جەتىسۋ وبلىسىنىڭ اكىمى بەيبىت يساباەۆ ءۇش حالىقارالىق قارجى ينستيتۋتىنىڭ اتىنان كەلگەن دەلەگاتسيامەن كەزدەستى. ءوڭىر باسشىسى ەۋروپالىق قايتا قۇرۋ جانە دامۋ بانكى, دۇنيەجۇزىلىك بانك جانە ازيا دامۋ بانكى وكىلدەرىمەن بىرگە ەكونوميكانىڭ ءتۇرلى سالالارىنداعى ىنتىماقتاستىق مۇمكىندىكتەرىن جانە اۋىل شارۋاشىلىعى ونىمدەرىن قايتا وڭدەۋ, الەۋمەتتىك, كولىكتىك جانە الەۋمەتتىك سالانى جاقسارتۋ جوبالارىن تالقىلادى.
كەزدەسۋگە ەۋروپالىق وداقتىڭ قازاقستان رەسپۋبليكاسىنداعى ەلشىسى كەستۋتيس يانكاۋسكاس تا قاتىستى. جيىندا وبلىس باسشىسى ءوڭىردىڭ الەۋمەتتىك-ەكونوميكالىق دامۋىنىڭ نەگىزگى باعىتتارىن قىسقاشا بايانداپ, اگروونەركاسىپ كەشەنىنىڭ مۇمكىندىكتەرىنە كەڭىنەن توقتالدى.
ء«بىزدىڭ باستى مىندەتىمىزدىڭ ءبىرى – وڭىرگە ينۆەستيتسيا تارتۋ. اسىرەسە اۋىل شارۋاشىلىعى ونىمدەرىن وڭدەۋگە تارتۋ. قازىر قانتپەن قامتاماسىز ەتۋدە پروبلەمالار بار. ەلىمىزدە 4 قانت زاۋىتى بولسا, ونىڭ 2-ەۋى ءبىزدىڭ وبلىستا. ەكەۋى دە جاقسى جاڭارتىلعان. كوكسۋ قانت زاۋىتى قانت قىزىلشاسىن دا, شيكى قامىستى دا وڭدەيدى. ال اقسۋ قانت زاۋىتىندا جوندەۋ جۇمىستارى ءجۇرىپ جاتىر. الاكول اۋدانىندا ورنالاسقان ءۇشىنشى قانت زاۋىتىن قالپىنا كەلتىرۋگە قىزىعۋشىلىق تانىتساڭىزدار, قۋانار ەدىك. جەر ءجانناتى جەتىسۋ ولكەسى تۇمسا تابيعاتىمەن, ساف اۋاسىمەن ەرەكشە. سوندىقتان مۇندا ءتورت ماۋسىمدا ءتۋريزمدى دامىتۋعا جاقسى مۇمكىندىكتەر بار», دەدى ب.يساباەۆ.
جيىن بارىسىندا ازيا دامۋ بانكىنىڭ قازاقستانداعى ديرەكتورى ناريمان ماناپبەكوۆ ءوزى وكىلدىك ەتەتىن قارجى ينستيتۋتى الەۋمەتتىك ينفراقۇرىلىمدى, اتاپ ايتقاندا, مەكتەپ, اۋرۋحانا, سۋ ەلەكتر ستانسالارىن جانە باسقا دا جاڭارتىلاتىن ەنەرگيا نىساندارىن سالۋ جوبالارىن قولداۋعا مۇددەلى ەكەنىن ايتتى. اۋىل شارۋاشىلىعى ونىمدەرىن قايتا وڭدەۋ كاسىپورىندارىن ودان ءارى دامىتۋ ماقساتىندا ينۆەستيتسيا تارتۋ مۇمكىندىكتەرىنە دە توقتالدى.
ەۋروپالىق قايتا قۇرۋ جانە دامۋ بانكىنىڭ قازاقستانداعى وكىلدىگىنىڭ ديرەكتورى حۋسەين وزحان تۇرعىن ءۇي-كوممۋنالدىق شارۋاشىلىعىنداعى جوبالاردى نەسيەلەندىرۋ باعدارلاماسىنا, اتاپ ايتقاندا, بانكتەردى جاڭعىرتۋعا ەرەكشە نازار اۋداردى. ول سۋ شارۋاشىلىعى نىساندارى, كوشەلەردى جارىقتاندىرۋ جۇيەلەرى, جىلۋ جانە سۋمەن جابدىقتاۋ, قاتتى تۇرمىستىق قالدىقتاردى وڭدەۋ, تسيفرلاندىرۋ سالاسىندا, ونىڭ ىشىندە تسيفرلىق باۋىرلاس قالالاردى قۇرۋعا نيەتتى ەكەنىن ءبىلدىردى. قارجى ينستيتۋتىنىڭ وكىلدەرى اۋىل شارۋاشىلىعى ونىمدەرىن قايتا وڭدەۋ مەن جاڭارتىلاتىن ەنەرگيا كوزدەرىن دامىتۋ بويىنشا جەكە جوبالاردى, سونداي-اق كولىك-لوگيستيكالىق ينفراقۇرىلىمدى, اسىرەسە تەمىر جولدى قولداۋعا مۇددەلى ەكەنىن جەتكىزدى.
دۇنيەجۇزىلىك بانكتىڭ قازاقستانداعى تۇراقتى وكىلى جان-فرانسۋا مارتون «جاسىل» ءوندىرىستى, تسيفرلىق, كولىكتىك بايلانىستاردى دامىتۋ مۇمكىندىگى جايلى ءسوز قوزعادى.
جيىندى قورىتىندىلاعان وبلىس اكىمى بەيبىت يساباەۆ: ء«بىزدىڭ ۇلكەن جوسپارىمىز بار. سوندىقتان ارنايى جوبالار دايىنداپ قويدىق. ولارمەن تانىسقاننان كەيىن سىزدەردىڭ ۇسىنىستارىڭىزدى ەسكەرە وتىرىپ, بارلىق ماسەلەنى ەگجەي-تەگجەي تالقىلاي الامىز. بۇل ءتيىمدى بولادى دەپ ويلايمىن», دەدى.
ايتا كەتەيىك, ىسكە اسىرۋعا دايىن جوبالاردىڭ قاتارىندا ەت-ءسۇت سەكتورى, جەمىس-جيدەك ساقتاۋ قويمالارى مەن جەمىس-جيدەك كونسەرۆى زاۋىتتارىنىڭ قۇرىلىسى جانە جالپى اۋىلشارۋاشىلىق ونىمدەرىن قايتا وڭدەۋ, الاكول جاعالاۋىندا ساناتوريالىق-ساۋىقتىرۋ مەكەمەلەرىن دامىتۋ, تەكەلى قالاسىنداعى تۋريزم ماسەلەسى بار.
كەزدەسۋ سوڭىندا بارلىق تاراپ جۇمىستى ودان ءارى جانداندىرۋ ءۇشىن ۇسىنىلعان جوبالاردى زەردەلەپ, جاقىن ارادا مازمۇندى تالقىلاۋعا ورالامىز دەپ كەلىستى. وبلىستىق كاسىپكەرلىك جانە يندۋستريالدى-يننوۆاتسيالىق دامۋ باسقارماسىنىڭ باسشىسى دياس سەرىكوۆتىڭ ايتۋىنشا, بۇگىندە جەتىسۋداعى ينۆەستيتسيالىق جوبالار پۋلى 278 جوبادان تۇرادى.
جەتىسۋ وبلىسى