ەل گازەتى – «ەگەمەن قازاقستانمەن» 1958 جىلدان بەرى تانىسپىن. 1957 جىلى وقۋ ءبىتىرىپ, الماتىدان ەلگە ورالعان سوڭ بىردەن جۇمىسقا كىرىسكەنىمىز بەلگىلى. گازەت-جۋرنالدارعا جازىلۋ ءداستۇرى دە ءدال سول كەزدە باستالعان-تۇعىن. مىنە, سول ۋاقىتتان بەرى قاراي مىندەتتى تۇردە اۋداندىق, وبلىستىق ەكى گازەت پەن رەسپۋبليكالىق «ەگەمەن قازاقستان» گازەتىنە جانە ءۇش جۋرنالعا جازىلۋدان اينىعان ەمەسپىن. قازىر جاسىم 88-دە. قوستاناي وبلىسىنداعى جانگەلدين اۋدانىنىڭ ورتالىعى – تورعايدا تۇرامىن.
تورعاي – الاش ارىستارى شىققان, پاتشا وكىمەتىنىڭ قيتۇرقى ساياساتىنا قارسى كوپتەگەن كوتەرىلىس ۇيىمداستىرىلعان ەرەكشە اۋدان. ۇلت ۇستازى احمەت بايتۇرسىن ۇلى مەن ءبىرتۋار ازامات مىرجاقىپ دۋلاتوۆتىڭ دا وتانى. تانىمال حالىق باتىرلارى, اقىن-جازۋشىلار, وقىمىستىلار, حالىق ارتىستەرى, ءانشى-كۇيشىلەر, سپورتشىلار, اۋىل شارۋاشىلىعى سالاسى بويىنشا سوتسياليستىك ەڭبەك ەرلەرى دە كوپتەپ سانالادى. اۋدان ورتالىعىنداعى بەس مۋزەي, ارداگەرلەر ءۇيى, Amanat پارتياسىنىڭ كەڭسەسى ۇزبەي جۇمىس ىستەيدى.
سول اتاقتى دا تالانتتى جەرلەستەرىمىزدى كورىپ ەسەيگەن, كەزىندە ءتۇرلى قىزمەت اتقارعان كوزى اشىق, كوكىرەگى وياۋ كەشەگى جاستار – بۇگىنگى ارداگەرلەر جينالىپ, پرەزيدەنتتىڭ جولداۋلارىن, باسقا دا باستامالارىن, ۇكىمەت وتىرىستارىندا كوتەرىلگەن وزەكتى ماسەلەلەردى تالقىلاپ, پىكىر الماسامىز, مادەني ءىس-شارالار مەن سپورت جارىستارىن تاماشالايمىز.
سپورت دەمەكشى, قازىر ولاردىڭ ءتۇرى كوبەيدى. جاستارىمىز دا سولارمەن جان-جاقتى اينالىسا باستادى. قازاق جاستارى, اسىرەسە اۋەسقوي بوكستى تولىق مەڭگەرىپ, وليمپيادا, الەم, ازيا چەمپيوناتتارىندا توپ جارىپ ءجۇر. ءبىرازى كاسىپقوي بوكسقا اۋىسىپ ۇلگەرسە, ول جاقتا دا تابىسسىز ەمەس سياقتى. ۇلاندارىمىزدىڭ قايراتتى, قارۋلى ەكەندەرىن ماقتانىشپەن ايتامىز. جىلت ەتكەن جاعىمدى جاڭالىق ەستىسەك, ءبىر-بىرىمىزگە قۋانا حابارلاپ جاتامىز.
ءسوزىمنىڭ سوڭىندا ايتپاعىم مىناۋ ەدى. قۇرمەتتى «ەگەمەن قازاقستان» گازەتىنىڭ سپورت تاقىرىبىندا جازاتىن جۋرناليستەرى! ءبىز, تورعايلىق ارداگەرلەر, قازىرگى كەزدە قازاقستاننىڭ نەشە بوكسشىسى كاسىپقوي بوكستا ءجۇر جانە ولاردىڭ ارقايسىسى نەشە مارتە شارشى الاڭعا شىقتى, جەڭگەنى, جەڭىلگەنى, تەڭ تۇسكەنى نەشەۋ, قايسىسى قاشان بوكستاسادى, قارسىلاستارى كىمدەر دەگەن سياقتى قىزىقتى مالىمەتتەردى ۇدايى ءبىلىپ وتىرساق دەيمىز. وتىنىشتەرىمىز اياقسىز قالمايدى دەپ سەنەمىز.
جاقان قاجى يبراەۆ,
جاقسىلىق احمەتوۆ,
تويعانبول نۇرحانوۆ,
جۇماحان سادۋاقاسوۆ
قوستاناي وبلىسى