ديقاننىڭ بەلى بۇگىلدى. سوقا ارباعا جەگىلدى. العاشقى ءدان ەگىلدى. القاپقا تۇقىم سەبىلدى. تامشىلاپ تەر توگىلدى. قىزۋ جۇمىس, تىنىمسىز تىرلىك كورىندى. بىلەك سىبانىپ كىرىستى, الماققا مول جيىن-تەرىندى. سونىمەن, قىزىلوردا وبلىسىنىڭ ديقاندارى كۇرىش ەگۋدى باستادى. بيىل 76,6 مىڭ گەكتار جەرگە سىر سالىسىن ەگۋ جوسپارلانعان. قازىرگى تاڭدا سونىڭ 3 مىڭ گەكتارعا جۋىعى ەگىلدى. وبلىس اكىمى قىرىمبەك كوشەرباەۆ سىرداريا اۋدانىنا بارىپ, «شاعان جەر» سەرىكتەستىگىنىڭ ەگىس القابىندا تۇقىم سەبۋ جۇمىستارىن كوردى.
جالپى, اۋىل شارۋاشىلىعى سالاسىنىڭ ماسەلەلەرى دە وسى جەردە تالقىلاندى. ايماق باسشىسى قارا جەردەن نەسىبەسىن كۇتەتىن شارۋالارمەن جۇزدەسىپ, كوكتەمگى دالا جۇمىستارىنا قاتىستى شارالاردى تالقىلادى.
بيىل وبلىس بويىنشا 160,4 مىڭ گەكتارعا ەگiس ەگۋ مەجەلەنىپ وتىر. وسى جىلدىڭ ەگىسىنە ديقاندار بىلتىر كۇزدەن دايىندىق جۇمىستارىن باستاعان-دى. كۇرىش ەگىسىنە 20,2 مىڭ توننا تۇقىم دايىندالدى. قولداعى تۇقىمنىڭ بارلىعى تەكسەرۋدەن وتكىزىلدى. شارۋالار قاجەتتى مينەرالدى تىڭايتقىشتارمەن تولىق قامتىلعان. قازىرگى تاڭدا سۋ جولدارىن تازالاۋ, گيدروتەحنيكالىق قۇرىلىستاردى جوندەۋ جانە جەردى سىڭىرە سۋارۋ مەن جايىلىمدىق جەرلەردى سۋارۋ جۇمىستارى اياقتالدى. شارۋالاردىڭ سۋعا قارىز ماسەلەسى دە ءسوز بولدى.
– بۇل ماسەلە ءبىزدىڭ نازارىمىزدا. دەگەنمەن, قارىزى بار دەپ شارۋاشىلىقتاردى سۋسىز قالدىرۋعا بولمايدى. ال بەرەشەكتەرىن بىرلەسە شەشەتىن بولامىز,– دەدى قىرىمبەك كوشەرباەۆ.
جانار-جاعارماي – ديقانداردىڭ باستى ماسەلەسى. كوكتەمگى ەگىس جۇمىستارى باستالىسىمەن سۇيىق وتىننىڭ باعاسى شارىقتاپ كەتەتىن. بۇل تۇيتكىلدىڭ ءتۇيىنى تارقاتىلدى. مۇناي وڭدەۋ زاۋىتتارىنان ديزەل وتىنىن جەتكىزۋشى 12 وپەراتور بەلگىلەندى. ولار شارۋالارعا ديزەل وتىنى ءليترىن 90 تەڭگەدەن جەتكىزىپ بەرۋدە. ايماق باسشىسى كەلىسىلگەن مەرزىمدە جاعارماي جەتكىزىپ بەرمەگەن وپەراتورلارعا قاتاڭ تالاپ قويىلاتىنىن تاعى ءبىر ەسكەرتتى. سۋبسيديانىڭ دا ۋاقتىلى تولەنۋى باقىلاۋدا بولاتىنى ايتىلدى. وتكەن جىلى كۇرىشتەن رەكوردتىق ءونىم جينالعانى ءمالىم. بيىل دا سول مەجەدەن تۇسىرمەۋ ءۇشىن بار كۇش-جىگەردى سالۋ كەرەك. ىرگەدەگى رەسەيدىڭ كراسنودار ايماعى كۇرىشتەن جاقسى ءونىم الاتىن ولكە. ءوڭىر باسشىسى كورشىلەردەن تاجىريبە الۋ كەرەكتىگىن اتاپ ءوتتى. وسى جيىنعا كراسنودار «گرۋپپا كومپاني اگروپليۋس» جشس-ءنىڭ ساتۋ ءبولىمىنىڭ ديرەكتورى ەۆگەني نيكيتەنكو ارنايى كەلىپ, وزدەرىنىڭ كۇرىش ءوسىرۋ ادىستەرىمەن ءبولىستى.
ال سىر ديقاندارى كۇرىش ەگۋ جۇمىستارىن 1 ماۋسىمعا دەيىن اياقتاۋدى جوسپارلاپ وتىر.
ەرجان بايتىلەس,
«ەگەمەن قازاقستان».
قىزىلوردا وبلىسى.