شىمكەنت قالاسىندا جۇرگىزىلگەن جوسپاردان تىس تەكسەرۋلەر بارىسىندا «Coca-Cola» كومپانياسىنىڭ كونترافاكتىلىك ونىمدەرى انىقتالدى. بۇل تۋرالى قالالىق ادىلەت دەپارتامەنتى حابارلادى, دەپ جازادى Egemen.kz.
تەكسەرۋگە «The Coca-Cola Company» كومپانياسىنىڭ رەسمي شاعىمى نەگىز بولعان. قۇقىق يەسى ءوز تاۋار بەلگىسىنىڭ زاڭسىز پايدالانىلىپ جاتقانىن جانە نارىقتا شىعۋ تەگى كۇماندى ونىمدەردىڭ پايدا بولعانىن مالىمدەگەن.
ناتيجەسىندە قالا بازارلارىندا قولدان جاسالعان سالقىنداتقىش سۋسىنداردىڭ ءىرى پارتياسى ساتىلعانى بەلگىلى بولدى. ساراپتاما بارىسىندا ونىمدەردە جالعان بەلگىلەر, تاڭبالاۋ تالاپتارىنىڭ بۇزىلۋى جانە ءتيىستى رۇقسات قۇجاتتارىنىڭ جوقتىعى انىقتالعان.
شىمكەنتتە اگروونەركاسىپتى قولداۋعا بولىنگەن قاراجات تالان-تاراجعا تۇسكەن
اتالعان دەرەكتەر بويىنشا اكىمشىلىك قۇقىقبۇزۋشىلىق تۋرالى ءىس قوزعالىپ, ماتەريالدار سوتقا جولداندى.
ماماندار كونترافاكتىلىك ونىمدەر تەك قۇقىق يەلەرىنە ەكونوميكالىق زيان كەلتىرىپ قانا قويماي, سانيتارلىق تالاپتاردىڭ ساقتالماۋىنا بايلانىستى تۇتىنۋشىلار دەنساۋلىعىنا دا قاۋىپ توندىرەتىنىن ەسكەرتەدى.
ادىلەت دەپارتامەنتى كاسىپكەرلەردى زاڭ تالاپتارىن ساقتاۋعا شاقىرىپ, مۇنداي تەكسەرۋلەر الداعى ۋاقىتتا دا جالعاساتىنىن مالىمدەدى.