الماتى وبلىسىنىڭ جامبىل اۋدانىنداعى ۇزىناعاش اۋىلى ورتا مەكتەبىنىڭ ماتەماتيكا ءپانى مۇعالىمى گۇلزيا قۇرمانقانعا «بولاشاق» حالىقارالىق ستيپەندياسى تاعايىندالدى. گۇلزيا اقش-تىڭ جەتەكشى جوعارى وقۋ ورنى – وڭتۇستىك فلوريدا ۋنيۆەرسيتەتىندە «ماتەماتيكالىق ءبىلىم بەرۋ» ماماندىعى بويىنشا ماگيستراتۋرادا وقيدى.
پەداگوگ ينتەرنەت جەلىسىندەگى ونلاين ساباقتار مەن دارىستەردىڭ كومەگىمەن اعىلشىن ءتىلىن باستاپقى دەڭگەيدەن جوعارى دەڭگەيگە دەيىن مەڭگەردى. گۇلزيا شەت ءتىلىن كۇنىنە 5-6 ساعات بويى وقىدى. وسىنىڭ ناتيجەسىندە ول IELTS ەمتيحانى بويىنشا 9 جوعارى بالدان 7 بالل جيناپ, اقش-تىڭ ەڭ بەدەلدى جوعارى وقۋ ورنىنا ءتۇستى.
«مەن اۋىلدان شىقپاي-اق, «بولاشاق» ستيپەندياسىن تاعايىنداۋعا كونكۋرستىق ىرىكتەۋدەن ءساتتى ءوتتىم. قاراپايىم اۋىل مەكتەبىندە وقىدىم, قازىر سول اۋىل مەكتەبىندە جۇمىس ىستەيمىن. الەمدەگى ەڭ ۇزدىك ۋنيۆەرسيتەتتە وقۋعا مۇمكىندىگىم بولاتىنىن ءتىپتى ەلەستەتە دە المادىم. ءبىلىم مەن وزىڭە دەگەن سەنىم ارقاشان قالاعان نارسەڭە جەتۋگە كومەكتەسەتىنىنە سەنىمدىمىن. شاكىرتتەرىم دە الەمدەگى ەڭ ۇزدىك ءبىلىم العانىن قالايمىن. ولار مەنەن ۇلگى الىپ, شابىتتانادى دەپ ۇمىتتەنەمىن», دەپ اڭگىمەلەدى گۇلزيا قۇرمانقان.
ەستەرىڭىزگە سالا كەتەيىك, كادرلاردى شەتەلدە دايارلاۋ جونىندەگى رەسپۋبليكالىق كوميسسيا شەشىمىمەن 2022 جىلعى العاشقى اعىنىندا ستيپەنديا 199 قازاقستاندىققا تاعايىندالدى. ولاردىڭ ىشىندە 29 ستيپەنديا پەداگوگتەر مەن وقىتۋشىلارعا تاعايىندالدى.
جالپى العاندا, بيىل ماگيستراتۋرا مەن رەزيدەنتۋرا باعدارلامالارىنا 385 ستيپەنديا, دوكتورانتۋرا باعدارلاماسىنا 60 ستيپەنديا ءبولىندى. وسى جىلدىڭ سوڭىنا دەيىن رەسپۋبليكالىق كوميسسيانىڭ تاعى ەكى وتىرىسى وتەدى. «بولاشاق» حالىقارالىق ستيپەندياسىن تاعايىنداۋعا كونكۋرستىق ىرىكتەۋگە قاتىسۋ ءۇشىن قۇجاتتار بيىلعى 14 قازانعا دەيىن قابىلدانادى. تاعىلىمدامادان ءوتۋ ءۇشىن قۇجاتتار قابىلداۋ 2022 جىلعى 5 قىركۇيەكتە باستالىپ, 14 قازانعا دەيىن وتەدى.