قازىرگى كەزدە ەلىمىز وڭىرلەرىندە رەسپۋبليكالىق «مەكتەپكە جول» اكتسياسى جالعاسىن تابۋدا. الماتى قالاسىندا دا قارقىن العان باستاما اياسىندا مۇقتاج وتباسىلاردان شىققان 19 مىڭ وقۋشىعا كومەك كورسەتىلىپ, ولارعا اكىمدىك تاراپىنان مەكتەپ فورماسى مەن كەڭسە كەرەك-جاراقتارىن ساتىپ الۋعا قولداۋ كورسەتىلەدى. بۇل ماقساتقا جەرگىلىكتى بيۋدجەتتەن 800 ملن تەڭگە قاراستىرىلىپ وتىر.
بيىل اكتسيا 30 قىركۇيەككە دەيىن جالعاسىپ, «مەكتەپكە جول – شەكاراسىز جاقسىلىق» ۇرانىمەن وتەدى. ول از قامتىلعان جانە كوپبالالى وتباسىلاردان شىققان وقۋشىلارعا, جەتىم بالالارعا, سونداي-اق اتا-اناسىنىڭ قامقورلىعىنسىز قالعان بالالارعا وقۋ جىلىنىڭ باستالۋىنا دايىندىق كەزىندە ماتەريالدىق قولداۋ كورسەتۋگە جانە الەۋمەتتىك سەبەپتەر بويىنشا بالالاردىڭ مەكتەپكە قالماي كەلۋىنە باعىتتالعان.
وڭىرلىك كوممۋنيكاتسيالار قىزمەتىندە وسى باعىتتاعى شارالار تۋرالى بايانداعان الماتى قالاسى ءبىلىم باسقارماسىنىڭ باسشىسى ءلاززات جىلقىباەۆا وقۋشىلارعا وقۋ جىلىنا دايىندىققا كومەك كورسەتۋ بويىنشا جۇمىستار ىسكە اسىپ جاتقانىن جەتكىزدى. وسى ورايدا كومەككە مۇقتاج بالالاردىڭ دەرەكتەر بازاسى قۇرىلىپ, جەدەل جەلىلەر, سەنىم تەلەفوندارى جۇمىس ىستەيدى.
ال قايىرىمدىلىق كومەك كورسەتۋگە دەمەۋشىلەر, مەتسەناتتارمەن قاتار مەملەكەتتىك قۇرىلىمداردى تارتۋ جۇمىستارى ىسكە اسۋدا. بالالارعا مەكتەپكە دايىندالۋعا كومەك كورسەتۋگە تىلەك بىلدىرۋشىلەر تۇرعىلىقتى جەرى بويىنشا اۋداندىق ءبىلىم بولىمدەرىنە نەمەسە تىكەلەي ءبىلىم بەرۋ ۇيىمىنا حابارلاسا الادى.
جەدەل جەلىگە قاتىستى اقپاراتتار الماتى قالاسى ءبىلىم باسقارماسىنىڭ سايتىندا كورسەتىلگەن. ل.جىلقىباەۆانىڭ ايتۋىنشا, 1 قىركۇيەكتەن باستاپ مەملەكەتتىك مەكتەپتەردە ءبىلىم الاتىن 1-4-سىنىپ وقۋشىلارىن تەگىن تاماقتاندىرۋعا بايلانىستى ازىرلىك جۇرۋدە. سونىمەن قاتار وقۋشىلار قايتارىمدى نەگىزدە وقۋلىقتارمەن قامتىلاتىن بولادى.
الماتى