مادەنيەت جانە سپورت ءمينيسترى داۋرەن اباەۆ سولتۇستىك قازاقستان وبلىسىنىڭ يمانتاۋ-شالقار كۋرورتتىق ايماعىندا جاڭا تۋريستىك ماۋسىمنىڭ اشىلۋى اياسىندا تۋربيزنەس, اكىمدىك جانە ەكولوگيا مينيسترلىگى وكىلدەرىمەن كەزدەسۋ وتكىزدى. تاراپتار سالانى دامىتۋعا ارنالعان پەرسپەكتيۆالىق جوبالاردى ىسكە اسىرۋ ماسەلەلەرىن تالقىلادى.
«قازاقستاننىڭ ءار وڭىرىندە بولاشاقتا ەكولوگيالىق جانە تانىمدىق تۋريزم ورتالىقتارى بولا الاتىن ەرەكشە ورىندار بار. سونىڭ ءبىرى ەلىمىزدىڭ سولتۇستىگىندە – «كوكشەتاۋ» ۇلتتىق پاركى اۋماعىندا ورنالاسقان يمانتاۋ-شالقار كۋرورتتى ايماعى, ول تۋريستىك اعىنداردىڭ 5 ەسە ءوسۋ الەۋەتىنە يە, ياعني جىلىنا 280 مىڭ تۋريسكە دەيىن قابىلداي الادى», دەپ اتاپ ءوتتى مينيستر داۋرەن اباەۆ.
ءوز كەزەگىندە تۋربيزنەس وكىلدەرى شالقار كولىنىڭ بويىنداعى جولدى جوندەۋگە جانە ينجەنەرلىك ينفراقۇرىلىم قۇرىلىسىنا رۇقسات بەرۋدى سۇرايدى. كۋرورتتىق ايماق «كوكشەتاۋ» ۇلتتىق پاركىنىڭ اۋماعىندا ورنالاسقان جانە ەكولوگيا, گەولوگيا جانە تابيعي رەسۋرستار مينيسترلىگىنىڭ قاراماعىندا.
«كول اۋماعىن ساپالى دامىتۋ ءۇشىن اكىمدىكپەن بىرلەسىپ تۋريستىك ينفراقۇرىلىمدى جابدىقتاۋعا مۇمكىندىك بەرەتىن نورماتيۆتىك قۇقىقتىق اكتىلەرگە وزگەرىستەر ەنگىزۋ قاجەت. بۇل جۇمىس باستالىپ تا كەتتى», دەدى ەگترم ورمان شارۋاشىلىعى جانە جانۋارلار دۇنيەسى كوميتەتىنىڭ توراعاسى نۇرلان قىلىشباەۆ.
مينيستر د.اباەۆ سونداي-اق شالقار جانە يمانتاۋ كولدەرىنىڭ بويىنداعى تۋريستىك بازالاردى ارالاپ, اشىق اسپان استىنداعى مۇراجاي قۇرىلىسىنىڭ جوباسىمەن تانىستى, «شالقار سۋ» ءساناتوريىنىڭ قالپىنا كەلتىرىلۋ جۇمىستارىنىڭ بارىسىن كوردى.