وتىزدىققا ەنگەن ەلدى مەكەندەر

سونىڭ ءبىرى – ماحامبەت اۋدانىنداعى ماحامبەت اۋىلى. مۇندا 13 مىڭنان استام تۇرعىن, 19-عا جۋىق وزگە ەتنوستىڭ وكىلى تۇرادى. اۋىلدا 3 ورتا مەكتەپ, 1 ساز مەكتەبى, 2 سپورت مەكتەبى, 5 بالاباقشا, 1 ەمحانا مەن اۋرۋحانا, ورتالىق جانە بالالار كىتاپحاناسى, جاڭادان سالىنعان مۇراجاي, ساۋلەتتى مادەنيەت ءۇيى جانە مەشىت بار. اۋىلدا 2007 جىلدان باستاپ يپوتەكالىق ادىسپەن ەكى قاباتتى 80 ءۇي شاعىن اۋدان رەتىندە بوي كوتەردى. بارلىق ءۇي مەن مەكەمە تۇگەلگە جۋىق تابيعي گاز جەلىسىنە قوسىلعان. اۋىلدا 3 ساۋدا ءۇيى, 3 جانار-جاعارماي قۇيۋ ستانساسى تۇتىنۋشىعا قىزمەت كورسەتەدى. ەگىن جانە مال شارۋاشىلىعىمەن اينالىساتىن 12 شارۋا قوجالىعى جۇمىس ىستەيدى.

ەكىنشىسى – جىلىوي اۋدانىنداعى شوقپارتوعاي اۋىلى. بۇل اۋىلدى 3 100-دەن استام تۇرعىن مەكەن ەتەدى. اۋىلدا 58 شارۋا قوجالىعى, 1 بالاباقشا, 1 مەكتەپ, 1 ەمحانا مەن سپورت مەكتەبى جۇمىس ىستەپ تۇر.

جوبا اۆتورى مۇراتحان شوقاننىڭ مالىمەتىنشە, «ۇزدىك 30 اۋىل» انىقتامالىق كىتابىنا قوس اۋىلدىڭ تاريحى, تىنىس-تىرشىلىگى, ءبىلىم, سپورت, دەنساۋلىق, مادەنيەت سالاسى مەن الەۋمەتتىك-ەكونوميكالىق دامۋ ىرعاعى, شاعىن جانە ورتا كاسىپكەرلىكتىڭ وركەندەۋى تۋرالى مالىمەتتەر قامتىلىپ وتىر. سونداي-اق اۋىلدان شىققان تانىمال تۇلعالار جونىندە ماعلۇماتتار ەنگىزىلگەن.

– اۋىل – قازاقتىڭ تۇپقازىعى, التىن بەسىگى. سول سەبەپتەن, اتالعان جوبا اياسىندا ۇزدىك اۋىلداردى انىقتاپ, وزگەلەرگە, اسىرەسە وسكەلەڭ ۇرپاققا ۇلگى ەتۋدى كوزدەدىك. تۋعان اۋىلىن كوركەيتۋگە ۇلەس قوسىپ جۇرگەن ازاماتتاردى دارىپتەۋ, سول ارقىلى كاسىپكەرلەر مەن جاستاردىڭ نازارىن اتامەكەنگە بۇرساق دەگەن ماقساتىمىز بولدى, – دەيدى جوبا اۆتورى مۇراتحان شوقان.

اتىراۋ وبلىسى