كەزىندە جاسىل قالا دەپ اتى شىققان تالدىقورعاننىڭ ءسانىن كىرگىزىپ, سالتاناتىن اسىرعان ورتالىق ساياباقتان قازاقتىڭ ءۇش ءبيى – تولە, قازىبەك, ايتەكە بابالارىمىزدىڭ مۇسىندەرى ورىن السا, دالا دانىشپاندارىنىڭ ادىلدىگىن جەتىسۋ جەرىندە جالعاستىرۋدى ءتول مىندەتىنە اينالدىرعان الماتى وبلىستىق سوتى سۋديالارىنا ارنالعان تاعى ءبىر عيمارات كۇردەلى جوندەۋدەن وتكىزىلىپ, پايدالانۋعا بەرىلدى. حالىقارالىق ستاندارتقا ساي تالاپ پەن قاجەتتىلىكتىڭ بارلىعى رەتىمەن ورىن العان دەپ اۋىز تولتىرا ايتۋعا تۇراتىن وسىناۋ يگىلىكتى ەلباسىنىڭ سارابدال ساياساتىنىڭ سوت جۇيەسىندەگى ءبىر جەمىسى دەپ تە باعالادى حالىق. ەل بۇل عيماراتتان ەندى سوتقا جۇگىنگەن تاراپتارعا ءادىل شەشىم مەن ۇكىم ءھام قاۋلى شىعاتىنىنا ءۇمىت ارتادى. ويتكەنى, دامىعان ەلدەردىڭ بارلىعىندا اۋەلى قىزمەتكەردىڭ جۇمىس ىستەۋىنە جاعداي جاسالادى. سوسىن بارىپ تالاپ قويىلاتىنى بەلگىلى. بۇل وركەنيەتكە ۇمتىلعان ەلىمىزدىڭ دە ۇستانىمى بولىپ وتىر.
سونىمەن, ءدۇيىم جۇرتتىڭ الدىنا رەسپۋبليكا جوعارعى سوتىنىڭ قىلمىستىق ىستەر جونىندەگى قاداعالاۋشى سوت القاسىنىڭ توراعاسى اقىلتاي قاسىموۆ, الماتى وبلىستىق سوتىنىڭ توراعاسى مەيرامبەك تايمەردەنوۆ شىعىپ مەملەكەت باسشىسىنىڭ سوت جۇيەسىنە باسا نازار اۋدارىپ, الەمنىڭ دامىعان ەلدەرىندەگىدەي جاساپ وتىرعان جاعدايىنا ادال قىزمەت ەتۋمەن جاۋاپ بەرەتىندىكتەرىمەن ەلدى سەندىرە تۇرىپ, جەرگىلىكتى اتقارۋشى بيلىككە استانادان الىپ كەلگەن العىس حاتتارىن وقىپ, ىزگى تىلەكتەرىن ءبىلدىردى. ءوز كەزەگىندە الماتى وبلىسىنىڭ اكىمى اڭسار مۇساحانوۆ مىنبەگە كوتەرىلىپ: «ەلباسى نۇرسۇلتان نازارباەۆ سوت بيلىگىنىڭ بەدەلىن ارتتىرىپ, مارتەبەسىن كوتەرۋگە ەرەكشە ءمان بەرۋدە. اتا زاڭىمىزعا سايكەس, سوت جۇيەسى دەربەس, تاۋەلسىز بيلىك رەتىندە مەملەكەتتىك بيلىكتىڭ ءبىر تارماعىنا اينالدى. سوت جۇيەسىن قارجىلىق, ماتەريالدىق-تەحنيكالىق جاعىنان قامتاماسىز ەتۋگە نازار اۋدارىلعاندىعىنىڭ جارقىن دالەلى رەتىندە تالاپقا ساي عيماراتتىڭ بۇگىن اشىلۋى مەن قىزمەتتىك كولىكتەردىڭ بەرىلۋىن ايتۋعا بولادى», دەدى.
قۇقىقتىق ساۋاتتىلىق, ادىلدىك, ارعى-بەرگىنى ەكشەي الاتىن زەردەلىلىك سىندى سۋديالارعا اۋاداي قاجەتتى قۇندىلىقتارعا تۇلا بويى تۇنىپ تۇرعان قازاقستان رەسپۋبليكاسى سۋديالار وداعىنىڭ توراعاسى سەرىك بايباتىروۆ بۇگىنگى تاريحقا اينالعان كەشەگى ءومىر وتكەلدەرىنەن سۋىرتپاقتاي سىر تارتا سويلەدى. شىنى كەرەك, كەڭەستىك داۋىردە سوت جۇيەسى مەن قۇقىق قورعاۋ ورگاندارى قىزمەتكەرلەرى جۇپىنى كەڭسەلەردە وتىرىپ, توزىعى جەتكەن اۆتوكولىكتەردى كەزەكتەسە مىنەتىن ەدى عوي. ال بۇگىن شە؟ سوندىقتان تاۋەلسىزدىكتىڭ قادىرىن ءبىلىپ, باعالاۋمەن شەكتەلمەي سول تاۋەلسىزدىگىمىز عۇمىرلى بولۋى ءۇشىن مەملەكەتىمىزدىڭ ەڭ قىمبات قازىناسى – ادام جانە ادامنىڭ ءومىرى, قۇقىقتارى مەن بوستاندىعىن قورعاۋدا زاڭ شەڭبەرىندە ەڭبەك ەتۋ پارىز, مىندەت.
ءسويتىپ, ەڭسەلى عيماراتقا يە بولعان الماتى وبلىستىق سوتىنىڭ وڭىردەگى جۇيەسىنە جوعارعى سوت – 10, ال الماتى وبلىسىنىڭ اكىمى – 20 اۆتوكولىك تارتۋ ەتتى. سونداي-اق, وسى سالادا قاجىرلى ەڭبەك ەتىپ كەلە جاتقان بىرقاتار سۋديالار مەن سوت قىزمەتكەرلەرى ۆەدومستۆولىق ناگرادالارمەن ماراپاتتالدى. ەندىگى مىندەت – ادىلدىكتىڭ تۋىن جەلبىرەتۋ.
نۇربول الدىباەۆ,
«ەگەمەن قازاقستان».
تالدىقورعان.
سۋرەتتى تۇسىرگەن جۇماباي مۇسابەكوۆ.