وزبەكستان كونستيتۋتسياسىنا تۇزەتۋلەر ەنگىزۋ بويىنشا حالىق تالقىلاۋى اياقتالدى

1 تامىزدا ساعات 00:00-دە وزبەكستان كونستيتۋتسياسىنا تۇزەتۋلەردى بۇكىلحالىقتىق تالقىلاۋ اياقتالدى. ول 25 ماۋسىمنان باستاپ جۇرگىزىلدى.

الدىمەن تالقىلاۋعا 10 كۇن ءبولىندى. سودان كەيىن دەپۋتاتتار تاعى 10 كۇن قوستى. كەيىننەن تالقىلاۋدى تاعى 15 كۇنگە ۇزارتۋ تۋرالى شەشىم قابىلداندى.

رەفورما جونىندەگى كونستيتۋتسيالىق كوميسسيا حابارلاعانداي, زاڭ شىعارۋ پالاتاسىنىڭ جاۋاپتى كوميتەتتەرى ۇسىنىستاردى قورىتۋ جانە تالداۋ, سونداي-اق زاڭ جوباسىن پىسىقتاۋ جۇمىستارىن جالعاستىرادى.

بۇل پروتسەستىڭ قانشالىقتى اشىق بولاتىنى بەلگىسىز. كوميسسيا «تۇزەتۋلەردىڭ قاينار كوزى - حالىق» دەپ ۇنەمى ايتىپ وتىرعانىنا قاراماستان, تۇزەتۋلەردىڭ باستاپقى جوباسىنا ەنگىزىلگەن بىرقاتار وزگەرىس وزبەكستاندىقتار ءۇشىن كۇتپەگەن جاعداي بولدى. زاڭ جوباسىن دا, بۇكىلحالىقتىق تالقىلاۋدى ۇزارتۋ بويىنشا شەشىمدەردى دە دەپۋتاتتار ءبىراۋىزدان قابىلدادى.

تۇزەتۋلەر جوباسىن كونستيتۋتسيالىق كوميسسيا ءبىر اي ىشىندە ازىرلەدى. كوميسسيا باسشىسى اكمال سايدوۆ سول كەزدە «كونستيتۋتسيالىق رەفورمالاردى جۇرگىزۋدەگى بىرەگەي وزبەك تاجىريبەسى» تۋرالى مالىمدەپ, ونى «وزبەك نوۋ-حاۋى» دەپ اتادى.

ەسكە سالا كەتسەك, 1-2 شىلدەدە قاراقالپاقستاندا رەسپۋبليكانىڭ مارتەبەسىن وزگەرتۋ تۋرالى ۇسىنىلعان تۇزەتۋلەردەن تۋىنداعان تولقۋلاردان كەيىن قاراقالپاقستانعا قاتىستى باپتار جوبادان الىنىپ تاستالدى.

كوميسسيانىڭ مالىمەتىنشە, 30 شىلدەدەگى جاعداي بويىنشا ازاماتتار مەن ۇيىمداردان تۇزەتۋلەر تۋرالى زاڭ جوباسى بويىنشا 117,3 مىڭنان استام ۇسىنىس كەلىپ تۇسكەن.