شىندىعىندا كىتاپ وقۋ تەك ءلاززات الۋ عانا ەمەس: سان عاسىرلاردىڭ سىرىن شەرتەتىن كىتاپتار ءبىزدىڭ سانامىزعا تەرەڭ اسەر ەتىپ, سىرتقى الەمگە كوزىمىزدى اشادى, كەيدە ءتىپتى جاقسى كىتاپتار الەۋمەتتىك وزگەرىستەردىڭ كاتاليزاتورى رەتىندە ارەكەت ەتەدى. دۇنيەجۇزىلىك ەكونوميكالىق فورۋم ۇجىمىنىڭ سايتى قوعامدى وزگەرتكەن تاڭداۋلى رومانداردىڭ اتىن اتادى. ءبىز سولاردىڭ ۇشەۋىنە توقتالا كەتەيىك.
«توم اعايدىڭ ءۇيى», اۆتورى گارريەت بيچەر ستوۋ
«دەمەك ءسىز وسى ۇلى سوعىس تۋرالى كىتاپ جازعان ايەل قالامگەرسىز». اۆراام لينكولن 1862 جىلى جازۋشى گارريەت بيچەر ستوۋمەن كەزدەسكەن كەزدە وسىلاي دەپ ەدى. «توم اعايدىڭ ءۇيى» رومانى جارىققا شىققان ون جىلدان كەيىن ءحىح عاسىرداعى ەڭ كوپ ساتىلعان كىتاپتىڭ ءبىرى بولدى. روماندا توم اعايدىڭ, افروامەريكالىق قۇلدىڭ وقيعاسى قۇلدىق قاسىرەتىن العاش رەت كوركەم شىعارما دەڭگەيىندە جۇرتشىلىقتىڭ نازارىنا ۇسىنىلىپ, كوپتەگەن وقىرماندى ويعا قالدىردى.
«دجۋنگلي» رومانى, اۆتورى اپتون سينكلەر
جۋرناليست اپتون سينكلەردىڭ 1906 جىلعى رومانى چيكاگونىڭ ەت وڭدەۋ ونەركاسىبىندەگى يمميگرانت جۇمىسشىلاردىڭ باسىنان وتكىزگەن وقيعالارىن, ءارتۇرلى قيىنشىلىقتارىن, اۋىر ەڭبەككە جەگىلۋ جاعدايلارىن, كەدەيلىك ءومىر مەن اسىرە قاناۋدى ءسوز ەتەدى. بۇل كىتاپ قارا جۇمىس ىستەيتىن كەدەيلەردىڭ اۋىر ءحالىن, بيلىك باسىنداعىلاردىڭ جەڭ ۇشىنان جالعاسقان جەمقورلىعىن اشىق كورسەتكىسى كەلگەن. سول سەبەپتى بۇل شىعارما وتكەن عاسىرداعى اقش-تاعى ساياسي ىقپالى كۇشتى تۋىندىلاردىڭ ءبىرى بولىپ سانالدى. «دجۋنگليدى» وقىعاننان كەيىن پرەزيدەنت تەودور رۋزۆەلت چيكاگونىڭ ەت وڭدەۋ ونەركاسىبىنە تەرگەۋ جۇرگىزۋدى تاپسىرادى. ءبىر جىلدىڭ ىشىندە «تازا ازىق-ت ۇلىك جانە ءدارى-دارمەك تۋرالى» زاڭمەن بىرگە ەت ينسپەكتسياسى تۋرالى زاڭ قابىلداندى, ول كەيىننەن ازىق-ت ۇلىك جانە ءدارى-دارمەك باسقارماسىنىڭ قۇرىلۋىنا سەبەپ بولادى.
«قاھارلى ءجۇزىم», اۆتورى دجون ستەينبەك
الەمدىك بەستسەللەرگە اينالعان بۇل رومان كاليفورنياعا جۇمىس تابۋ ءۇشىن ساپارعا شىققان ءجۇز مىڭداعان ميگرانتتىڭ دەپرەسسيا داۋىرىندەگى اۋىر كەدەيلىك پەن جوقشىلىق جاعدايىن ءسوز ەتەدى. بۇل شىعارما دا تسەنزۋراعا ۇشىرادى, ايتالىق اتالعان رومانعا كاليفورنيادا تىيىم سالىندى جانە ورتەلدى.