قازاقستاندا ينتەرنەت-الاياقتىقتىڭ جاڭا تۇرلەرى كوبەيىپ كەلەدى. ازاماتتارعا ەمحاناعا بارعاننان نەمەسە دارىگەر قابىلداۋىنا جازىلعاننان كەيىن كۇماندى قوڭىراۋلار تۇسە باستاعان, دەپ حابارلايدى Egemen.kz.
الاياقتار وزدەرىن مەديتسينا قىزمەتكەرى رەتىندە تانىستىرىپ, كەي جاعدايدا ازاماتتاردىڭ جەكە دەرەكتەرىن, ءتىپتى جسن-ءىن ايتىپ, سەنىمگە كىرۋگە تىرىسادى. ولار «قابىلداۋعا كەلۋدى راستاۋ» سىلتاۋىمەن SMS ارقىلى كەلگەن كودتى سۇرايدى. بۇدان بولەك, كەيبىرى زەينەتاقى قورىنىڭ قىزمەتكەرى بولىپ حابارلاسىپ, جالعان كەزەككە تىركەپ, كەڭسەگە شاقىرۋى مۇمكىن.
مامانداردىڭ ايتۋىنشا, قاسكويلەردىڭ باستى ماقساتى – ازاماتتاردىڭ جەكە جانە بانك دەرەكتەرىنە قول جەتكىزۋ. ول ءۇشىن الاياقتار ءتۇرلى تاسىلدەردى قولدانادى: تەلەفون ءنومىرىن, داۋىسىن وزگەرتۋ, جالعان اككاۋنتتار مەن مەسسەندجەرلەردى پايدالانۋ, سونداي-اق «شۇعىل ارەكەت ەتۋ قاجەت» دەگەن قىسىم جاساۋ. ءتىپتى «سىزگە نەسيە ماقۇلداندى» دەگەن جالعان اقپارات تاراتۋ ارقىلى دا ادامداردى الدايدى.
جالعان قۇجاتتار پايدالانعان: جەتىسۋ وبلىسىندا الاياق 5 جىلعا سوتتالدى
«بجزق» اق ازاماتتاردى ساق بولۋعا شاقىرىپ, كۇدىكتى قوڭىراۋلارعا جاۋاپ بەرمەۋگە, SMS-كودتار مەن جەكە مالىمەتتەردى ەشكىمگە بەرمەۋگە كەڭەس بەرەدى. اقپاراتتى تەك رەسمي دەرەككوزدەردەن تەكسەرىپ, كۇمان تۋىنداعان جاعدايدا بىردەن قۇقىق قورعاۋ ورگاندارىنا جۇگىنۋ قاجەت.
قور ماماندارى زەينەتاقى تولەمدەرىن راسىمدەۋ ءۇشىن ەشقانداي دەلدال قاجەت ەمەس ەكەنىن ەسكەرتەدى. بارلىق قىزمەت زاڭ اياسىندا, كوميسسياسىز جۇزەگە اسادى. جيناق قاراجاتىن پايدالانۋ دا تەك ۋاكىلەتتى وپەراتورلار ارقىلى ىسكە اسادى.
اگەنتتىك ەسكەرتەدى: جالعان ساقتاندىرۋ پوليستەرىن ساتاتىن الاياقتار كوبەيگەن
ايتا كەتەيىك, مەملەكەتتىك ورگانداردىڭ, بانكتەردىڭ نەمەسە زەينەتاقى قورىنىڭ قىزمەتكەرلەرى ەشقاشان تەلەفون نە مەسسەندجەر ارقىلى قۇپيا اقپاراتتى, بانك كارتاسىنىڭ دەرەكتەرىن نەمەسە SMS-كودتاردى سۇرامايدى.