جاس دارىن اسان جانىشەۆتان وڭباي جەڭىلدى. قانداسىمىز قولا مەدال ءۇشىن باسەكەدە تۇركىمەنستاندىق داۆلەتمۇرات بايراموۆتى باس كوتەرتپەي ۇتىپ, جەڭىس تۇعىرىنا كوتەرىلدى.

كەلەسى كۇنى تاعى بەس سالماق دارەجەسىنىڭ جۇلدەلەرى ساراپقا سالىندى. سولاردىڭ اراسىنان فينالعا تەك الماتبەك امانبەك (72 كگ) شىقتى. قىتايلىق دونجۋ لي مەن قىرعىز امانتۇر يسمايىلوۆتى جولىنان ىعىستىرعان قانداسىمىز شەشۋشى تۇستا جاستار اراسىنداعى الەم چەمپيوناتىنىڭ ءفيناليسى, ازيا چەمپيونى, يراندىق موحامماد دجاۆاد رەزايمەن كۇش سىناستى. سىن ساعاتتا بورانبەك قوڭىراتوۆتىڭ شاكىرتى ءوزىن جاقسى قىرىنان كورسەتتى. قارسىلاسى العا ۇمتىلعان ساتتە قارىمتا شابۋىلعا جۇگىنگەن ول ونى جىعىپ الدى دا, استىندا تىرپ ەتكىزبەي ۇستادى. رەزاي جەڭىلگەنىن مويىندادى. الماتبەك – ازيا چەمپيونى!

جارتىلاي فينالدا جەڭىلىس تاۋىپ, باس جۇلدە ءۇشىن سايىسقا ءتۇسۋ مۇمكىندىگىنەن ايىرىلعان يبراگيم ماگومادوۆ (82 كگ) پەن يسلام ەۆلوەۆ (97 كگ) قولا مەدال ءۇشىن كۇرەستى. بۇل سىناقتان ولار مۇدىرمەي ءوتتى. يبراگيم اسا شيەلەنىستى باسەكەدە قىتايلىق رۋي ءليۋدى ەكى ۇپاي ايىرماشىلىعمەن ۇتسا,  يسلام وڭتۇستىكورەيالىق مينحۋ ءليدى 1 مينۋت 27 سەكۋندتا تاس-تالقانىن شىعاردى. ال يراندىق ءالي ابدوللاح احمادي ۆافاعا ءالى جەتپەگەن ەربول كاماليەۆ (60 كگ) بەسىنشى ورىندى قاناعات تۇتتى.

گرەك-ريم كۇرەسى جارىسىنىڭ جالپى كوماندالىق ەسەبىندە قىرعىزستان قۇراماسى جەكە-دارا كوش باستادى. جارىس قوجايىدارى ءتورت سالماق دارەجەسىندە باس جۇلدەنى قانجىعاعا بايلادى. ەكىنشى جانە ءۇشىنشى ورىنداردا – يران (2 التىن+4 كۇمىس+3 قولا) مەن وزبەكستان (2+1+2). ءتورتىنشى مەن بەسىنشى ساتىعا قازاقستان (1+0+3) مەن كاتار (1+0+0) جايعاستى. سونداي-اق, جۇلدە العاندار قاتارىندا ءۇندىستان (0+2+3), جاپونيا (0+1+2), سولتۇستىك كورەيا (0+1+0), قىتاي (0+0+4) جانە وڭتۇستىك كورەيانىڭ (0+0+3) بالۋاندارى بار.    

گرەك-ريم كۇرەسىنەن ازيا چەمپيوندارى

55 كگ – يحتيەر باتىروۆ (وزبەكستان), 60 كگ – الىشەر گانيەۆ (وزبەكستان), 63 كگ – اۆتانديل تاالايبەك ۇلى (قىرعىزستان), 67 كگ – راززاق بەيشەكەەۆ (قىرعىزستان), 72 كگ – الماتبەك امانبەك (قازاقستان), 77 كگ – اقجول ماحمۇدوۆ (قىرعىزستان), 82 كگ – شاحين باداحي (كاتار), 87 كگ – اسان جانىشەۆ (قىرعىزستان), 97 كگ – موحاممادحادي ساراۆي (يران) جانە 130 كگ – ءامين ميرزازادە (يران).  

بالۋاندار مەدۆەدتىڭ مەموريالىنان 14 مەدالمەن ورالدى  

جالعىز جۇلدە – گۇلمارالدا

بىلتىر يوردانيانىڭ استاناسى – امماندا ايەلدەر كۇرەسىنەن وتكەن جارىستا ءبىزدىڭ قىزدار نەبارى ەكى جۇلدە الدى: ءجاميليا باقبەرگەنوۆا (72 كگ) التىننان القا تاقسا, زەينەپ بايانوۆا (53 كگ) قولاعا قول سوزدى. ال بيىلعى ناتيجەمىز ودان دا تومەن بولدى. جوعارىدا ەسىمدەرى اتالعان قوس بالۋان العاشقى اينالىمنان اسا المادى. جاھاندىق جارىستاردا ۇنەمى جۇلدەگەرلەر قاتارىنان كورىنىپ, ازيادا الدىنا جان سالماي جۇرگەن ءجاميليا ويدا-جوقا ۇندىستاندىق حارشيتا حارشيتادان ۇتىلدى. جۋىردا تيراندادا مۇحاممەد مالونىڭ تۋرنيرىندە توپ جارىپ, بابىنىڭ جاقسى ەكەنىن بايقاتقان زەينەپ بىشكەكتە بىلگەنىنەن جاڭىلدى. ول الەم جانە قۇرلىق چەمپيونى, جاپونيالىق موە كيۋووكاعا جارىتىپ قارسىلىق كورسەتە المادى. سونداي-اق, شۇعىلا ومىربەك (55 كگ), نيلۋفار رايموۆا (57 كگ), ۆيكتوريا حۋساينوۆا (59 كگ) جانە ايجان ءسۇيدۋوۆا (65 كگ) تۇساۋكەسەر كەزدەسۋلەرىندە جەڭىلىستىڭ كەرمەك ءدامىن تاتتى.

مارال تاڭىربەرگەنوۆا (50 كگ) مەن ەلەنا شالىگينا (68 كگ) دا «شۋ» دەگەننەن ءسۇرىندى. ولاردى ۇتقان سپورتشىلار فينالعا شىققانىنىڭ ارقاسىندا جەرلەستەرىمىزگە ءۇشىنشى ورىن ءۇشىن تالاسۋعا جول اشىلدى. بىراق بۇل مۇمكىندىكتى ەكەۋى دە ۇتىمدى پايدالانا المادى. مارال قىتايلىق زيگۋ فەنگكە وڭاي ۇتىلدى. جاسى 40-قا تاياعان ەلەنانى موڭعوليالىق دەلگەرما ەنحسايحان تۋشەگە قويدى.  

قىرعىزستاننىڭ استاناسىندا ونەر كورسەتكەن 10 بۇرىمدىمىزدىڭ تەك ەكەۋى عانا جارتىلاي فينالعا دەيىن جەتتى. 76 كگ سالماقتاعى گۇلمارال ەركەباەۆا وڭتۇستىك كورەيانىڭ وكىلى ەۋنجۋ حۆاندى قاپى قالدىرىپ, قولا مەدالدى ەنشىلەدى. ال 62 كگ سالماق دارەجەسىندە باق سىناعان تىنىس دۇبەك ءۇشىنشى ورىن ءۇشىن باسەكەدە موڭعوليالىق تسەرەنشيمەد سەكحەنىڭ وسال تۇسىن تابا المادى. ءسويتىپ, قىرعىزستان ساپارىنان قازاقستاننىڭ ايەلدەر قۇراماسى جالعىز جۇلدەمەن ورالدى. 

جالپى كوماندالىق ەسەپتە قىتاي (5+1+4) وزدى. اسپاناستى ەلىنىڭ ارۋلارى بارلىق سالماقتا جۇلدە الدى. جاپونيا (3+4+2) ەكىنشى ورىندا قالىپ قويدى. قىرعىزستان (1+1+3) مەن موڭعوليا (1+1+3) ءۇشىنشى جانە ءتورتىنشى ورىندى ءوزارا ءبولىستى. ودان بولەك, سولتۇستىك كورەيا (0+2+0), ءۇندىستان (0+1+4), وزبەكستان (0+0+2), قازاقستان (0+0+1) جانە وڭتۇستىك كورەيانىڭ (0+0+1) قىزدارىنا جۇلدە الۋ باقىتى بۇيىردى.      

ايەلدەر كۇرەسىنەن ازيا چەمپيوندارى

50 كگ – يۋي سۋساكي (جاپونيا), 53 كگ – جين جانگ (قىتاي), 55 كگ – سوۆاكا ۋچيدا (جاپونيا), 57 كگ – كەكسين حون (قىتاي), 59 كگ – مەنجۋ حيە (قىتاي), 62 كگ – نونوكا وزاكي (جاپونيا), 65 كگ – ليلي ليلي (قىتاي), 68 كگ – مەيىرىم جۇمانازاروۆا (قىرعىزستان), 72 كگ – جيا لونگ (قىتاي) جانە 76 كگ – داۆااناسان ەنحامار (موڭعوليا). 

قوس قولانى قاناعات تۇتتىق

 ازيا چەمپيوناتىن ەركىن كۇرەس شەبەرلەرى قورىتىندىلادى. العاشقى اينالىمدا ءادي سەرىك ۇلى (65 كگ) تاكارا سۋدادان (جاپونيا), سانجار دوسجانوۆ (70 كگ) سينا ماحدي حاليليدەن (يران) ۇتىلسا, مەرەي بازارباەۆ (57 كگ) ەكىنشى كەزەڭدە فۋگا ساساكيدەن (جاپونيا) جەڭىلدى. باستاپقى سىناقتا سۇرىنگەندەرىنە قاراماستان داۋلەت ەرگەش (79 كگ) پەن بەكزات ۇركىمباي (97 كگ) جارىستى جالعاستىردى. بىراق ولار دا ۇزاققا شاپپادى. داۋلەت سۋلدكحۋ ولونباياردان (موڭعوليا), بەكزات اتاعى جەر جارعان احمەد تادجۋدينوۆتان (باحرەين) وڭباي جىعىلدى.

جەكسەنبىدە ازيا چەمپيوناتىنىڭ سوڭعى جۇلدەلەر تاراتىلدى. اسىل ايتاقىن (61 كگ) مەن ەرنۇر نۇرعازىدان (74 كگ) قايىر بولمادى. اسىل توشەحيرو حاسەگاۆانىڭ (جاپونيا), ەرنۇر بەگيجون قۇلداشەۆتىڭ (وزبەكستان) الدىندا دارمەنسىزدىك تانىتتى. ولارعا قاراعاندا بولات ساقاەۆ (86 كگ) پەن ازامات داۋلەتبەكوۆ (92 كگ) ءتاۋىر كۇرەستى. جاستارى 30-دىڭ بەل ورتاسىنا تاياعان ساقا سپورتشىلار جارتىلاي فينالعا دەيىنگى قارسىلاستارىن قوعاداي جاپىردى. وسى مەجەگە جەتكەندە ەكەۋى دە ءسۇرىندى. بولات مۋكۋل داحيانى ء(ۇندىستان) 6:0-مەن جەڭىپ جاتىپ, اقىرىندا 6:12 ەسەبىمەن ۇتىلدى. ازامات موحاممادموبين ازيميدەن (يران) سوقىر ۇپاي الا المادى – 0:6. ءۇشىنشى ورىن ءۇشىن سايىستا قىدىر سايپۋددينوۆ (باحرەين) ساقاەۆقا سان سوقىتىرسا, داۋلەتبەكوۆ تاكاشي يشاگۋرونى (جاپونيا) ەش كۇمانسىز ۇتتى.   

بىلتىر 18 جاسقا تولعان شاعىندا وزىنەن ءبىر-ەكى جاس ۇلكەن بالۋانداردى تەگىستەي ۇتىپ, الەم چەمپيونى (U20) اتانعان ەدىگە قاسىمبەك (125 كگ) ەرەسەكتەر دۋىنا بيىل عانا قاتىسا باستادى. قازاقتىڭ دارىندى جىگىتى ءۇشىن العاشقى سىناق – وسى ازيا چەمپيوناتى. بىشكەكتە ول ءوزىن جاقسى قىرىنان كورسەتتى. ەدىگە تۇساۋكەسكەر كەزەسۋىندە نامبارداگۆا باتباياردان (موڭعوليا) باسىم ءتۇستى. كەلەسى كەزەڭدە توكيو ولمپياداسىنىڭ قولا, پاريج وليمپياداسىنىڭ كۇمىس جۇلدەگەرى, الەمنىڭ ءۇش دۇركىن چەمپيونى, ازيا ويىندارىنىڭ جەڭىمپازى, قۇرلىق چەمپيونى ءامىر حوسسەين زارەمەن (يران) كۇش سىناستى. ازۋلى قارسىلاستان قاسىمبەك ەش قايمىققان جوق. باتىل كۇرەسىپ, ءوزىن مىنەزدى بالۋان ەكەنىن بايقاتتى. بۇل باسەكەدە زارەنىڭ مەرەيى ۇستەم بولعانىمەن, قازاقتىڭ ءور مىنەزدى ۇلىنىڭ ونەرى كوپشىلىكتىڭ كوڭىلىنەن شىقتى. قولا مەدال ءۇشىن بەلدەسۋدە ەدىگە بۋحەەەردۋن بۋحەەەردۋننان (قىتاي) باسىم ءتۇستى. ءسويتىپ, قازاقستاننىڭ ەركىن كۇرەس شەبەرلەرى سارى قۇرلىقتىڭ باستى دوداسىن ەكى قولامەن قورىتىندالادى.  

جالپى كوماندالىق ەسەپتە پارسى ەلىنىڭ پەحلەۆاندارى (4+1+3) الدارىنا جان سالمادى. جاپونيا (3+0+0) مەن ءۇندىستاننىڭ (2+3+2) بالۋاندارى يراندىقتارمەن ءبىراز يىق تىرەستى. ودان كەيىنگى ورىنداردى سولتۇستىك كورەيا (1+0+0), باحرەين (0+3+3), موڭعوليا (0+2+1), وزبەكستان (0+1+2), قىرعىزستان (0+0+4), قازاقستان مەن تاجىكستان (0+0+2) جانە تۇرىكمەنستان (0+0+1) ەنشىلەدى. 

ەركىن كۇرەستەن ازيا چەمپيوندارى

57 كگ – ميلاد ۆاليزادە (يران) , 61 كگ – كيم كۆان ميەن (وڭتۇستىك كورەيا) , 65 كگ – سۋجەەت سۋجەەت ء(ۇندىستان), 70 كگ – ابحونيموۋ ابحونيموۋ ء(ۇندىستان), 74 كگ – يوشينەسكە اوياگي (جاپونيا), 79 كگ – كەيۆان گارداچي (جاپونيا), 86 كگ – كامران گاسەمپۋر (يران) , 92 كگ – موحاممادموبين ازيمي (يران), 97 كگ – اراش يوشيدا (جاپونيا) جانە 125 كگ – ءامىر حوسسەين زارە (يران).     

كۇرەس تۇرلەرىنەن ازيا چەمپيوناتىنا قاتىساتىن بالۋاندار بەلگىلى بولدى