اتىراۋ. 4 مامىر. اتىراۋدىڭ مۇگەدەك سپورتشىلارىنان قۇرالعان ۆولەيبولشىلار كومانداسى ازيا چەمپيوناتىنىڭ كۇمىس جۇلدەسىن يەلەندى. بۇل تۋرالى «مۇگەدەكتەر» سپورت كلۋبىنىڭ ديرەكتورى باۋىرجان تاحاۋوۆ حابارلادى.
مۇگەدەك ۆولەيبولشىلار كومانداسى ۆولەيبولدى وتىرىپ وينايدى. اتىراۋلىق مۇگەدەك سپورتشىلاردان جاساقتالعان بۇل كوماندا ەلىمىزدىڭ نامىسىن حالىقارالىق سايىستاردا بىرنەشە جىل قاتارىنان ابىرويلى قورعاپ كەلەدى. ءبىر ەرەكشەلىگى, ۆولەيبولدى وتىرىپ ويناۋدان ەل قۇراماسى اتىراۋلىق مۇگەدەكتەردەن جاساقتالعان. جاقىندا يراننىڭ مەشحەد قالاسىندا وتكىزىلگەن ازيا چەمپيوناتىندا ەل نامىسىن تاعى ابىرويلى قورعاعان اتالعان كوماندا مۇشەلەرى كۇمىس جۇلدەگە يە بولدى.
«مۇگەدەكتەر» سپورت كلۋبىنىڭ ديرەكتورى باۋىرجان تاحاۋوۆتىڭ ايتۋىنشا, ەل قۇراماسى ازيا چەمپيوناتىندا موڭعوليا, جاپونيا, يراك قۇرامالارىنان باسىم ءتۇسىپ, اقتىق باسەكەدە يران ەلىنىڭ كومانداسىمەن كەزدەسىپتى. بىرنەشە رەت الەمدىك باسەكەلەردە توپ جارعان يراندىق ۆولەيبولشىلارعا عانا ەسە جىبەرگەن اتىراۋلىق مۇگەدەك ۆولەيبولشىلار ەندى پولشادا وتەتىن الەم چەمپيوناتىنا بەرىلەتىن ءۇش جولدامانىڭ ءبىرىن ۇتىپ الدى. الەم چەمپيوناتى ماۋسىم ايىندا وتكىزىلمەك.
«ال كۇزدە كورەيادا وتەتىن ريو-دە-جانەيروداعى پاراوليمپيادالىق ويىندارعا ليتسەنزيا بەرەتىن سايىستارعا قاتىسامىز. سول سىننان پاراوليمپيادالىق ويىندارعا قاتىسۋ جولداماسىنا يە بولۋدى كوزدەپ وتىرمىز»,–دەيدى ب.تاحاۋوۆ.
جولداسبەك شوپەعۇل.
دەرەككوز: اتىراۋ «مۇگەدەكتەر» سپورت قوعامى.
فوتو: اتىراۋ «مۇگەدەكتەر» سپورت قوعامى.