ءوڭىر-وڭىردەن كەلگەن جالىندى جاستاردىڭ باسىن ءبىر شاڭىراق استىنا جيناپ, بەرەكەسىن نىعايتىپ, باسەكەگە تۇسىرگەن دودا الاۋى جەتىسۋدا تۇتاندى. وبلىس ورتالىعى تالدىقورعان قالاسىندا اۋىل جاسوسپىرىمدەرىنىڭ IV جازعى ويىندارىنىڭ شىمىلدىعى ءتۇرىلدى. جارىس سپورتتىڭ 12 تۇرىنەن وتۋدە. وعان ەلىمىزدىڭ 14 وبلىسىنان 3 مىڭنان استام سپورتشى قاتىسادى.
جازعى ويىنداردىڭ اشىلۋ سالتاناتىنا قاراقۇرىم حالىق جينالدى. «بەسارىس» كوگالداعى حوككەي ستاديونىندا ينە شانشار ورىن بولعان جوق. بەتاشار ءسوزدى جەتىسۋ وبلىسىنىڭ اكىمى بەيبىت يساباەۆ سويلەپ, سپورتشىلارعا ساتتىلىك تىلەدى.
«جاسوسپىرىمدەر تاربيەسى – بۇگىنگى كۇننىڭ اسا وزەكتى ماسەلەلەرىنىڭ ءبىرى. ولاردى بۇقارالىق سپورتقا تارتۋ ارقىلى ەرىك-جىگەرىن شىڭداۋ, مىنەز-قۇلقىن تاربيەلەۋ, رۋحىن بەكەمدەۋ – ءبىزدىڭ ورتاق مىندەتىمىز. وسى ورايدا بۇگىنگى باستالىپ وتىرعان جازعى ويىنداردىڭ ماڭىزى زور. «جۇزدەن – جۇيرىك, مىڭنان – تۇلپار» دەمەكشى, ءاردايىم كوك تۋىمىزدى جوعارى ۇستاپ, ابىروي بيىگىنەن كورىنىڭىزدەر. بارشا سپورتشىلارعا ساتتىلىك پەن جەڭىس تىلەيمىن», دەدى ب.يساباەۆ.
جارىس باعدارلاماسىنا سايكەس, ۆولەيبول مەن اسىق اتۋ «جاستار» سپورت سارايىندا, گرەك-ريم كۇرەسى, ەركىن كۇرەس, قازاق كۇرەسى «وركەن» سپورت كەشەنىندە, دزيۋدو «جاستار 2» سپورت كەشەنىندە, شاعىن فۋتبول «بولاشاق» ستاديونىندا, كوگالداعى حوككەي «بەسارىس» ستاديونىندا, باسكەتبول 3ح3-تەن ءى.جانسۇگىروۆ اتىنداعى ۋنيۆەرسيتەتتىڭ سپورت كەشەنىندە, ۇستەل تەننيسى «جەتىسۋ» تەننيس ورتالىعىندا, توعىزقۇمالاق جاستارعا قىزمەت كورسەتۋ ورتالىعىندا, ارمرەستلينگ وتەناي اۋىلدىق وكرۋگىنىڭ مادەنيەت ۇيىندە وتەدى. جازعى ويىندار 3 تامىزعا دەيىن جالعاسادى.
ەسكە سالساق, ءتورت جىلدا ءبىر رەت جالاۋىن جەلبىرەتەتىن بۇل دودا وسىعان دەيىن 2018 جىلى سىر وڭىرىندە وتكەن بولاتىن.
ايماقتاعى جاس سپورتشىلاردىڭ جەتىستىكتەرىنە قىسقاشا توقتالساق, جىل باسىنان بەرى حالىقارالىق جانە رەسپۋبليكالىق جارىستاردا وبلىس قورجىنىنا ءتۇرلى دارەجەدەگى 900 مەدال ءتۇستى. جالپى, وبلىس اۋماعىندا كاسىپقوي كلۋبتاردان «جەتىسۋ» فۋتبول كلۋبى, «جاستار» ويىندىق سپورت تۇرلەرى كلۋبى جانە «وليمپ» رەگبي كلۋبى بار. بۇل رەتتە «بەسارىس» كوگالداعى حوككەي كومانداسى بىلتىر ەل چەمپيوناتىندا ەرلەر اراسىندا 1-ورىن, ايەلدەر اراسىندا 2-ورىن يەلەنگەن. سونىمەن قاتار بيىل تايلاندتا وتكەن ازيا كۋبوگىندا ايەلدەر كومانداسى 1 جانە ەرلەر اراسىندا 2-ورىن يەلەنىپ, 2023 جىلى افريكا ەلىندە وتەتىن الەم چەمپيوناتىنا جولداما ۇتىپ الدى.
سپورتشىلار ىشىندە توعىزقۇمالاقتان جاسوسپىرىمدەر اراسىنداعى ازيا چەمپيونى ارسەن ەسەنتايدى, شاحماتتان ازيا چەمپيونى, الەم چەمپيونى ەلناز قالياحمەتتى, دزيۋدودان ءىىى جازعى جاسوسپىرىمدەر وليمپيادا ويىندارىنىڭ جەڭىمپازى بەكارىس سادۋاقاستى, ۆەلوسپورتتان ەۆگەني فەدوروۆتى, سول سياقتى 2022 جىلدىڭ باسىنان كاراتە شوتوكاننان ءى ازيا چەمپيوناتىنىڭ جەڭىمپازدارى سايلاۋ ميراتتى, ميحايل پۋشكيندى, جۇلدەگەرلەر – رامازان يبەگەندى, سالاۋات راحىموۆتى, ارگۇل ءماجيتوۆانى, اۋىر اتلەتيكادان جاسوسپىرىمدەر مەن قىزدار اراسىندا ازيا چەمپيوناتىنىڭ كۇمىس مەدال يەگەرى نادەجدا ءليدى ماقتانىشپەن ايتامىز.
جەتىسۋ وبلىسى