قازاقستاندىق ءجاسوسپىرىم تەننيسشىلەر ەۋروپاداعى تۋرنيرلەردە جەڭىسكە جەتتى

قازاقستان تەننيس فەدەراتسياسىنان ءمالىم ەتكەنىندەي, فرانتسيادا Tennis Europe سەرياسى بويىنشا 14 جاسقا دەيىنگىلەر اراسىندا ءبىرىنشى ساناتتاعى La Balle Mimosa Loire'Atlantigue جارىسىندا جۇپتىق سىندا قازاقستاندىقتار ۇزدىك شىقتى.

اريانا گوگۋلينا مەن ءساتيما تورەگەن فينالدا دودانىڭ ءۇشىنشى راكەتكالارى چەحيالىق سوفيا حەتلەروۆا - ۋكراينالىق سوفيا كريۆورۋچكانى تىزە بۇكتىردى - 6:3, 7:6 (7:0).

بوزبالالار اراسىندا دامير جالعاسباي مەن دانيەل تازابەكوۆتى جاپونيالىقتار رەن ماتتسۋرۋما - ريو تاباتانى 6:1, 3:6, 10:6 ەسەبىمەن ۇتىپ, چەمپيون اتاندى.

تاعى ءبىر قازاقستاندىق اڭسار نيەتقاليەۆ جۇپتىق سىندا گدانسك قالاسىندا (پولشا) 12 جاسقا دەيىنگىلەر اراسىندا وتكەن وسىنداي تۋرنيردە جەڭىس تۇعىرىنا كوتەرىلدى. اڭسار امەريكالىق كامەلوت كارنەلومەن بىرگە جەرگىلىكتى اعايىندىلار ۆويتتاردى 6:2, 2:0 (ماتچتان باس تارتۋ) ەسەبىمەن جەڭدى.

گرۋزيادا 18 جاسقا دەيىنگىلەر اراسىندا ITF Juniors جارىسىندا ىڭكار دۇيسەباي جۇپتىق سىندا كەزەكتى تيتۋلىنا قول جەتكىزدى. ول ۇلىبريتانيالىق گاببي پاسكاۋسپەن بىرگە قازاقستاندىق ۋليانا رومانوۆا - رەسەيلىك ديانا حايدارشينادان ايلا اسىردى - 6:3, 6:4.