جۇمىسقا تۇرۋعا قاجەتتى قۇجاتتار – ارناۋلى سەرۆيستە

«قىزمەتكەردىڭ جەكە ءىسى» سەرۆيسىنىڭ كومەگىمەن جۇمىس بەرۋشى جۇمىسقا تۇرۋعا تالاپتانۋشىنىڭ نەمەسە قىزمەتكەردىڭ كەلىسىمىمەن جۇمىسقا ورنالاسۋ كەزىندە قاجەتتى قۇجاتتاردىڭ ەلەكتروندى پاكەتىن سۇراي الادى, سونداي-اق قىزمەتكەردىڭ باسقا جۇمىسپەن قامتىلۋىن تەكسەرە الادى. جەكە تۇلعانىڭ دەربەس دەرەكتەرىن وڭدەۋگە كەلىسىمىن ءۇشىنشى تۇلعالارعا بەرۋ ءۇشىن تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ دەربەس دەرەكتەرگە قولجەتىمدىلىكتى باقىلاۋ سەرۆيسى ارقىلى ءموبيلدى ازاماتتار بازاسىندا تىركەلگەن قىزمەتكەردىڭ نومىرىنە SMS جولداۋ ارقىلى نەمەسە hr.enbek.kz پورتالىندا ەتسق كومەگىمەن كەلىسىمگە قول قويۋ ارقىلى جۇزەگە اسىرىلادى.

وسىلايشا, اقىسىز نەگىزدە مىناداي اقپاراتتى الۋعا بولادى: جەكە كۋالىكتەگى اقپارات; فوتوسۋرەتتەر; ءبىلىمى تۋرالى اقپارات; پسيحو-ناركولوگيالىق جانە تۋبەركۋلەز ديسپانسەرلەرىندە ەسەپتە تۇرعانى تۋرالى اقپارات; 0/75ۋ مەديتسينالىق انىقتامادان مالىمەتتەر; ەڭبەك شارتتارىن ەسەپكە الۋدىڭ بىرىڭعاي جۇيەسىنەن جۇمىس تاجىريبەسى تۋرالى اقپارات; ۆاكتسينالاۋ تۋرا­لى اقپارات.

جۇمىس بەرۋشى hr.enbek.kz ەڭبەك رەسۋرستارى پورتالى ارقىلى تاڭداۋ ءۇشىن كەز كەلگەن قولجەتىمدى تەگىن اقپاراتتى سۇراتۋعا قۇقىلى. كادرلىق قامتاماسىز ەتۋدىڭ اقپاراتتىق جۇيەلەرى بار جۇمىس بەرۋشىلەرگە Smart Bridge ارقىلى ينتەگراتسيالاۋ نەگىزىندە تەگىن قىزمەتكە قوسىلۋ مۇمكىندىگى بەرىلەدى.

اتالعان پورتالدا 2022 جىلدىڭ ماۋسىمىندا ىسكە قوسىلعان «قىزمەتكەردىڭ جەكە كابينەتى» سەرۆيسى قۇرىلدى. وندا ءوز ەڭبەك شارتتارىڭىزدى كورۋگە, جۇمىس ورنىنان انىقتامانى جۇكتەۋگە, سونداي-اق دەربەس دەرەكتەردى وڭدەۋگە كەلىسىمگە قول قويۋعا جانە بولاشاقتا قاشىقتىقتان ەلەكتروندى ەڭبەك شارتىن جاساسۋعا بولادى.

جۇمىس بەرۋشى ءۇشىن پورتالدا ەڭبەك شارتتارىن تىركەۋ, قاراۋ, تۇزەتۋلەر مەن تولىقتىرۋلار ەنگىزۋ, الەۋمەتتىك دەمالىستاردى تىركەۋ, كاسىپورىندى اۋىس­تىرۋ جانە قايتا ۇيىمداستىرۋ, جەكە ءىستى قالىپتاستىرۋ بويىنشا سەرۆيس فۋنك­تسيالارى قولجەتىمدى, سونداي-اق ءانو­نيم­دى تۇردە نەمەسە جاقىن ارادا ەڭبەك زاڭ­نا­ماسىن بۇزۋ تۋرالى تەست تاپسىرۋعا رۇقسات ەتىلەدى.