ەلىمىزدە ءار ادامنىڭ زاڭ الدىنداعى تەڭدىگى مەن سوت ادىلدىگىنىڭ ارتۋىنا مۇرىندىق بولار زاڭنىڭ جاڭا جوباسى ازىرلەندى. كوپتەن ايتىلىپ كەلە جاتقان بۇل ازاماتتىق ءىس جۇرگىزۋ كودەكسىنىڭ جوباسى سوتتاردىڭ ازاماتتىق ىستەردى قاراۋ ساپاسىن, تيىمدىلىگىن, شاپشاڭدىعى مەن مىنسىزدىگىن ارتتىرۋدى قامتاماسىز ەتۋگە نەگىز بولۋعا ءتيىس.
سوعان وراي ازاماتتىق ءىس ءجۇرگىزۋ كودەكسىنىڭ جاڭا جوباسىن تالقىلاۋعا ارنالعان دوڭگەلەك ۇستەل شاراسى دا وتكىزىلىپ ۇلگەرىلدى. زاڭ جوباسىن جەتىلدىرۋدىڭ نەگىزگى باعىتتارى بويىنشا باس پروكۋروردىڭ ورىنباسارى ج.اسانوۆ, ادىلەت ءمينيسترىنىڭ ورىنباسارى ز.بايمولدينا, عالىمدار مەن شەتەلدىك ساراپشىلار ءوز پىكىرلەرىن ورتاعا سالدى. جوبادا ازاماتتىق ىستەر بويىنشا سوت تورەلىگىن جۇزەگە اسىرۋدا تۋىندايتىن قوعامدىق قاتىناستاردى رەتتەۋ كوزدەلگەن. اتاپ ايتقاندا, ازاماتتىق ىستەردى قاراۋ تاراپتاردىڭ جارىسپالى ءسوز سويلەۋى ۇدەرىسىندە جۇرگىزىلىپ, سۋديانىڭ سوت تالقىلاۋىنا نەگىز بولعان ماسەلەنى باقىلاۋداعى قۇزىرەتى ازداعان دەڭگەيدە عانا ساقتالادى ەكەن. وسىلايشا كودەكستىڭ جاڭا رەداكتسياسىندا سوت ىسىنە قاتىسۋشىلار مەن سۋديالاردىڭ پروتسەسسۋالدىق قۇقىقتارى مەن مىندەتتەرىنىڭ شىنايى تەڭگەرىمى كوزدەلگەن.
داۋلاردى رەتتەۋدىڭ سوتتان تىس تەتىكتەرىن دامىتۋ ءۇشىن جەكەلەگەن ساناتتار بويىنشا «داۋلاردى سوتتان تىس رەتتەۋ» اتتى جاڭا تاراۋ ەنگىزىلگەن. كاسساتسيالىق ساتىداعى سوتتىڭ ىستەردى اپەللياتسيالىق ساتىداعى سوتتىڭ جاڭادان قاراۋىنا جىبەرۋ ۇردىستەرى ازايتىلدى. مۇنداي ەرەجە بارلىق سوت ساتىلارىندا مەملەكەتتىك باجدىڭ ەنگىزىلۋىمەن ۇيلەسەدى. تاتۋلاستىرۋ راسىمدەرىن كەڭىنەن قولدانۋ جانە ازاماتتىق سوت ءىسىن جۇرگىزۋ مىندەتتەرىن ىسكە اسىرۋ ماقساتىندا جوبادا داۋدى بەيبىت رەتتەۋگە ىقپال ەتۋ دە كوزدەلەدى. «تاتۋلاستىرۋ راسىمدەرى» اتتى بولەك تاراۋدا مەدياتسيا تارتىبىمەن داۋدى شەشۋگە باعىتتالعان ءبىتىمگەرشىلىك كەلىسىمدەر مەن شارتتار جاساۋدىڭ راسىمدەرى مەن سالدارىن ەگجەي-تەگجەيلى رەتتەۋ قاراستىرىلادى.
بۇعان قوسا, جوبادا ازاماتتىق ىستەردى قاراۋ ءتارتىبىن جەڭىلدەتۋگە, سونىڭ ىشىندە سوتتار قىزمەتىندە تەحنيكالىق قۇرالداردى كەڭىنەن قولدانۋ ارقىلى وڭايلاتۋعا باعىتتالعان ەرەجەلەر بار. كوزدەلىپ وتىرعان بارلىق شارالار حالىقتىڭ الەۋمەتتىك تۇرعىدان ءالجۋاز توپتارىنىڭ مۇددەسىن قامتاماسىز ەتۋ قاجەتتىلىگىن ەسكەرە وتىرىپ, قابىلداناتىن بولادى. بۇل ورايدا سۋديالار ۇ.سۇلەيمەنوۆانىڭ, ن.مامونتوۆتىڭ جانە قاراعاندى وبلىستىق سوتىنىڭ ازاماتتىق جانە اكىمشىلىك ىستەر جونىندەگى اپەللياتسيالىق سوت القاسىنىڭ ءتورايىمى ج.سەيدالينانىڭ باياندامالارى ازاماتتىق سوت ءوندىرىسىنىڭ مىندەتتەرى مەن قاعيداتتارى, ازاماتتىق ءىس جۇرگىزۋ كودەكسى جوباسىنىڭ جالپى ەرەجەلەرى, ءبىرىنشى ساتىداعى سوت ءوندىرىسى مەن سوت اكتىلەرىن قايتا قاراۋ ءماسەلەلەرىنە ارنالدى. ال اتالعان شاراعا جوعارعى سوت جانە جەرگىلىكتى سوتتار سۋديالارى, كونستيتۋتسيالىق كەڭەس مۇشەلەرى, باس پروكۋراتۋرانىڭ, سۋديالار وداعىنىڭ, قۇقىق قورعاۋ ورگاندارىنىڭ, ۇكىمەتتىك ەمەس ۇيىمداردىڭ وكىلدەرى مەن شەتەلدىك ساراپشىلار قاتىستى.
الەكساندر تاسبولاتوۆ,
«ەگەمەن قازاقستان».