وتان قورعاۋ – قاسيەتتى بورىش

7 مامىر – وتان قورعاۋشى كۇنى

ءمىنسىز قىزمەت مەملەكەت مەرەيىن وسىرەدى

كەشە, وتان قورعاۋشى كۇنى قارساڭىندا مەملەكەت باسشىسى نۇرسۇلتان نازارباەۆتىڭ جارلىعىمەن اسكەري جانە قىزمەتتىك بورىشىن اتقارۋ كەزىندە باتىلدىق پەن جانقيارلىق كورسەتكەن ءبىر توپ اسكەري قىزمەتشىلەر, قۇقىق قورعاۋ جانە ۇلتتىق قاۋىپسىزدىك ورگاندارى قىزمەتكەرلەرى قازاقستان رەسپۋبليكاسىنىڭ مەملەكەتتىك ناگرادالارىمەن ماراپاتتالدى. ناگرادالاردى تاپسىرۋ سالتاناتىنا ەل پرەزيدەنتىنىڭ ءوزى قاتىستى. سالتاناتتى ءراسىم كەزىندە پرە­زيدەنت: «بۇگىن ەلىمىزدىڭ قارۋ­لى كۇشتەرىنىڭ مەملەكەتتىك مەرە­كەسى قارساڭىندا مەملەكەت باسشىسى, قارۋلى كۇشتەردىڭ جوعارعى باس قولباس­شىسى رەتىندە مەن سىزدەردى جوعارى مەملەكەتتىك ناگرادالارمەن ماراپاتتاۋعا شاقىرىپ وتىرمىن. بۇل – مەملەكەتتىڭ وتان الدىنداعى ءمىنسىز قىزمەتتەرىڭىزدى باعالاعانى. ءبىزدىڭ حالقىمىز بەينەتتىڭ دە زەينەتى بار دەيدى. سىزدەردىڭ ەڭبەكتەرىڭىز جاندى. مەملەكەت مىنە, سول قاجىرلى ەڭبەكتەرىڭىزدى باعالاپ وتىر. وزدەرىڭىزگە وردەندەر مەن مەدالدار تاپسىرۋ ارقىلى مەملەكەت سىزدەرگە ءوزىنىڭ ريزاشىلىعىن جانە باعاسىن بەرەدى. ارينە, سىزدەر تەك قانا ماراپات ءۇشىن قىزمەت ەتپەيتىندەرىڭىزدى بىلەمىز. دەگەنمەن, ەڭبەكتەرىڭىز ەلەنۋ كەرەك. سىزدەر ەلدىڭ تاۋەلسىزدىگىن, ازاماتتاردىڭ بەيبىت ءومىرى مەن تىنىشتىعىن قورعاپ جۇرسىزدەر. ءبىز وزدەرىڭىزگە قاراپ, قازاقستاننىڭ جارقىن بولاشاعىنا سەنەمىز. اتقارعان ەڭبەكتەرىڭىزبەن, ءجۇرىس-تۇرىستارىڭىزبەن جاستارعا ۇلگى بولىپ, اسكەري جانە قىزمەتتىك پارىزدى ابىرويمەن اتقارىپ, وتانعا قالتقىسىز قىزمەت ەتىپ كەلەسىزدەر. سول ءۇشىن بارشا قازاقستان حالقى اتىنان ريزاشىلىعىمىزدى ءبىل­دىرەمىز», دەدى. وسىلاي دەي كەلە, ەلباسى مەملەكەت مۇددەسىن بيىك قويىپ, اسقاق مۇراتتارعا ادال ەڭبەك ەتۋ – ءاربىر پاتريوتتىڭ ءىسى ەكەنىن جەتكىزدى جانە قازاق حالقىنىڭ وتكەندى ونەگە, بۇگىندى قاستەر تۇتاتىن, ەر­تەڭ­گى كۇنگە ۇمىتپەن قارايتىن حا­لىق ەكەنىنە, دەمەك, اسىل ارماندى قا­جىر­لى ەڭبەك, باتىل ارەكەت ار­قى­لى جۇزەگە اسىراتىنىنا توق­تالدى. سونداي-اق, قازاقستان پرەزي­دەنتى ءوزىنىڭ سوزىندە ماراپاتتالعان اسكەريلەر مەن قۇقىق قورعاۋ ورگاندارى قىزمەتكەرلەرى اراسىندا ءوز ومىرلەرىن قاتەرگە تىگىپ, ادامداردى قۇتقارىپ قالعان ازاماتتار بار ەكەنىن دە ايتىپ ءوتتى. «سىزدەر تەك ءوز قىزمەتتەرىڭىزدى عانا ەمەس, ازاماتتىق بورىشتارىڭىزدى دا ابىرويمەن اتقاردىڭىزدار, جاستارعا ۇلگى بولدىڭىزدار. ومىردە ەرلىككە ءاردايىم ورىن بار ەكەنىن دالەلدەدىڭىزدەر. ارالارىڭىزدا كۇش-قۋاتى مەن ۋاقىتىن اياماستان ءوز قىزمەتىندە ۇدايى ۇزدىك ناتيجە كورسەتە وتىرىپ, ۇزاق جىلدار قاجىرلى ەڭبەك ەتىپ كەلە جاتقاندار دا بار. وتانعا قالتقىسىز قىزمەت – ازاماتتىق ەرلىك پەن جانقيارلىلىقتىڭ شىنايى كورىنىسى. بارشاڭىز ەلىكتەۋگە, ۇلگى الۋعا لايىقتىسىزدار, سىزدەرگە قاراپ جاستار بوي تۇزەيدى. سىزدەردىڭ ىستەرىڭىز – ءوز حالقىن ءسۇيۋدىڭ جانە وعان ادال بولۋدىڭ ۇزدىك ۇلگىسى», – دەدى بۇل ورايدا نۇرسۇلتان نازارباەۆ. سالتاناتتى ءراسىم كەزىندە مەم­لەكەت باسشىسى بولاشاقتا مارا­پات العاندارعا زور جاۋاپكەر­شىلىك جۇكتەلەتىنىن, ولار ازامات­تارى­مىزدىڭ بەيبىت ءومىرىن قورعاي ءجۇرىپ, وسكەلەڭ بۋىنعا ۇلگى بو­لۋعا ءتيىس ەكەنىن دە ايتتى. سونى­مەن, بۇل كۇنى قورعانىس, ىشكى ىستەر جانە توتەنشە جاعدايلار مي­نيسترلىكتەرى, ۇلتتىق قاۋىپسىزدىك كوميتەتى, مەملەكەتتىك كۇزەت قىزمەتى, «سىربار» سىرتقى بارلاۋ قىزمەتى, ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى (قارجى پوليتسياسى), باس پروكۋراتۋرا جانە «قازاقستاننىڭ ىشكى ىستەر ورگاندارى مەن ىشكى اسكەرلەرى ارداگەرلەرىنىڭ ۇيىمى» قوعامدىق بىرلەستىگىنىڭ ۇسىنىستارى بويىنشا بارلىعى 60 ادام ءتۇرلى ماراپاتقا يە بولدى. ماسەلەن, اسكەري جانە قىز­مەتتىك بورىشىن ۇلگىلى اتقارعانى, ەلدىڭ ۇلتتىق قاۋىپسىزدىگى مەن قورعانىس قابىلەتىن نىعايتۋدا كورسەتكەن ەرلىگى, قاجىرلىلىعى ءۇشىن ماراپاتتالعان ازاماتتار ىشىندە ءىى دارەجەلى «داڭق» ور­دە­نىمەن 8 ادام, ءىى دارەجەلى «ايبىن» وردەنىمەن – 14, ءىىى دارەجەلى «ايبىن» وردەنىمەن – 7, «قۇرمەت» وردەنىمەن – 2, «ەرلىگى ءۇشىن» مەدالىمەن – 8, «جاۋىنگەرلىك ەر­لىگى ءۇشىن» مەدالىمەن – 18, «ەرەن ەڭبەگi ءۇشiن» مەدالىمەن 1 ادام ماراپاتتالىپ, قازاقستان رەس­پۋبليكاسىنىڭ قۇرمەت گراموتاسىمەن 2 ادام اتاپ ءوتىلدى. ال سالتاناتتى ءراسىم بارىسىندا ءىى دارەجەلى «داڭق» وردەنىمەن ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى (قارجى پوليتسيا­سى) توراعاسىنىڭ ورىنباسارى ما­رات احمەتجانوۆ, ىشكى ىستەر مي­نيسترلىگى قىلمىستىق-اتقارۋ جۇيەسى كوميتەتىنىڭ توراعاسى باۋىر­جان بەردالين, قورعانىس مي­نيسترلىگى 68665-اسكەري ءبولىمىنىڭ كومانديرى الماز دجۋماكەەۆ, اقمولا وبلىسىنىڭ پروكۋرورى مۇراتبەك ءيسادىلوۆ, توتەنشە جاع­دايلار مينيسترلىگىنىڭ اس­تانا قالاسى بويىنشا توتەنشە جاعدايلار دەپارتامەنتىنىڭ باس­تىعى مەيرام ىسقاقوۆ جانە قازاقستان قارۋلى كۇشتەرى اۋە قورعانىسى كۇشتەرىنىڭ باس قول­باسشىسى نۇرلان ورمانبەتوۆ ماراپاتتالدى. ءىى دارەجەلى «ايبىن» وردەنىمەن مەملەكەتتىك كۇزەت قىزمەتى باس­تىعى اپپاراتىنىڭ باسقارما باس­تىعى راۋشان جامبىلوۆا, ۇلتتىق قاۋىپسىزدىك كوميتەتى دەپارتامەنت باستىعىنىڭ ءبىرىنشى ورىنباسارى سەرگەي كليمچۋك, قورعانىس مينيسترلىگى 14776-اسكەري ءبولىمى كومانديرىنىڭ ورىنباسارى – ءبولىم ورتالىعىنىڭ باستىعى ارىستان مۇ­قاتاەۆ, ۇلتتىق قاۋىپسىزدىك كو­­مي­تەتى شەكارا قىزمەتى جەكە اۆيا­­تسيالىق ەسكادريلياسىنىڭ كو­مانديرى ەربولات سماعۇلوۆ ماراپاتتالدى. ءىىى دارەجەلى «ايبىن» وردە­نىمەن ىشكى ىستەر مينيسترلىگى ءىش­كى اسكەرلەر «وڭتۇستىك» وڭىرلىك قول­باسشىلىعى 7552-اسكەري ءبولى­مى اتقىشتار باتالونىنىڭ ءبو­لىمشە كومانديرى جاندوس بايان­باەۆ, قورعانىس مينيسترلىگى 53898-اسكەري ءبولىمى اۆياتسيالىق ەس­كادريلياسىنىڭ (جەڭىل رەاكتيۆتى ۇشاقتار) اعا اۆياتسيا مەحانيگى باتىرجان موينوۆ, توتەنشە جاع­دايلار مينيسترلىگى اقمولا وب­لىسى توتەنشە جاعدايلار دە­پار­تامەنتى «ءورت ءسوندىرۋ جانە اپاتتىق-قۇتقارۋ جۇمىستارى قىزمەتى» مم كوكشەتاۋ قالاسى №1 مامانداندىرىلعان ءورت ءسون­دىرۋ ءبولىمىنىڭ جۇرگىزۋشىسى يۋري نوۆوسەلتسەۆ, 0112-اسكەري ءبو­لىمىنىڭ بولىمشە كومانديرى عالىمجان تويشىباەۆ ناگرادتالدى. «ەرلىگى ءۇشىن» مەدالىمەن قورعانىس مينيسترلىگى 64471-ءاس­كەري ءبولىمىنىڭ اعا وفيتسەرى ول­جاس باۋكەن, توتەنشە جاعدايلار مي­نيسترلىگى قاراعاندى وبلىسى توتەنشە جاعدايلار دەپارتامەنتى «ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى» مم ءورت ءسوندىرۋ كەزەكشى قىزمەتى جەتەكشىسىنىڭ كومەكشىسى ماقسات دۇيسەنباەۆ, پاۆلودار وبلىسى ىشكى ىستەر دەپارتامەنتى پاۆلودار قالاسى ىشكى ىستەر باسقارماسى جول-پاترۋلدىك پوليتسيا باتالونىنىڭ ۆزۆود كومانديرىنىڭ ورىنباسارى ەسەن نۇرعاليەۆ, ال «جاۋىنگەرلىك ەرلىگى ءۇشىن» مەدالىمەن قورعانىس مينيسترلىگى 74884-اسكەري ءبولى­مىنىڭ كومانديرى ارمان اسان­باي, قورعانىس مينيسترلىگى 65229-اسكەري ءبولىمى اۆياتسيالىق ەس­كادريلياسى (اسكەري-كولىكتىك اۆيا­تسيا) كومانديرىنىڭ ورىنباسارى دميتري گروتس, ۇلتتىق قاۋىپسىزدىك كوميتەتى قوستاناي وبلىسى بويىنشا دەپارتامەنتىنىڭ باسقارما باستىعى يۋري ەۆدوكيموۆ ماراپاتتالدى. ماراپاتقا يە بولعان ازاماتتار ءوز كەزەگىندە قازاقستان پرە­زيدەنتىنە جوعارى سەنىمى مەن قولداۋى ءۇشىن العىستارىن ءبىلدىردى. سونداي-اق, ەلىمىزگە قالتقىسىز قىز­مەت ەتۋگە, كاسىبي دەڭگەيى مەن شەبەرلىكتەرىن ارتتىرۋعا, مەم­لەكەتتىڭ ەگەمەندىگى مەن قازاق­ستاننىڭ بەيبىت اسپانىن قورعاۋعا ارقاشان ءازىر ەكەندىكتەرىن جەت­­كىزدى. ماسەلەن, قورعانىس مي­نيسترلىگى 68665-اسكەري ءبولىمىنىڭ كومانديرى الماز دجۋماكەەۆ وزدەرىنە كورسەتىلگەن سەنىم ءۇشىن ەلباسىنا العىسىن بىلدىرە وتىرىپ, مەملەكەت پەن ونىڭ حالىق ءۇشىن جانقيارلىقپەن ەڭبەك ەتە­تىندىكتەرىن جەتكىزدى. ال قازاق­ستاننىڭ قارۋلى كۇشتەرى اۋە قورعانىسى كۇشتەرىنىڭ باس قول­باسشىسى نۇرلان ورمانبەتوۆ ەلباسىنا قاراتا ايتقان سوزىندە: «ءسىزدىڭ قولىڭىزدان جوعارى مەم­لەكەتتىك ماراپاتتى الۋ – مەن ءۇشىن ۇلكەن ابىروي. ءبىز, اۋە قورعانىسى كۇشتەرىنىڭ جەكە قۇرامى ءسىزدىڭ ارتقان سەنىمىڭىزدى اقتايمىز», دەسە, ىشكى ىستەر مينيسترلىگى ىشكى اسكەرلەر «وڭتۇستىك» وڭىرلىك قولباسشىلىعى 7552-اسكەري ءبولىمى اتقىشتار باتالونىنىڭ بولىمشە كومانديرى جاندوس بايانباەۆ وتانعا قالتقىسىز قىزمەت ەتۋگە ءار ۋاقىتتا دايىن ەكەندىكتەرىن جەتكىزدى. ءلايلا ەدىلقىزى, «ەگەمەن قازاقستان».