قازاقتىڭ ۇرپاقتان-ۇرپاققا جەتكەن ۇلتتىق اسپابى – دومبىرا. الايدا ونى جاساۋعا بەت بۇرعان شەبەرلەر كوپ ەمەس. سونداي شەبەردىڭ قاتارىنداعى نۇرلىبەك بيسەمباەۆ دومبىراشى ماماندىعىن مەڭگەرگەن.
بالا كەزىنەن ۇلتتىق اسپاپقا قىزىققان ول اۋەلى اتىراۋداعى د.نۇرپەيىسوۆا اتىنداعى حالىق مۋزىكاسى اكادەمياسىنىڭ جانىنداعى كوللەدجىن ءبىتىردى. كەيىن ح.دوسمۇحامەدوۆ اتىنداعى اتىراۋ ۋنيۆەرسيتەتىنەن جوعارى ءبىلىم العان سوڭ بەرەكە اۋىلىنداعى مەكتەپتە دومبىرا كلاسىن اشقان. مۇندا بالالارعا دومبىرا تارتۋدى ۇيرەتتى. قولى بوساعان كەزدە دومبىرا جاساۋدى كاسىبىنە اينالدىردى.
– ءوزىم دومبىراشى بولعان سوڭ بالالاردىڭ ساپالى دومبىرادا ويناعانىن قالادىم. ۇلتتىق اسپاپتىڭ داۋسى كۇمبىرلەپ, تازا شىعۋى كەرەك. ال بازارلار مەن وزگە ساۋدا ورىندارىندا ساتىلاتىن اسپاپتاردىڭ ساپاسى كوڭىلدەن شىقپايدى. سول سەبەپتەن, دومبىرا جاساۋدى قولعا الدىم, – دەيدى نۇرلىبەك بيسەمباەۆ.
بۇرىن اكەسى دومبىرا جاساۋدىڭ شەبەرى بولعان. اكەسىنىڭ ءىسىن جالعاستىرۋ ءۇشىن ءتورت جىل بۇرىن دومبىرا جاسايتىن شەبەرحانا اشقان. كاسىبىن باستاۋ ءۇشىن مەملەكەتتىك باعدارلاما ارقىلى جەڭىلدەتىلگەن نەسيەگە يە بولعان. سول قارجىعا ستانوكتار مەن قاجەتتى ماتەريالداردى ساتىپ العان. ونىڭ العاشقى جاساعان تۋىندىسى سارايشىق اۋىلىنداعى مۋزەيدە تۇر.
قازىر نۇرلىبەك بيسەمباەۆتىڭ شەبەرحاناسىندا ايىنا 100-گە جۋىق دومبىرا جاسالادى. دومبىرا جاساۋعا اعالارى كومەكتەسەدى. بىرنەشە ادامدى جۇمىسپەن قامتىپ وتىر. الماتىدان ۇيەڭكى, قاراعاي, قارا اعاش, قىزىل اعاشتى تاپسىرىسپەن الدىرادى. دومبىرانىڭ باعاسى ماتەريالى مەن جاسالۋ كۇردەلىلىگىنە بايلانىستى 20 مىڭ تەڭگەدەن باستالادى. ەلىمىزدىڭ ءار وڭىرىنەن تاپسىرىس تۇسەدى. ال كاسىبي دومبىراشىلار قىمبات دومبىراعا تاپسىرىس بەرەدى.
– دومبىرا جاساۋداعى ماقساتىم – كوپ اقشا تابۋ ەمەس, ساپالى ۇلتتىق اسپاپ جاساۋ. ءوزىم دومبىراشى بولعاندىقتان, دومبىرانىڭ دىبىسىن بىردەن اجىراتامىن. سول سەبەپتەن, دومبىرا جاساۋ كەزىندە بۇعان ەرەكشە نازار اۋدارامىن, – دەيدى ۇلتتىق اسپاپ جاساۋدىڭ شەبەرى. ەندى دومبىرا شەبەرحاناسىن كەڭەيتىپ, ايىنا 5 مىڭ دومبىرا جاساۋدى كوزدەپ وتىر. بۇل ءۇشىن قوسىمشا ستانوكتار ساتىپ الماق.
اتىراۋ وبلىسى