قازاقستاندا وقۋ جىلى ەكى اپتاعا ۇزارۋى مۇمكىن

قۇجاتقا سايكەس, ءبىرىنشى سىنىپتاردا وقۋ جىلىنىڭ ۇزاقتىعى 35 اپتا بولسا, 2-11 (12) سىنىپتاردا 36 وقۋ اپتاسى بولادى.

الداعى وقۋ جىلىندا بارلىق سىنىپتارعا مىناداي كانيكۋل كەزەڭىن بەلگىلەۋ ۇسىنىلادى:

كۇزگى كانيكۋل – 7 كۇن (2022 جىلدىڭ 31 قازانىنان 6 قاراشاسىن قوسا العاندا);

قىسقى كانيكۋل – 9 كۇن (2022 جىلعى 31 جەلتوقساننان 2023 جىلعى 8 قاڭتاردى قوسا العاندا);

كوكتەمگى كانيكۋل – 9 كۇن (2023 جىلعى 18-26 ناۋرىزدى قوسا العاندا).

ءبىرىنشى سىنىپ وقۋشىلارى ءۇشىن دە قوسىمشا جەتى كۇندىك كانيكۋل ەنگىزىلەدى - 2023 جىلدىڭ 6 اقپانى مەن 12 اقپانىن قوسا العاندا.

«قوسىمشا ەكى وقۋ اپتاسىن قوسۋ ارقىلى وقۋ جىلىنىڭ ۇزاقتىعىن ارتتىرۋ كۇنىنە ساباقتار سانىن ازايتۋعا, كۇردەلى تاقىرىپتاردى وقۋ قارقىندىلىعىن تومەندەتۋگە, ءبىلىم بەرۋ پروتسەسىن دامىتاتىن وقىتۋ قاعيداتتارىندا ۇيىمداستىرۋعا مۇمكىندىك بەرەدى»,  دەلىنگەن حابارلامادا.

بۇيرىق جوباسىن قوعامدىق تالقىلاۋ 2 تامىزعا دەيىن جالعاسادى.