تالدىقورعان قالاسىنداعى نازارباەۆ زياتكەرلىك مەكتەبىنىڭ تۇلەگى, نازارباەۆ ۋنيۆەرسيتەتىنىڭ ستۋدەنتى ارمان بولاتوۆ بولگاريادا وتكەن 29-شى حالىقارالىق ماتەماتيكا بايقاۋىندا التىن مەدال جەڭىپ الدى. بۇل ءبىلىم بايگەسى قاتىسۋشىلارىنىڭ سانى بويىنشا ەڭ ءىرى وليمپيادا بولىپ ەسەپتەلەدى.
ەكى كۇندىك جارىس بارىسىندا ءبىلىمپاز وتە جاقسى ناتيجە كورسەتكەن. «ارمان – ەرەكشە ماتەماتيك», دەيدى ستۋدەنتتەردى IMC وليمپياداسىنا دايىنداعان نۋ جاراتىلىستانۋ الەۋمەتتىك جانە گۋمانيتارلىق عىلىمدار مەكتەبىنىڭ (NU SSH) اسسيستەنت-پروفەسسورى پيوتر سكريپاچ.
بۇگىندە جاس تالاپكەر «ينفورماتيكا» ماماندىعىنىڭ ءۇشىنشى كۋرس ستۋدەنتى. بۇل, جالپى, ۋنيۆەرسيتەت ءۇشىن ەكىنشى التىن مەدال بولسا, ارمان ءۇشىن العاشقى جەڭىس.
«مەن ماتەماتيكاداعى تەوريانى وتە جاقسى كورەمىن. ماتەماتيكانى شامامەن قولدانبالى جانە تازا دەپ ەكى بولىككە بولۋگە بولادى. قولدانبالى – بۇل ادامزاتقا پراكتيكالىق پايدا اكەلەدى. مىسالى, اقىلدى جۇيەلەر مەن جاساندى ينتەللەكت ينستيتۋتىندا (ISSAI) كۇندەلىكتى ماسەلەلەردى شەشۋدە ماتەماتيكا قولدانىلادى. قالعانى تازا ماتەماتيكا», دەيدى ا.بولاتوۆ.
ول اتالعان ۋنيۆەرسيتەتتە ونەركاسىپتىك جانە قولدانبالى ماتەماتيكا قوعامى (SIAM) كلۋبىنىڭ مۇشەسى جانە عالىمدار ماشينالىق وقىتۋ ادىستەرىن قولداناتىن ISSAI-دا عىلىمي كومەكشى بولىپ جۇمىس ىستەيدى. قازىر ورتالىق ازيا تاعامدارىنىڭ دەرەكتەر جيناعىن توپتاۋعا جانە كەسكىندەردى جىكتەۋ ۇلگىلەرىن دايىنداۋعا كومەكتەسۋدە.
ارماننىڭ ايتۋىنشا, جاڭا تاقىرىپتاردى زەردەلەۋ كەزىندە ءىس-قيمىل الگوريتمىن مەحانيكالىق تۇردە جاتتاپ قانا قويماي, ماتەريالدىڭ ءمانى مەن تۇجىرىمداماسىن تۇسىنۋگە تىرىسۋ كەرەك. ەڭ ىزدەنىمپاز بالالار قوسىمشا اقپارات كوزدەرىنە جۇگىنەدى. مىسالى, Beyond Curriculum قوعامدىق قورىنىڭ «سۇراۋ» فورۋمى (ask.bc-pf.org). بۇل جەردە مەكتەپ وقۋشىلارى ءبىر-بىرىنە كومەكتەسەدى.
ايتپاقشى, Beyond Curriculum قوعامدىق قوردىڭ نەگىزىن قالاۋشى دا تالدىقورعان قالاسىنداعى NIS-تىڭ 2017 جىلعى تۇلەگى انتون مورگۋنوۆ ەكەنىن اتاپ وتكەن ءجون.
جەتىسۋ وبلىسى