شىلدەنىڭ باسىندا ماۋسىمنىڭ سوڭعى اپتاسىمەن سالىستىرعاندا كوۆيد جۇقتىرعاندار سانى شىمكەنت قالاسىندا 3,6 ەسە وسكەن. قالادا جىل باسىنان بەرى 8 مىڭعا جۋىق ادامنان كوروناۆيرۋس ينفەكتسياسى انىقتالىپتى. ءبىر جاسقا دەيىنگى 565 بالا اۋىرعان, 47 ادام قايتىس بولىپ, 500-دەن استام ناۋقاس بۇگىندە ەم الۋدا. بۇل جىل باسىنان بەرگى ستاتيستيكا. وتكەن تاۋلىكتىڭ وزىندە 145 ادامنان قاۋىپتى ينفەكتسيا انىقتالعان.
قالالىق سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى ءابدىماناپ تولەباەۆتىڭ ايتۋىنشا, ينفەكتسيا جۇقتىرعاندار نەگىزىنەن اشىق سيمپتوممەن انىقتالىپ جاتىر. وسىعان بايلانىستى قالانىڭ باس سانيتارى 6 ءتۇرلى توپتاعى ادامدارعا رەۆاكتسينالاۋ مىندەتتى جۇرگىزىلەتىنىن مالىمدەدى. وعان مەديتسينا, الەۋمەتتىك قىزمەت كورسەتۋ مەكەمەسى, كۇشتىك قۇرىلىمدار وكىلدەرى جانە پەداگوگتەر مەن 50 جاستان اسقان ازاماتتار كىرەدى.
شىلدەنىڭ سوڭىنا دەيىن قالاداعى 27 مىڭنان استام ادامدى Pfizer ەكپەسىمەن رەۆاكتسينالاۋ جوسپارلانىپ وتىر. دەرتتىڭ ءورشىپ كەلە جاتقانىنا قاراماستان, شىمكەنت بۇرىنعىداي كارانتينگە جابىلمايدى. كوروناۆيرۋستىڭ ەكى شتاممى «دەلتا» مەن «ستەلس-وميكرون» تارالۋدا, اسىرەسە ەكىنشىسىن جۇقتىرىپ جاتقان ادام كوپ.
الەۋمەتتىك جەلىلەردەگى بەلگىسىز بىرەۋلەردىڭ قورعانىش كوستيۋمدەرىن كيىپ اۋاعا بوگدە ءبىر زاتتى شاشىپ جۇرگەنى بەينەلەنگەن ءتۇسىرىلىم جانە سول ارقىلى ىندەت تاراتىلىپ جاتقانى جونىندەگى اقپارات مەگاپوليس تۇرعىندارىن ۇرەيلەندىرىپ وتىر. باس سانيتار مۇنىڭ ەش شىندىققا جاناسپايتىنىن, ۆيرۋس اۋامەن تارالمايتىنىن مالىمدەپ, جۇرتتى قاۋەسەتكە سەنبەۋگە شاقىرۋدا.
ءانۋار جۇماشباەۆ,
«Egemen Qazaqstan»
شىمكەنت