بىلتىر ەلىمىزدىڭ قۇراماسى الەمنىڭ 100-دەن استام ەلىنىڭ وكىلدەرىمەن قاتار ماتەماتيكا, فيزيكا, گەوگرافيا, حيميا, بيولوگيا, لينگۆيستيكا جانە ينفورماتيكا (JBMO, IMO, IPhO, IGeO, IChO, IBO, ILO, IOI) بويىنشا 8 بەدەلدى حالىقارالىق وليمپيادالارعا قاتىسىپ, 33 مەدال جەڭىپ العان.
«الماتى دارىنى» دارىندى بالالار مەن دارىندى جاستاردى انىقتاۋ جانە قولداۋ ورتالىعى ديرەكتورىنىڭ ورىنباسارى گۇلنۇر كارىمعاجى وڭىرلىك كوممۋنيكاتسيالار بريفينگىندە دارىندى بالالاردى قولداۋ مەن الەۋمەتتەندىرۋدىڭ ماڭىزدىلىعىن اتاپ ءوتتى. گۇلنۇر كارىمعاجىنىڭ ايتۋىنشا, 20 جىلدان استام قالالىق كوماندا حالىقارالىق وليمپيادالاردىڭ قورىتىندىسى بويىنشا ۇزدىكتەر ساناتىندا كەلەدى. رەسپۋبليكا قۇراما كومانداسىنداعى الماتىلىق 18 وقۋشىنىڭ 11-ءى 5 كۇمىس, 6 قولا مەدال يەگەرى اتانعان.
بۇگىندە مەملەكەت باسشىسىنىڭ تاپسىرماسى بويىنشا دارىندى بالالاردى قولداۋ ماقساتىندا العاش رەت حالىقارالىق زياتكەرلىك سايىستاردىڭ جەڭىمپازدارىنا اقشالاي سىيلىقتار مەن قازاقستاندىق جوعارى وقۋ ورىندارىندا ءبىلىم الۋعا گرانتتار بەرىلەتىنى بەلگىلى. وسى ورايدا التىن مەدال العان وقۋشىعا 1,5 مىڭ اەك, كۇمىس مەدالعا 1 مىڭ اەك, قولا مەدالعا 500 اەك كولەمىندە اقشالاي سىيلىق بەرىلەتىن بولسا, وقۋشىلارىن جارىسقا دايىنداعان ۇستازدارعا دا بىرجولعى سىياقى بۇيىرادى. گۇلنۇر كارىمعاجىنىڭ ايتۋىنشا, قالادا دارىندى بالالاردى قولداۋدىڭ باي تاجىريبەسى جيناقتالعان. ەگەر وتكەن جىلعا دەيىن 56 وليمپيادا مەن بايقاۋ وتكەن بولسا, بيىلعىسىنىڭ سانى – 175. وسى ورايدا بالالاردىڭ جەڭىمپاز اتانۋى ءۇشىن وقۋ-جاتتىعۋ شارالارى تۇراقتى وتكىزىلىپ تۇرادى. الداعى ۋاقىتتا قالالىق وقۋشىلاردى شەتەلدەرگە دە شىعارۋ جوسپاردا بار.
ماتەماتيكادان حالىقارالىق وليمپيادانىڭ (IMO) جەتەكشىسى ۆلاديمير جۋك وليمپيادالاردىڭ تاربيەلىك ءمانى زور ەكەنىن ايتادى. «ماتەماتيكالىق وليمپيادالاردىڭ تاريحى ارىدەن قاراستىراتىن بولساق, ءبىرىنشى وليمپيادا ءحىح عاسىردىڭ اياعىندا اۆسترو-ۆەنگريادا وتكەنى بەلگىلى. وسى ورايدا ۆ.جۋك حالىقارالىق ماتەماتيكالىق وليمپيادالاردىڭ 60 جىلدان بەرگى ارالىقتا ءوتىپ كەلە جاتقانىن العا تارتا كەلىپ, «وسىدان 20 جىل بۇرىن الماتىلىق وقۋشىلار نولگە جاقىن ۇپاي جيناسا, قازىر جەڭىمپازدار قاتارىنان تابىلۋدا», دەپ اتاپ ءوتتى. سونىمەن بىرگە وليمپيادا قاتىسۋشىلارى ەلىمىزدىڭ, سونداي-اق شەتەلدەردىڭ بەدەلدى جوعارى وقۋ ورىندارىنا ءبىلىم الۋدا.
حالىقارالىق ماتەماتيكا وليمپياداسىنىڭ ء(ىمو) قولا جۇلدەگەرى يۋري تەن ءوز ءبىلىمىنىڭ ناتيجەسىندە ەرتە جاستان امەريكاداعى ۋنيۆەرسيتەتتە وقۋعا مۇمكىندىك العان. بولاشاق ينجەنەر باسقا ەلدەردىڭ وقۋشىلارىمەن باسەكەلەسۋدىڭ وتە قىزىقتى, ال وليمپياداعا قاتىسۋدىڭ ۇلكەن جاۋاپكەرشىلىك ەكەنىن العا تارتسا, بيولوگيا ءپانى بويىنشا حالىقارالىق وليمپيادانىڭ قولا جۇلدەگەرى باقداۋلەت ەرنازاروۆ جاتتىقتىرۋشىلارى مەن ۇستازدارىنا العىس ءبىلدىردى. بيولوگيانى 7-ءشى سىنىپتان باستاپ تەرەڭ زەردەلەي باستاعان ب.ەرنازاروۆ بۇل باعىتتاعى عىلىمنىڭ ەرەكشەلىگىن اتاپ ءوتتى. بۇگىندە ول جاڭا بيىكتەردى باعىندىرۋعا دايىندىق ۇستىندە.
الماتى