ادامزات تىرشىلىگىنە وراسان قاۋىپ-قاتەرىمەن كەلگەن كوروناۆيرۋس پاندەمياسى ءالى دە الەمگە سەس بولىپ تۇر. ءبىرشاما ۋاقىت اجەپتاۋىر سايابىرسىپ قالعان ىندەت قازىر كوپتەگەن ەلدە قايتادان كۇشىنە ەنە باستادى. بۇل قاتاردا ءبىزدىڭ ەلدە دە ەپيدەميالىق احۋالدىڭ ناشارلاي باستاعانى بايقالدى. اسىرەسە ىندەتتىڭ كەڭ تارالۋى ءىرى قالالارىمىزدا قاتتى سەزىلىپ, ەل بويىنشا جالپى اۋىرعان ادامداردىڭ 70%-ىن قامتىپ وتىر.
17 شىلدەدەگى مالىمەت بويىنشا كەيىنگى تاۋلىكتە ەلىمىزدە 1 546 ادامنىڭ كوروناۆيرۋس ينفەكتسياسىن جۇقتىرعانى انىقتالدى. قازىرگى ۋاقىتتا 7 571 ادام ىندەتتەن ەمدەلىپ جاتىر, ونىڭ ىشىندە 680 پاتسيەنت ستاتسيوناردا, 6 891 ناۋقاس امبۋلاتوريالىق دەڭگەيدە ەم قابىلداۋدا. اۋرۋعا شالدىققانداردىڭ اراسىندا 15 ادامنىڭ جاعدايى اۋىر, ءۇش ناۋقاستىڭ جاعدايى وتە اۋىر, ءبىر ناۋقاس ءوجت اپپاراتىندا جاتىر.
كوروناۆيرۋستىڭ تارالۋى قايتادان قارقىن الىپ, كەيىنگى اپتادا الدىڭعى اپتامەن سالىستىرعاندا ىندەت جۇقتىرعانداردىڭ سانى 2,5 ەسەگە كوبەيدى. بۇل رەتتە دەنساۋلىق ساقتاۋ ءمينيسترى اجار عينيات پرەزيدەنت جانىنداعى ورتالىق كوممۋنيكاتسيالار الاڭىندا ەلىمىزدەگى COVID-19 اۋرۋى بويىنشا ەپيدەميالىق جاعداي تۋرالى جان-جاقتى مالىمەت بەردى.
«الەمدە كۆي-مەن سىرقاتتانۋدىڭ ءوسۋى قازاقستاندا دا سەزىلىپ, 20 ماۋسىمنان باستاپ اۋرۋشاڭدىق بەلەڭ الا باستادى. كەيىنگى اپتادا الدىڭعى اپتامەن سالىستىرعاندا اۋرۋشاڭدىق 2,5 ەسەگە – 1030-دان 2558 جاعدايعا دەيىن ءوستى. تاۋلىگىنە 1300-گە دەيىن كۆي جاعدايى تىركەلىپ جاتىر. سىرقاتتانۋدىڭ ەڭ كوپ تارالۋى مەگاپوليستەردە – الماتى, نۇر-سۇلتان جانە شىمكەنت قالالارىندا بايقالۋدا. كەيىنگى اپتادا اۋىرعان ادامداردىڭ 70%-ى الماتى جانە نۇر-سۇلتان قالالارىندا تىركەلدى. ماۋسىم ايىندا جۇرگىزىلگەن سەكۆەنيرلەۋ قورىتىندىسى بويىنشا قازاقستاندا ۇلگىلەردىڭ 70%-ى وميكرون ۆا.5 نۇسقاسىنا, قالعان 30%-ى جاسىرىن وميكرون نۇسقاسىنا ءتان ەكەنى انىقتالدى», دەيدى ا.عينيات.
مينيستر سىرقاتتانۋشىلىقتىڭ كوتەرىلۋىنە قاراماستان, ناۋقاستاردى اۋرۋحاناعا جاتقىزۋ دەڭگەيى ءالى دە تومەن ەكەنىن اتاپ ءوتتى. ونىڭ ايتۋىنشا, 15 شىلدەدەگى جاعداي بويىنشا رەسپۋبليكادا ستاتسيونارلىق كومەكتى قۋاتى 3 282 توسەكتىك ورىندى قۇرايتىن 139 ينفەكتسيالىق اۋرۋحانا كورسەتەدى, وندا 570 پاتسيەنت ەمدەۋگە جاتقىزىلدى, وسىلايشا توسەكتىك ورىنداردىڭ قامتىلۋى 20%-دى قۇراپ وتىر. ال رەانيماتسيالىق توسەكتىك ورىنداردىڭ 4%-ىندا عانا ناۋقاس جاتىر.
«ستاتسيونارلاردا ەمدەلىپ جاتقان پاتسيەنتتەرگە تالداۋ جۇرگىزىلدى. ماسەلەن, كوروناۆيرۋسپەن ستاتسيوناردا جاتقانداردىڭ ىشىندە 18 جاسقا دەيىنگى بالالار سانى – 41,7%, ونىڭ ىشىندە 1 جاسقا دەيىنگىسى – 23%. جالپى, ەل بويىنشا 180 بالا ەمدەلىپ جاتىر. ەرەسەك پاتسيەنتتەر 58,3%-دى قۇرادى. ءارتۇرلى قاتار جۇرەتىن اۋرۋلارى بار پاتسيەنتتەر – 23%. رەانيماتسيالىق ناۋقاستاردىڭ نەگىزگى كونتينگەنتى – ىلەسپە اۋرۋلارى بار 50 جاستان اسقان ادامدار», ۆەدومستۆو باسشىسى.
كوروناۆيرۋسپەن اۋىرعان ناۋقاستارعا ۋاقتىلى مەديتسينالىق كومەك كورسەتۋ ءۇشىن العاشقى مەديتسينالىق-سانيتاريالىق كومەك دەڭگەيىندە 2 387 ءموبيلدى بريگادا ۇيىمداستىرىلعان, ونىڭ ىشىندە اۋىلداردا مىڭنان اسا ءموبيلدى بريگادا جۇمىس ىستەپ جاتىر. رەزەرۆتە 2 مىڭعا جۋىق ءموبيلدى توپ دايىن تۇر.
«2022 جىلدىڭ ءبىرىنشى جارتىجىلدىعىندا ءموبيلدى بريگادالار 815 مىڭنان اسا قىزمەت كورسەتتى. ەڭ كوبى قاراعاندى, نۇر-سۇلتان مەن الماتى قالالارىندا جۇزەگە اسىرىلدى. بيىلعى 6 ايدىڭ قورىتىندىسى بويىنشا كوروناۆيرۋسقا كۇدىگى بار پاتسيەنتتەرگە جەدەل مەديتسينالىق كومەك قىزمەتىن شاقىرۋ سانى وتكەن جىلعا قاراعاندا ازايعان. بارلىق مەديتسينالىق كورسەتكىشتەر مينيسترلىكتىڭ كۇندەلىكتى باقىلاۋىندا», دەدى ا.عينيات.
سونىمەن قاتار مينيستر ددۇ ۇسىنىمدارى مەن حالىقارالىق تاجىريبەنى ەسكەرە وتىرىپ, COVID-19 ەپيدەميالىق جاعدايىن باعالاۋ ماتريتساسى قايتا قارالعانىن, سىرقاتتانۋشىلىق كورسەتكىشى اۋرۋحاناعا جاتقىزۋ كورسەتكىشىمەن اۋىستىرىلعانىن حابارلادى.
«ماسەلەن, «جاسىل ايماق» 2 500 ناۋقاسقا دەيىن توسەكتىك ورىن بوس بولماعان كەزدە; 5 مىڭ ناۋقاسقا دەيىن توسەكتىك-ورىن بوس بولماعان جانە R رەپرودۋكتيۆتى سانىنىڭ كورسەتكىشى 1-دەن كەم بولعان كەزدە بەلگىلەنەدى. «سارى ايماق» شامامەن 5 مىڭ توسەكتىك ورىن جانە R1-دەن كوپ بولعان كەزدە نەمەسە توسەكتىك ورىن 5 مىڭنان 10 مىڭعا دەيىن جانە R1-دەن از بولعان كەزدە بەلگىلەنەدى. «قىزىل ايماق» توسەكتىك ورىندا 5 مىڭ ناۋقاستان جانە R1-دەن كوپ بولعان كەزدە نەمەسە R-گە قاراماستان 10 مىڭنان اسا ناۋقاسقا توسەكتىك ورىن بولعان كەزدە بەلگىلەنەدى. «سارى ايماققا» كوشۋ كەزىندە ينفەكتسيا كوزىن وقشاۋلاۋعا جانە مىنەز-ق ۇلىق فاكتورلارىن كۇشەيتۋگە باعىتتالعان شارالار قابىلدانادى. وڭىرلەردە «قىزىل ايماققا» كوشۋ كەزىندە «سارى ايماقتا» قابىلدانعان شارالارعا قوسىمشا ستاتسيونار مەن مساك جۇكتەمەسىنە بايلانىستى ەكى كەزەڭدە حالىقتىڭ ءجۇرىپ-تۇرۋى مەن كاسىپكەرلىك سۋبەكتىلەرىنىڭ قىزمەتىن شەكتەۋ شارالارى قابىلدانادى. شارالار قابىلداۋ جونىندەگى ۇسىنىستار ۆەدومستۆوارالىق كوميسسيانىڭ قاراۋىنا ەنگىزىلەدى», دەدى سپيكەر.
وسى ورايدا ا.عينيات كۆي-عا قارسى ۆاكتسينالاۋ ينفەكتسيانىڭ اۋىر تۇرلەرىنەن جانە اۋرۋحاناعا جاتقىزۋدىڭ الدىن الۋدىڭ ەڭ نەگىزگى ناقتى شاراسى ەكەنىن تاعى دا ەسكە سالدى.
«ۆاكتسينالاۋ جانە رەۆاكتسينالاۋ كوروناۆيرۋستان جالعىز قورعانىس بولىپ قالا بەرەدى. الماتى جانە نۇر-سۇلتان قالالارىنىڭ اۋىرعانداردىڭ 80%-ى ۆاكتسينا سالدىرماعان نەمەسە 6 اي بۇرىن سالدىرعان ادامدار ەكەنى راستالدى. بۇل كۆي-عا قارسى ۆاكتسينالاۋ ماڭىزدى ەكەنىنە تاعى دا كوزىمىزدى جەتكىزەدى. قازىرگى ۋاقىتتا قازاقستاندا ۆاكتسينالاردىڭ 3 ءتۇرى (كازۆاك, سينوفارم, پفايزەر), قايتا ۆاكتسينالاۋ ءۇشىن كازۆاك جانە سينوفارم قولجەتىمدى. ەگۋ پۋنكتتەرىندە قالعان ۆاكتسينانىڭ 1,6 ميلليون دوزاسى بار. بۇگىندە كۆي-عا قارسى ۆاكتسينالاۋمەن ەرەسەك تۇرعىنداردىڭ 80%-دان استامى نەمەسە بارلىق حالىقتىڭ 56%-دان استامى قامتىلعان. ءبىرىنشى كومپونەنتپەن 10,7 ملن ادام, ەكىنشى كومپونەنتپەن 10,4 ملن ادام ۆاكتسينا سالدىردى. تاۋلىگىنە 5 مىڭنان اسا ادام ۆاكتسينالاۋدان ءوتىپ جاتىر», دەدى مينيستر.
ال رەسپۋبليكا بويىنشا كۆي-عا قارسى باستاپقى رەۆاكتسينالاۋمەن قامتۋ ءتيىستى حالىقتىڭ 67,5%-دان استامىن قۇرادى, ياعني 4,9 ملن ادام قامتىلدى.
«مامىر ايىنىڭ سوڭىنان باستاپ ءبىز قايتا رەۆاكتسينالاۋدى ەنگىزدىك. بۇگىنگى تاڭدا 44%, ياعني 260 مىڭ ادام قامتىلدى. ايتا كەتەتىنى, COVID-19-عا قارسى رەۆاكتسينالاۋ الدىڭعى ۆاكتسينالاردىڭ كومەگىمەن پايدا بولعان ۆاكتسينادان كەيىنگى يممۋنيتەتتى ساقتاۋعا جانە اعزانى اۋرۋدان قورعاۋدى كۇشەيتۋگە باعىتتالعان. ءبىر وكىنىشتىسى, ۆاكتسينالانعان ادامداردا, سونداي-اق كۆي-مەن اۋىرعان ادامداردا ۋاقىت وتە كەلە دەنەنىڭ ينفەكتسيادان قورعالۋ دەڭگەيى تومەندەيدى, ناتيجەسىندە ادام قايتادان ينفەكتسياعا سەزىمتال بولادى. وسىعان بايلانىستى ۆاكتسينالاۋدىڭ باستاپقى كۋرسىن العاننان كەيىن 6 ايدان كەيىن كۆي-عا قارسى رەۆاكتسينا الۋ ۇسىنىلادى», دەپ ا.عينيات ءسوزىن تولىقتىردى.
بريفينگ بارىسىندا مينيستر كوروناۆيرۋستىڭ تارالۋ قارقىنىنا بايلانىستى بولجامدى دا كەلتىرە كەتتى. ونىڭ ايتۋىنشا, دەنساۋلىق ساقتاۋ مينيسترلىگى اي سايىن الداعى 3 ايعا ارنالعان بولجامىن جاڭارتىپ وتىرادى. پەسسيميستىك ستسەناريدە ەڭ كوپ تىركەلگەن جاعدايلار تاۋلىگىنە 4 مىڭ ناۋقاسقا دەيىن, رەاليستىك ستسەناريدە تاۋلىگىنە 2 500 جاعدايعا دەيىن, وپتيميستىك ستسەناريدە تاۋلىگىنە مىڭ جاعدايعا دەيىن بولادى. سىرقاتتانۋشىلىق تامىز ايىندا وسەدى. تامىز-قىركۇيەك ايىنىڭ سوڭىندا تومەندەي باستايدى. وسى ورايدا ا.عينيات قازاقستاندىقتاردى ءوز دەنساۋلىعىنا قامقور بولۋعا شاقىرىپ, قوعامدىق ورىنداردا جانە كولىكتە ماسكا تاعۋ كەرەك ەكەنىن, اۋرۋدىڭ العاشقى بەلگىلەرى بايقالسا, دارىگەرلەرگە حابارلاسۋ قاجەت ەكەنىن ايتتى.