300 مىڭنان استام وقۋشى مەكتەپ فورماسى مەن كەڭسە تاۋارلارىن ساتىپ الۋ ءۇشىن «جالپىعا مىندەتتى ءبىلىم بەرۋ» قورىنان قارجىلاي كومەك الدى, دەپ حابارلايدى Egemen.kz.
وقۋ-اعارتۋ مينيسترلىگىنىڭ Facebook پاراقشاسىندا جاريالانعان اقپاراتقا سايكەس, «جالپىعا مىندەتتى ءبىلىم بەرۋ» قورى اياسىندا 300 مىڭنان استام وقۋشى قارجى الدى. قارجىلاي كومەك 475 مىڭ بالاعا كورسەتىلەدى.
«وقۋ-اعارتۋ ءمينيسترى ءبىلىم باسقارمالارىنىڭ باسشىلارىمەن كەزدەسۋدە تولەمدەردى 23 تامىزعا (قوسا العاندا) دەيىن اياقتاۋ تۋرالى تاپسىرما بەردى. بيىلدان باستاپ وقۋ-اعارتۋ مينيسترلىگى قارجىلاي كومەك كورسەتۋ ەرەجەلەرىنە وزگەرىستەر ەنگىزدى. ەگەر بۇرىن وڭىرلەردە بولىنگەن سوما 17 مىڭنان 40 مىڭعا دەيىن بولسا, بيىل بۇل سوما ۇلعايتىلىپ, كەمىندە 37 389 تەڭگەنى قۇرايدى», دەپ اتاپ وتكەن مينيسترلىكتەن.
ۆەدومستۆو مالىمەتىنشە, كومەك بەرۋ تەتىگىنە دە وزگەرىستەر ەنگىزىلدى. ەندى اتا-انالارعا قارجى بالالارىمەن بىرگە مەكتەپ فورماسىن, اياق كيىمىن, كەڭسە تاۋارلارىن جانە تاعى باسقالارىن ءوز بەتىنشە تاڭداي الۋى ءۇشىن بانكتەگى شوتىنا اۋدارىلادى. بۇعان دەيىن مۇنىڭ بارلىعىن اكىمدىكتەر ساتىپ الاتىن جانە تاۋاردىڭ ولشەمىنە, ساپاسىنا جانە باسقا دا جايتقا قاتىستى ماسەلەلەر تۋىندايتىن.
«ەندى اتا-انالار وزدەرىنىڭ بانكتەگى شوتىنا اقشانى تىكەلەي الىپ, بالالارىنا مەكتەپ فورماسىن, كەڭسە تاۋارلارىن جانە اياق كيىمىن ءوز بەتىنشە تاڭداي الادى. مۇنىڭ ارتىقشىلىعى - بالا اتا-اناسىمەن بىرگە تاڭداعان كيىممەن مەكتەپكە بارا الۋىندا. بۇعان دەيىن ساتىپ الۋمەن اكىمدىكتەردىڭ قىزمەتكەرلەرى اينالىساتىن. كەيدە كيىمنىڭ ولشەمىنە, ساپاسىنا قاتىستى پروبلەمالار تۋىندايتىن. قازىر اكىمدىكتەر قاراجات اۋدارۋدى اياقتاپ جاتىر. 37 389 تەڭگە – ەڭ تومەنگى سوما. جەرگىلىكتى اتقارۋشى ورگاندار كورسەتىلگەن كومەك كولەمىن كوبەيتە الادى, بىراق ونى ازايتۋعا قۇقىعى جوق. كەيبىر اكىمدىكتەر بۇل سومادان ارتىق قارجى ءبولىپ جاتىر, مىسالى, الماتى 43 مىڭ تەڭگەدەن. ءبىز مۇنى تەك قۇپ كورەمىز», دەدى وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى توراعاسىنىڭ ورىنباسارى دۋلات جەكەباەۆ.