بيىل 1 شىلدەدەگى جاعداي بويىنشا مەملەكەتتىك الەۋمەتتىك ساقتاندىرۋ قورىنان (ماسق) جۇمىسىنان ايىرىلۋىنا بايلانىستى 59,8 مىڭ ادامعا الەۋمەتتىك تولەم تولەندى. جالپى, مۇنداي تولەم 50 مىڭ ازاماتقا العاش رەت تاعايىندالىپ وتىر. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى حابارلادى.
قولدانىستاعى زاڭناماعا سايكەس جۇمىستان بوساتىلعان قىزمەتكەرلەر مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە جانە سوڭعى 24 ايداعى تابىسىنا بايلانىستى 1 ايدان 6 ايعا دەيىن جۇمىسىنان ايىرىلۋى بويىنشا الەۋمەتتىك تولەمدەر الادى. تولەم قىزمەتكەر جوعالتقان تابىستىڭ 40%-نا دەيىنگى مولشەردە ماسق قاراجاتى ەسەبىنەن جۇزەگە اسىرىلادى.
جۇمىستان بوساتىلعان قىزمەتكەرگە تولەم تاعايىنداۋ ءۇشىن: eGov.kz پورتالىندا تىركەلۋ; «جۇمىسقا ورنالاستىرۋ جانە جۇمىسپەن قامتۋ» بولىمىندە «جۇمىس ىزدەپ جۇرگەن ادامداردى تىركەۋ» قىزمەتىن تاڭداۋ; ونلاين قىزمەتكە تاپسىرىس بەرىپ, بارلىق جولدى تولتىرۋ جانە ەتسق-مەن قول قويۋ ارقىلى ءوتىنىمدى جىبەرۋ قاجەت. ءبىر كۇن ىشىندە ءوتىنىش بەرۋشىنىڭ تۇرعىلىقتى جەرى بويىنشا جۇمىسپەن قامتۋ ورتالىعى (حجقو) بوس جۇمىس ورىندارىن ۇسىنادى. ەگەر جۇمىس تابىلماسا, ءۇش كۇن ىشىندە قاشىقتان جۇمىسسىز مارتەبەسى بەرىلەدى. بۇل قىزمەتتى ونلاين رەجىمدە ەلەكتروندىق ەڭبەك بيرجاسى (enbek.kz) ارقىلى دا الۋعا بولادى.
ازامات جۇمىسسىز رەتىندە تىركەلگەن سوڭ ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتتىق جۇيەسى پرواكتيۆتى فورماتتا ماسق-دان تولەم تاعايىنداۋ بويىنشا قىزمەت كورسەتۋگە كەلىسىم بەرۋ ءۇشىن ۇيالى تەلەفونعا SMS-حابارلاما جىبەرەدى. كەلىسكەن جاعدايدا SMS-حابارلاماعا جاۋاپ بەرۋ قاجەت. تولەم اۆتوماتتى تۇردە تاعايىندالادى.
ماسق قاراجاتى ەسەبىنەن جۇمىسىنان ايىرىلعان جاعدايدا تولەنەتىن الەۋمەتتىك تولەم جۇمىستان بوساتىلۋ سەبەپتەرىنە قاراماستان جۇزەگە اسىرىلادى جانە جۇمىسسىز ادامداردى جۇمىس ىزدەپ جۇرگەن كەزەڭدە قولداۋعا ارنالعان.
بۇدان بۇرىن حابارلانعانداي, اتالعان ۆەدومستۆو ەلەكتروندىق ەڭبەك بيرجاسى ارقىلى حالىقتى جۇمىسپەن قامتۋ ورتالىقتارىنىڭ قاشىقتان قىزمەت كورسەتۋ فۋنكتسيونالىن ىسكە قوستى. بۇل جۇمىسسىزداردى تىركەۋ جانە جۇمىسپەن قامتۋدى قولداۋ بويىنشا مەملەكەتتىك قىزمەتتەردى, ونىڭ ىشىندە جۇمىسىنان ايىرىلۋ بويىنشا الەۋمەتتىك تولەمدەردى الۋ راسىمدەرىن جەڭىلدەتۋگە مۇمكىندىك بەردى. ەندى بارلىعىن تەك ينتەرنەت, كومپيۋتەر جانە ەلەكتروندىق تسيفرلىق قولتاڭبانىڭ كومەگىمەن جاساۋعا بولادى.