نۇر-سۇلتان قالاسىندا جوعارى وقۋ ورىندارىنا تۇسكىسى كەلەتىن الەۋمەتتىك وسال توپتاردان شىققان تالاپكەرلەرگە وقۋ اقىسىن تولەۋ تۇرىندە الەۋمەتتىك كومەك بەرۋ باعدارلاماسى قاراستىرىلىپ جاتىر. بۇل تۋرالى قالا اكىمى التاي كولگىنوۆ ءوزىنىڭ Instagram-داعى پاراقشاسىندا مالىمدەدى.
ء«بىلىم الۋ جانە تۇلەكتەردىڭ ودان ءارى جۇمىسقا ورنالاسۋى ءۇشىن جاعداي جاساۋدىڭ ماڭىزى وتە زور. ماسەلەن, جاڭا وقۋ جىلىندا پەداگوگيكالىق جانە مەديتسينالىق ماماندىقتار بويىنشا جوعارى ءبىلىم الۋعا 1 300-گە جۋىق گرانت ءبولۋدى جوسپارلاپ وتىرمىز. بۇعان قوسا الەۋمەتتىك كومەك بويىنشا جەكە باعدارلاما قاراستىرىلعان. اتالعان الەۋمەتتىك كومەكتى جاعدايى تومەن وتباسىلاردان شىققان تالاپكەرلەرگە قالا ۋنيۆەرسيتەتتەرىندە ءبىلىم الۋى ءۇشىن وقۋ اقىسىن تولەۋ تۇرىندە كورسەتەمىز. بۇل باعدارلاما بويىنشا قۇجاتتاردى قابىلداۋ 21 تامىزعا دەيىن (قوسا العاندا) جالعاسادى. وقۋ اقىسىن تولەۋ تۇرىندەگى الەۋمەتتىك كومەك جەتىم بالالار, بالالار ءۇيىنىڭ تۇلەكتەرى, بالا كۇنىنەن مۇگەدەكتىگى بار, كوپبالالى وتباسىلاردان شىققان بالالار اراسىندا بولىنەدى», دەدى ا.كولگىنوۆ.
ونىڭ ايتۋىنشا, ءبىلىم الۋ ەڭبەك نارىعىندا سۇرانىسقا يە ماماندىقتار بويىنشا جۇرگىزىلەدى: بيوتەحنولوگيا, ەسەپتەۋ تەحنيكاسى جانە باعدارلامالىق قامتاماسىز ەتۋ, گەودەزيا جانە كارتوگرافيا (web-كارتوگرافيا), ساۋلەت (BIM-مەنەدجەر جوبالاۋشى), مەكتەپكە دەيىنگى وقىتۋ, جەرگە ورنالاستىرۋ-اگروينجەنەريا, ينجەنەر, جالپى مەديتسينا, پەداگوگيكا, IT مامانى, الەۋمەتتىك جۇمىس, جىلۋ ەنەرگەتيكاسى, ازىق-تۇلىك ونىمدەرىنىڭ تەحنولوگياسى, ەلەكتر ەنەرگەتيكاسى جانە ت.ب.
قالانىڭ جوعارى وقۋ ورىندارىندا وقۋ اقىسىن تولەۋ تۇرىندە الەۋمەتتىك كومەك الۋ ءۇشىن جۇمىسپەن قامتۋ جانە الەۋمەتتىك قورعاۋ باسقارماسىنا (بەيبىتشىلىك كوشەسى, 9) حابارلاسۋ كەرەك نەمەسە قۇجاتتاردى ەلەكتروندى تۇردە egov.kz ۆەب-پورتالىنداعى «ەلەكتروندىق ءوتىنىش» ءبولىمى ارقىلى تاپسىرۋ قاجەت.
الەۋمەتتىك كومەك وتباسىنىڭ ءبىر مۇشەسى ءۇشىن 4 ەڭ تومەنگى كۇنكورىس دەڭگەيى مولشەرىنەن (190 088 تەڭگە) اسپايتىن, جان باسىنا شاققانداعى ورتاشا تابىسى بولعان كەزدە اقشالاي تولەم تۇرىندە تاعايىندالادى.