دەنساۋلىق ساقتاۋ مينيسترلىگىنىڭ Cانيتاريالىق-ەپيدەميولوگيالىق باقىلاۋ كوميتەتى قازاقستان اۋماعىندا مايمىل شەشەگى ينفەكتسياسىنىڭ پايدا بولۋىنا جول بەرمەۋ ماقساتىندا اتقارىلىپ جاتقان شارالار جايىندا بايانداپ بەردى.
دۇنيەجۇزىلىك دەنساۋلىق ساقتاۋ ۇيىمىنىڭ الدىن الا دەرەكتەرىنە قاراعاندا, الەمدە مايمىل شەشەگىن جۇقتىرۋ دەرەكتەرى جوعارى قارقىن الىپ وسۋدە. بۇگىنگى تاڭدا الەمنىڭ 81 ەلىندە 18 954 جاعداي تىركەلسە, ونىڭ 18 915-ءسى راستالدى. بۇل رەتتە, ددۇ وكىلدەرى نيگەريا مەن كونگوداعى جاعدايعا ەرەكشە الاڭداۋشىلىق ءبىلدىرىپ وتىر.
ەلىمىزدىڭ اۋماعىندا ينفەكتسيانىڭ تارالىپ كەتۋىنە جول بەرمەۋ ماقساتىندا سانيتاريالىق-پروفيلاكتيكالىق ءىس-شارالار ىسكە اسىرىلىپ كەلەدى. مينيسترلىكتىڭ دەرەكتەرىنە سايكەس, رەسپۋبليكانىڭ مەملەكەتتىك شەكاراسىندا ورنالاسقان اۋەجايلاردا, تەمىرجولداردا, تەڭىز پورتتارىندا جانە اۆتووتپە جولداردا سانيتاريالىق-كارانتيندىك پۋنكتتەر جۇمىس ىستەيدى. اتالعان پۋنكتەردە قاشىقتىقتان جۇزەگە اسىرىلاتىن تەرمومەتريانىڭ كومەگىمەن شەتەلدەن كەلگەن ازاماتتار تەكسەرىستەن وتەدى.
«بۇگىنگى تاڭدا رەسپۋبليكادا مايمىل شەشەگىنىڭ بەلگىلەرى بار اۋرۋ جاعدايلارى تىركەلگەن جوق. افريكا ەلدەرىنەن جانە اتالعان ينفەكتسيانى جۇقتىرۋ جاعدايلارى تىركەلگەن باسقا مەملەكەتتەردەن كەلگەن ازاماتتارعا ەرەكشە نازار اۋدارىلادى. ينفەكتسيا تارالعان ەلدەردىڭ ءتىزىمى ۇنەمى جاڭارتىلىپ وتىرادى», دەلىنگەن كوميتەت اقپاراتىندا.
ۆەدومستۆودا اتاپ وتكەندەي, قازىرگى ۋاقىتتا «جۇقپالى اۋرۋلار» بەيىنى بويىنشا مايمىل شەشەگىن دياگنوستيكالاۋ مەن ەمدەۋدىڭ كلينيكالىق حاتتاماسى ازىرلەنىپ جاتىر.
ايتا كەتسەك, قازاقستاندا مايمىل شەشەگىن انىقتاۋعا ارنالعان ارنايى تەست جۇيەسى بار. مەديتسينا قىزمەتكەرلەرى دە اتالعان دەرتتى انىقتاۋ جانە ەمدەۋ بويىنشا ارنايى وقىتۋدان ءوتىپ, سەمينار-ترەنينگتەرگە قاتىستى.
ايتا كەتسەك, الەمدە ۆيرۋسقا قارسى ارنايى پرەپاراتتار ءالى دە ازىرلەنبەگەن. الايدا ۇلىبريتانيادا ناۋقاستارمەن جۇمىس ىستەيتىن مەديتسينا قىزمەتكەرلەرىنە كادىمگى شەشەككە قارسى ۆاكتسينا سالىنادى. ونداي ۆاكتسينا مايمىل شەشەگى ۆيرۋسىنان دا قورعايدى ەكەن.
ال ەلىمىزدىڭ ينفەكتسيالىق اۋرۋحانالارىنا كەلەتىن بولساق, ولار ۆيرۋسقا قارسى, ناۋقاستاردى سيمپتوماتيكالىق كۇتۋگە ارنالعان دارىلىك پرەپاراتتاردىڭ, جەكە قورعانىش قۇرالدارىنىڭ جانە دەزينفەكتسيالىق قۇرالداردىڭ رەزەرۆتىك قورىمەن قامتاماسىز ەتىلگەن. زەرتحانالىق قىزمەتتى جۇزەگە اسىرۋ باعىتىندا ءتۇرلى دياگنوستيكا جۇرگىزۋ ءۇشىن قاجەتتى رەاگەنتتەر قورى قۇرىلدى.
بيىل مينيسترلىك ددۇ ماماندارىمەن بىرلەسىپ دەنساۋلىق ساقتاۋ ۇيىمدارى ءۇشىن مايمىل شەشەگىنىڭ ەتيولوگياسى, پاتوگەنەزى, كلينيكاسى, دياگنوستيكاسى جانە ونى ەمدەۋ, ەپيدانامنەز بەن الدىن الۋ شارالارىنىڭ ەرەكشەلىكتەرىن ەسكەرە وتىرىپ, مايمىل شەشەگىن دياگنوستيكالاۋ كەزىندەگى جاعدايدىڭ ستاندارتتى انىقتاماسىن قولدانۋ بويىنشا ونلاين-سەمينارلار وتكىزگەن ەدى. بۇل ءىس-شارالار كەشەنى دە قازاقستاندىق مامانداردى كاسىبي جەتىلدىرىپ, ەلىمىزدە ينفەكتسيانىڭ پايدا بولۋىنا جول بەرمەۋگە ىقپال ەتەدى دەگەن سەنىم بار.