تامىزداعى ۇبت شەكتى بالل جيناي الماعان تالاپكەرلەردىڭ تەستىلەۋدەن قايتا ءوتىپ, جوعارى وقۋ ورنىنا اقىلى نەگىزدە تۇسۋگە مۇمكىندىك بەرۋ ءۇشىن وتكىزىلەدى, دەپ حابارلايدى Egemen.kz.
ۇبت-نىڭ بۇل كەزەڭىنە 20 مىڭنان استام ءوتىنىش تۇسكەن.
«شەكتى بالل جيناي الماعان تالاپكەرلەردىڭ اقىلى بولىمگە ءتۇسۋ مۇمكىندىگى بولۋى ءۇشىن تامىز ايىندا قايتا تەستىلەۋدەن وتۋگە جاعداي جاسادىق. وقۋعا ءتۇسۋ ءۇشىن شەكتى بالل جانە ءار پاننەن كەمىندە 5 بالل جيناۋ قاجەت. نەگىزگى ۇبت-عا قاتىسقان تالاپكەرلەر بەيىندىك پاندەر كومبيناتسياسىن تامىز تەستىلەۋىندە وزگەرتىپ, تەستىلەۋگە قاتىسا الاتىندىعىن ايتا كەتكەن ءجون», دەدى قر عجب ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.
ۇبت-نىڭ بۇل كەزەڭىنە بيىلعى جانە وتكەن جىلداردىڭ مەكتەپ تۇلەكتەرى, كوللەدج تۇلەكتەرى مەن شەتەلدىك مەكتەپتەردە ءبىلىم العاندار قاتىسا الادى.
سونىمەن قاتار, جوعارى وقۋ ورنىنا اقىلى نەگىزدە ءوز ماماندىعى بويىنشا وقۋدى جالعاستىرۋدى جوسپارلاپ وتىرعان كوللەدج تۇلەكتەرى وقۋعا اڭگىمەلەسۋ قورىتىندىسى بويىنشا قابىلدانادى.
نەگىزگى ۇبت سەكىلدى تامىزداعى تەستىلەۋ ەلەكتروندى فورماتتا 10-13 تامىز ارالىعىندا وتەدى. تىركەلۋ كەزىندە تەستىلەۋگە قاتىسۋشىلار ەمتيحان وتكىزىلەتىن ورىندى, كۇندى جانە ۋاقىتتى وزدەرى تاڭدادى. ال, تىركەۋ 25-30 شىلدە ارالىعىندا مينيسترلىككە قاراستى ۇلتتىق تەستىلەۋ ورتالىعىنىڭ app.testcenter.kz سايتىندا جۇرگىزىلدى.