الماتى قالاسىنىڭ اكىمدىگى بيىل ءۇش اۋىسىمدى مەكتەپتەر ماسەلەسىن تولىعىمەن جويىپ, بالالاردىڭ زاماناۋي مەكتەپتەردە ءبىلىم الۋىنا جاعداي جاساپ وتىر. وسى ورايدا الداعى جىلدىڭ سوڭىنا دەيىن 14 245 وقۋشى ورنىنا ەسەپتەلگەن 22 مەكتەپ پايدالانۋعا بەرىلەتىن بولادى.
بۇل جايىندا بيىلعا ارنالعان جەرگىلىكتى بيۋدجەتتى ناقتىلاۋ بويىنشا وتكەن قالا ءماسليحاتىنىڭ XVI سەسسياسىندا قالا اكىمى ەربولات دوساەۆ مالىمدەدى. مەگاپوليس باسشىسىنىڭ ايتۋىنشا, ءبىلىم بەرۋ سالاسىنا 275,2 ملرد تەڭگە قاراستىرىلعان (جەرگىلىكتى بيۋدجەتتەن – 196,2 ملرد, رەسپۋبليكالىق بيۋدجەتتەن – 79 ملرد). بيۋدجەتتى ناقتىلاۋ اياسىندا قوسىمشا 9,4 ملرد تەڭگە ءبولۋ جوسپارلانىپ وتىر.
سوڭعى جىلدارى قالا تۇرعىندارىن مەگاپوليس اۋماعىنىڭ ۇلعايۋىنا بايلانىستى مەكتەپتەر مەن بالاباقشالار جەتىسپەۋشىلىگى تولعاندىرۋدا. وسى ورايدا وقۋشى ورنىنىڭ تاپشىلىعىن ازايتۋ ماقساتىندا 46 مەكتەپتىڭ قۇرىلىسى جالعاسىپ, بوستاندىق, اۋەزوۆ, المالى, جەتىسۋ اۋداندارىنداعى مەكتەپتەرگە جاپسارلاس 5 عيماراتتىڭ قۇرىلىسىن اياقتاۋعا قوسىمشا 1,8 ملرد تەڭگە قاراستىرىلىپ وتىر.
بۇگىندە بوستاندىق اۋدانىندا مەكتەپتەر مەن بالاباقشالاردىڭ قۇرىلىسى قارقىن الىپ كەلەدى. وڭىرلىك كوممۋنيكاتسيالار قىزمەتىندە اۋدان اكىمىنىڭ ورىنباسارى رەنات سەيدرامانوۆ مەكتەپتەردىڭ قۇرىلىسى مەن كەڭەيتۋ جۇمىستارىنىڭ ۇزدىكسىز ءجۇرىپ جاتقانىن جەتكىزدى. قازىردىڭ وزىندە 1 625 ورىندىق №38, 60, 199 مەكتەپتەرگە جاپسارلاس قۇرىلىستار پايدالانۋعا بەرىلىپ, 300 وقۋشىعا ارنالعان №191 مەكتەپ ماڭىنداعى قۇرىلىس اياقتالىپ قالدى. الەۋمەتتىك جاۋاپكەرشىلىك اياسىندا №146 ليتسەي عيماراتىنا قوسىمشا 300 ورىنعا ارنالعان قۇرىلىس جۇمىستارى اياقتالدى. الداعى ۋاقىتتا Bazis-ا كومپانياسى №65 جالپى ءبىلىم بەرەتىن مەكتەپكە قوسىمشا 300 ورىنعا ارنالعان قۇرىلىس جۇمىستارىن باستايتىن بولادى. سونىمەن قاتار №81 مەكتەپ-گيمنازياسى مەن № 40, 45 جالپى ءبىلىم بەرەتىن مەكتەپكە سەيسميكالىق كۇشەيتۋ, وربيتا-3 شاعىن اۋدانىنداعى № 145 مەكتەپكە كۇردەلى جوندەۋ جۇمىستارى جالعاسۋدا.
قالادا جەكەمەنشىك مەكتەپتەردىڭ اشىلۋى ورىن تاپشىلىعىن ازايتۋعا ىقپال ەتۋدە. بىلتىر اۋداندا 705 ورىندىق 6 مەكتەپ اشىلعان. RAMS City تۇرعىن ءۇي كەشەنىن سالۋ بارىسىندا 1 100 ورىندىق مەكتەپ پەن ەكى بالاباقشا سالۋ قاراستىرىلسا, № 21 گيمنازيا اۋماعىنداعى 120 ورىندى جاڭا بالاباقشا قۇرىلىسى اياقتالدى. سونداي-اق №71 بالاباقشا عيماراتىن كۇردەلى جوندەۋمەن قاتار سەيسميكالىق جاعىنان كۇشەيتۋ جۇمىستارى دا اياقتالدى. ناۋاي كوشەسىندە ورنالاسقان, اشىلۋى بيىل 1 قىركۇيەكتە جوسپارلانىپ وتىرعان № 113 بالاباقشا عيماراتىنا كۇردەلى جوندەۋ جۇمىستارى جۇرگىزىلۋدە. اۋداندا سونىمەن قاتار دەنساۋلىق ساقتاۋ نىساندارىنىڭ قۇرىلىسىن نىعايتۋ دا باسىمدىققا يە. اۋدان اكىمى ورىنباسارىنىڭ ايتۋىنشا, «بالالارعا جەدەل مەديتسينالىق كومەك كورسەتۋ ورتالىعىنىڭ» وپەراتسيالىق بلوگى بار قابىلداۋ بولىمشەسى كورپۋسىنىڭ قۇرىلىسى جالعاسۋدا. عيماراتتى كەلەسى جىلدىڭ ءساۋىر ايىندا اياقتاۋ جوسپاردا تۇر.
ال ناۋرىزباي اۋدانىنىڭ اكىمى سانجار توعاي اتاپ وتكەن دەرەكتەرگە توقتالساق, اۋداندا حالىق سانى ارتىپ كەلەدى. وسىعان وراي الەۋمەتتىك نىساندارعا دا سۇرانىس ارتىپ وتىر. بۇگىندە شاعىن اۋداندا تۇرعىن ءۇي قۇرىلىسى قارقىندى بوي كوتەرىپ, وقۋشى ورىندارىنىڭ تاپشىلىعى ماسەلەسىن شەشۋ باعىتىنداعى جۇمىستار جۇيەلى ىسكە اسۋدا. 2 700 ورىندى ءۇش مەكتەپتىڭ قۇرىلىسى قارقىندى جۇرۋدە. ونىڭ قاتارىندا «قالقامان» شاعىن اۋدانىنداعى 1 500 ورىندى جانە «شۇعىلا» شاعىن اۋدانىندا ورنالاسقان ارقايسىسى 1 200 ورىندى ەكى مەكتەپ بار.
بيىل «قالقامان» شاعىن اۋدانىندا 1 800 ورىندى مەكتەپ جانە «اقجار» مەن «تاۋسامالى» شاعىن اۋداندارىندا ارقايسىسى 120 ورىندى 2 بالاباقشا پايدالانۋعا بەرىلەدى. ال «اقجار» جانە «راحات» شاعىن اۋداندارىندا 2 جەكەمەنشىك مەكتەپ اشىلدى. زاماناۋي جابدىقتارمەن جابدىقتالعان «زامان» جەكەمەنشىك مەكتەبىنىڭ قۇرىلىسى اياقتالدى. سانجار توعاي اتاپ وتكەندەي, بۇگىندە اۋداندا 100 جەكەمەنشىك بالاباقشا مەن 5 مەملەكەتتىك بالاباقشا جۇمىس ىستەيدى. الايدا بۇل نىساندارداعى ورىن دا جەتكىلىكسىز بولىپ وتىر. سوندىقتان قۇرامىس جانە شۇعىلا شاعىن اۋداندارىندا ەكى مەملەكەتتىك بالاباقشانىڭ قۇرىلىسىن باستاۋ جوسپارلاندى.
الماتى