وقۋ-اعارتۋ ءمينيسترى اسحات ايماعامبەتوۆ پەن ىشكى ىستەر ءمينيسترى مارات احمەتجانوۆ جاڭا وقۋ جىلى قارساڭىندا مەكتەپ وقۋشىلارىنىڭ قاۋىپسىزدىگىنە ارنالعان كەڭەس وتكىزدى, دەپ حابارلايدى Egemen.kz وقۋ-اعارتۋ مينيسترلىگىنىڭ ءباسپاسوز قىزمەتىنە سىلتەمە جاساپ.
اسحات ايماعامبەتوۆ مەكتەپتەردىڭ تەحنيكالىق جاراقتاندىرىلۋى مەن ونىڭ ساپاسى تۋرالى ايتا كەلە, جەرگىلىكتى اتقارۋشى ورگاندار ءبىلىم بەرۋ ۇيىمدارىن بەينەكامەرالارمەن 100 پايىز قامتۋ تۋرالى ەسەپ بەرەتىنىن اتاپ ءوتتى. بىراق تەكسەرۋ بارىسىندا ەلەۋلى كەمشىلىكتەر انىقتالدى. بارلىق كامەرالار جۇمىس ىستەمەيدى, كەيبىر قالا مەكتەپتەرى وسك-عا قوسىلماعان. سونداي-اق ول كامەرالاردىڭ سانى ەمەس, كامەرا دەرەكتەرىمەن قانشا بالانىڭ قامتىلعانى ماڭىزدى ەكەنىن ايتتى.
سونداي-اق قر بعم ءباسپاسوز قىزمەتىنىڭ حابارلاۋىنشا, جاڭا وقۋ جىلى قارساڭىندا وقۋ-اعارتۋ مينيسترلىگى ىشكى ىستەر مينيسترلىگىنىڭ وكىلدەرىمەن بىرلەسىپ, مەكتەپ وقۋشىلارىنىڭ قاۋىپسىزدىگى بويىنشا ساباق وتكىزەدى. ولارعا ءبىلىم بەرۋ ۇيىمدارىنىڭ دا, قۇقىق قورعاۋ ورگاندارىنىڭ دا وكىلدەرى قاتىسادى.
«قىركۇيەك ايىنىڭ باسىنان باستاپ مەكتەپتەرگە 5 مىڭنان استام پوليتسيا قىزمەتكەرى كەلىپ, الدىن الۋ ماقساتىندا قاجەتتى ساباقتار وتكىزەدى. بۇل جۇمىسقا مۇعالىمدەر, مەكتەپ ديرەكتورلارى بەلسەنە قاتىسادى. وقۋ جىلىنىڭ باسىندا ىشكى ىستەر ورگاندارىنان مەكتەپ جانىنداعى كەزەكشىلىكتى كۇشەيتىپ, قاجەت جەرلەرگە ارنايى جول بەلگىلەرىن ورناتىپ, الدىن الۋ شارالارىن جۇرگىزۋدى سۇرايمىز. ءبىز بارلىق مەكتەپ اۆتوبۋستارىن, سونداي-اق قاۋىپسىزدىك جۇيەلەرىن تەكسەرۋدى اياقتاۋىمىز كەرەك. بۇل جۇمىستى بىرلەسىپ اياقتايمىز دەپ ويلايمىن», دەدى اسحات ايماعامبەتوۆ.
ىشكى ىستەر ءمينيسترى مارات احمەتجانوۆ ۆەدومستۆونىڭ بارلىق جەكە قۇرامى مەكتەپ وقۋشىلارى اراسىندا ءتۇسىندىرۋ جۇمىستارىن جۇرگىزەتىنىن اتاپ ءوتتى. مەكتەپ وقۋشىلارىنا ولاردىڭ قۇقىقتارى مەن مىندەتتەرى ءتۇسىندىرىلىپ, قۇقىق بۇزۋشىلىقتىڭ الدىن الۋ, توتەنشە جاعدايلاردا قالاي ارەكەت ەتۋ كەرەكتىگى ايتىلادى. سونداي-اق ول ەلوردالىق مەكتەپ-گيمنازيالاردىڭ بىرىنە باراتىنىن اتاپ ءوتتى.