«Egemen Qazaqstan» گازەتىندە بيىلعى 21 ساۋىردە جاريالانعان اقۇشتاپ باقتىگەرەەۆانىڭ «جۇرەگىم اۋىرادى» دەگەن ماقالاسىن وقىعاننان كەيىن قارت انا رەتىندە قولىما قالام العاندى ءجون كوردىم. ماعان اقىننىڭ جۇرەك تولعانىسىن جەرىنە جەتكىزە جازعانى ۇنادى. مەنى دە قازىرگى كەزدە جاستاردىڭ, اسىرەسە قىز بالالاردىڭ ءجۇرىس-تۇرىسى, كيىم كيىسى, ءسوز ساپتاۋ مانەرلەرى قاتتى ويلاندىرادى.
ءوز باسىم ەل گازەتى – «Egemen Qazaqstan»-نىڭ بايىرعى وقىرمانىمىن. وندا جاريالاناتىن توعاقتى ماتەريالداردى تۇششىنا وقيمىن. ال جاستار تاربيەسىنە قاتىستى ايتاتىن بولسام, ولاردىڭ وعاش ءىس-ارەكەتتەرىنە ءبىز – ۇلكەندەر بەيجاي قاراماۋىمىز كەرەك دەپ ەسەپتەيمىن. بىراق ءبىر وكىنىشتىسى, ەسكەرتۋ جاساساڭ, جاستاردىڭ ءبىرازى: «سىزدەردىڭ زاماندارىڭىز بەن ءبىزدىڭ زامانىمىزدى سالىستىرماڭىزدار, ءبىزدىڭ جاڭاشا ءومىر سۇرگىمىز كەلەدى», دەپ توتەسىنەن قايىرادى. قانداي ءۋاج ايتارىڭدى بىلمەي, توسىلىپ قالاسىڭ.
سوندا دا ءبىرى بولماسا, ءبىرى ويلانار دەگەن ۇمىتپەن اقىل-كەڭەسىڭدى ايتۋدان جالىقپايسىڭ. ال اشىعىنا كوشەتىن بولساق, بۇگىندە بۇرىمدى قىزدار مۇلدەم كوزگە تۇسپەيتىن بولىپ بارادى. قاي-قايسىنىڭ دا شاشىن جايىپ جىبەرىپ, جالبىراتىپ جۇرگەنىن كورەسىڭ. مۇنىڭ جامان ىرىم ەكەنىن سولار بىلمەسە كەرەك. بۇل ازداي, كىندىكتەرىن اشىپ تاستايدى. جەل ءتيىپ, اۋىرىپ قالسا قايتپەك. سۇراپ العان اۋرۋدىڭ اۋىر تيەتىنى بار. بۇعان قوسا, بۇگىندە جىرتىق دجينسي سانگە اينالعان. مۇرىندارىنا سىرعا تاعىپ العان قىزداردى دا كەزدەستىرىپ قالاسىڭ.
ءبىزدىڭ قىزدار مەن ايەلدەرگە ارنالعان ۇلتتىق كيىمدەرىمىزدىڭ باسقا ەشبىر ۇلتتىكىنەن ارتىق بولماسا, ەش كەمدىگى جوق ەكەنىنە ءباس تىگە الامىن. ارينە, جۇمىس ورنىندا, قىزمەتتە زامانىڭا قاراي كيىنۋ كەرەك ەكەنىن تۇسىنەمىز. دەگەنمەن كورىنگەنگە ەلىكتەپ, سالتىمىزعا جات تۇرعىدا اشىق-شاشىق كيىنىپ ءجۇرۋ ءوزىڭدى عانا ەمەس, تۇتاس ۇلتىڭدى سىيلاماۋ دەپ بىلەمىز. قازىرگى جاستارىمىز, اسىرەسە, قىز بالالار وسىنى تۇسىنسە ەكەن!
رايسا ىبىراەۆا,
زەينەتكەر انا
نۇر-سۇلتان