استانا. 6 مامىر. بۇگىن قازاقستاننىڭ 6 قالاسىندا پرەمەر-ليگا چەمپيوناتى 10-تۋرىنىڭ ويىندارى وينالدى. تۋر مۇنىڭ الدىنداعىلارعا قاراعاندا, سوعىلعان گولعا باي بولدى. بۇل تۋرالى egemen.kz ءتىلشىسى حابارلادى.
ەڭ ءىرى ەسەپ استانادا تىركەلدى. جەرگىلىكتى كوماندا سەمەيدىڭ «سپارتاگى» قاقپاسىنا جاۋاپسىز بەس گول سوقتى. وسى جەڭىلىس قوناقتاردىڭ باس جاتتىقتىرۋشىسى الماس قۇلشىنباەۆتىڭ ايتىلىپ جۇرگەن وتستاۆكاسىنىڭ ۋاقىتىن جاقىنداتىپ جىبەرگەن سياقتى. وتكەن جىلى ونىمەن بىرگە قاسكەلەڭنىڭ «سۇڭقارىن» جاتتىقتىرعان بەلگىلى مامان ۆلاديمير گۋليامحايداروۆ سەمەيلىكتەردى جوعارى ەشالوندا ساقتاپ قالۋدىڭ بىردەن-ءبىر دۇرىس جولى وسى باس جاتتىقتىرۋشىنى نەعۇرلىم تەزىرەك ورنىنان بوساتىپ, تىزگىندى تاجىريبەلى مامانعا بەرۋ ەكەنىن اشىپ ايتقان ەدى.
اتالمىش ماتچتىڭ ءبىرىنشى تايمى 1:0 ەسەبىمەن اياقتالدى. ەسەپتى شابۋىلشى تاڭات نوسەرباەۆ 14-مينۋتتا اشتى. ەكىنشى تايمدا (51-مينۋت) تاڭات ەسەپتى ەسەلەدى. بۇدان كەيىن ۆيكتور دميتريەنكو (71-مينۋت) مەن فوكسي كەتەۆواما (76-مينۋت) بىرىنەن كەيىن ءبىرى گول سالىپ, كوماندانىڭ باسىمدىلىعىن ارتتىرا ءتۇستى. ال ەڭ سوڭىنان سيسەرو (90-مينۋت) سوڭعى نۇكتەنى قويدى.
تۋردا 2:0 دەگەن ەسەپ ءۇش رەت قايتالاندى. ولاردىڭ ەكەۋىندە الاڭ يەلەرى باسىم تۇسسە, بىرەۋىندە قوناقتاردىڭ مەرەيلەرى ۇستەم بولدى. سول سىرت الاڭنىڭ وزىندە قارقىندى ويىن تانىتقان كوماندا «اقتوبە» بولدى. ول قوستانايدا جەرگىلىكتى «توبىلدى» تىزە بۇكتىردى. ەكى جاساقتىڭ كوپتەن كۇتكەن كەزدەسۋلەرى الاڭ يەلەرىنىڭ جاڭا جاتتىقتىرۋشىسى ۆاردان ميناسياننىڭ ءبىرىنشى ساتسىزدىگىن ايگىلەدى. قوناقتار ويىننىڭ باسىنان سوڭىنا دەيىن دوپقا ەگەلىك ەتتى. ولار ءجيى شابۋىلعا شىعىپ تۇردى. سونداي جورىقتاردىڭ بىرىندە دانيلو نەكونىڭ وڭ قاپتالدان جونەلتكەن سوققىسى قاقپادان ءبىر-اق تابىلدى. بۇل جەتىستىكتى ەكىنشى كەزەڭدە تيمۋر كاپادزە ۇلعايتىپ بەردى.
بيىل قۇرىلعانىنا 60 جىل تولاتىن الماتىنىڭ «قايراتى» قازاقستاننىڭ وزىنەن كەيىنگى بايىرعى كومانداسى – قاراعاندىنىڭ «شاحتەرىنەن» ايلاسىن اسىرا ءبىلدى. الماتىلىقتار تەز ەسەپ اشۋدىڭ ارقاسىندا جاعدايلارىن ءبىراز جەڭىلدەتىپ الدى. داربازانى يوسيپ كنەجەۆيچ 9-مينۋتتا باعىندىردى. ال ەكىنشى تايمدا ۆيكتور كۋمىكوۆ الاڭعا اندرەي فينونچەنكو مەن ۆياچەسلاۆ ءلۋنيندى شىعاردى. بۇل الماسۋشىلىق كەنشىلەردىڭ قۇرامىن كۇشەيتتى. بىراق قاراعاندىلىقتار بۇدان ناتيجە شىعارا المادى. ەسەسىنە, الماتىلىقتار مومودۋ سيسەيدىڭ كۇشىمەن تاعى ءبىر گولعا قول جەتكىزدى.
ەستوننىڭ تارمو ريۋيۋتلي ەسىمدى مامانى بيىلعى كوكتەمدە عانا قابىلداپ العان پاۆلوداردىڭ «ەرتىسى» سوڭعى ءتورت تۋردا جەڭىلىسكە ۇشىرادى. وسىدان كەيىن كلۋب باسشىلىعى جاڭا جاتتىقتىرۋشىمەن قوشتاسۋعا ءماجبۇر بولدى. ءبىر قىزىعى, وسىدان كەيىن كوماندا شابۋىلدا ناتيجەلى ويناي باستادى. پاۆلودارلىقتاردىڭ بۇگىن ءوز الاڭىندا «تارازبەن» ويىنى بارىسى وسىنى انىق بايقاتتى. ءبىرىنشى دوپتى 19-مينۋتتا كونستانتين دۋدچەنكو ءوز ەسەبىنە جازدى. ال ۇلىقبەك باكاەۆ 72-مينۋتتا ەسەپتى ءوسىردى.
تاعى ءبىر جەڭىستى قىزىلوردانىڭ «قايسارى» اتىراۋ قالاسى كوماندامەن ويىندا تارتىپ الدى. ولاي دەيتىنىمىز, مەيماندار ءبىرىنشى بولىپ قاقپا قۇلپىن اشتى (دميتري پارحاچەۆ, 12-مينۋت). سىربويىلىقتار ەسەپتى تەك ەكىنشى تايمدا عانا تەڭەستىردى (ميليان يابلان, 56-مينۋت). ال 80-مينۋتتا ريمو حۋنت سوققان گول الاڭ يەلەرىنىڭ جەڭىسىن ايعاقتادى.
تۋردا جالعىز تەڭ ويىن شىمكەنتتى جەرگىلىكتى «ورداباسى» مەن تالدىقورعاننىڭ «جەتىسۋى» اراسىنداعى كەزدەسۋدە ورىن الدى. مۇندا دا قوناقتار ءبىرىنشى بولىپ گول سوعۋ قۇرمەتىنە يە بولدى (كونستانتين زارەچنىي, 31-مينۋت). ال شىم قالا جىگىتتەرى 45-مينۋتتا ەسەپتى پەنالتيدەن تەڭەستىردى (ازات نۇرعاليەۆ). راس, بۇدان كەيىن زارەچنىي دا 11 مەترلىك ايىپ دوبىن ۇرۋ كەزەگىنە جەتتى. بىراق ويىننىڭ 69-مينۋتىندا تىركەلگەن بۇل جاعدايدا الاڭ يەلەرىنىڭ قاقپاشىسى شەبەرلىك تانىتىپ, قاقپاسىن كولدەنەڭ دوپتان ساقتاپ قالدى.
توپ باسىندا ءالى دە «اقتوبە» كەلەدى. ونىڭ 23 ۇپايى بار. ال مەرگەن شابۋىلشىلار كوشىن «ورداباسى» كومانداسىنىڭ فورۆاردى ەدين يۋنۋزوۆيچ 4 دوپپەن باستاپ تۇر.
دامير قوجامقۇل.
دەرەككوز: egemen.kz.
فوتو: sports.kz.