جاتاقحانا قۇرىلىسىنا ينۆەستيتسيا سالىنادى

«قازىرگى تاڭدا ەلىمىزدە ستۋ­دەنت­تىك جاتاقحانالاردا ورىن تاپ­شىلىعى بايقالادى. بۇل ماسەلەنى شەشۋ ءۇشىن شاعىن جانە ورتا بيزنەس سۋبەكتىلەرىنىڭ بەلسەندى قاتىسۋىن كوزدەيتىن مەملەكەتتىك تاپسىرىس مەحانيزمى ازىرلەندى. تاپسىرىستى كاسىپكەر ءوز قاراجاتى ەسەبىنەن قولعا الادى. مەملەكەتتىك تاپسىرىستى ورنالاستىرۋدىڭ باستى شارتى – ستۋدەنتتەر جاتاقحاناسىن سالۋ», دەپ اتاپ ءوتتى ا.ساعىندىقوۆا.

بۇگىندە رەسپۋبليكا بويىنشا ستۋدەنتتەر جاتاقحانالارىندا جالپى ورىن تاپشىلىعى 84 129 بولسا, ونىڭ 40 417-ءسى – الماتى قالاسىندا. «قارجى ورتالىعى» وكىلىنىڭ ايتۋىنشا, كەز كەلگەن الەۋمەتتىك نىساننىڭ قۇرىلىسى – تابىستى, تۇراقتى عانا ەمەس, بولاشاعى زور بيزنەس جوبا. ياعني نىساندى ءوز قاراجاتىنا سالعان جوباعا قاتىسۋشى پايدالانۋعا بەرىلگەننەن كەيىن ءاربىر ورىن ءۇشىن مەملەكەتتەن تولەماقى الادى. ءبىر ستۋدەنتكە شاققانداعى مەملەكەتتىك تاپسىرىستىڭ جىلدىق مولشەرى: قۇرىلىسقا – 122 اەك, الماتى قالاسى بو­يىنشا – 144 اەك, قايتا قۇرۋ – 47 اەك, نۇر-سۇلتان جانە الماتى قالاسى بويىنشا – 92 اەك. «قارجى ورتالىعىنىڭ» دەرەگىنشە, جوبا بويىنشا 2019 جىلى 9 166 ورىندى 10 جاتاقحانا, 2020 جىلى 20 266 ورىندىق 75 جاتاقحانا جانە 2021 جىلى 30 630 ورىندى 124 جاتاقحانا سالىنعان. الماتىدا 2018-2021 جىلدار ارالىعىندا 3 970 ورىندى 19 ستۋدەنتتىك جاتاقحانا پايدالانۋعا بەرىلدى. بيىل مەگاپوليستە 1 696 ورىندىق ءۇش ستۋدەنتتىك جاتاقحانا قاتارعا قوسىلادى.

«قارجى ورتالىعى» اق ىلگەرى­لەتۋ جانە سىرتقى كوممۋنيكاتسيا­لار ءبولىمىنىڭ ساراپشىسى دياس جام­بىلوۆ كاسىپكەرلەرگە جاتاق­حانا عيماراتتارىن سالۋ عانا ەمەس, قايتا جوندەۋ جۇمىستارىنىڭ دا ۇسىنىلىپ وتىرعانىن جەتكىزدى.

«ەگەر كاسىپكەر قۇرىلىس سالامىن دەسە, «قارجى ورتالىعى» اق-نا جەر تەلىمىنىڭ قۇجاتتارىن تاپسىرۋى كەرەك. ەگەر جاتاقحانادا قايتا سالۋدى قاجەت ەتەتىن عيمارات بولسا دا وسى تالاپتاردى ورىنداپ, الدىن الا كەلىسىمشارت جاسالادى. نىسان 24 اي ىشىندە پايدالانۋعا بەرىلۋى قاجەت. قارجى رەسۋرستارى جەتكىلىكسىز بولعان جاعداي­دا, «دامۋ» قورىنان جەڭىلدىك­پەن نەسيە الۋ قاراستىرىلعان. جوبانىڭ تاعى بار شارتى 20 جىل ىشىندە جاتاقحانانى باسقا ماقساتتا پايدالانۋعا بولمايدى. ال كەيىننەن نىساندى كەپىلگە, ساتۋعا, جالعا بەرۋگە بولادى. جاتاقحانا قۇرىلىسىنا قاتىس­تى وزگە دە ماسەلەلەرگە توقتال­عان «قارجى ورتالىعىنىڭ» وكىلى «ينۆەستورلارمەن تالقى­لاۋ قورى­تىندىسى بويىنشا مەم­لە­كەتتىك تاپسىرىستى ورنالاستىرۋ مە­حانيزمىن قايتا قاراۋدىڭ نۇس­قاسى ازىرلەنگەن», دەپ اتاپ ءوتتى. ناقتى ايتقاندا: تولەم مەرزىمىن 8 جىلدان 6 جىلعا دەيىن قىسقارتىپ, 20 پايىزعا دەيىن ارتتىرۋ كوزدەلگەن. ەگەر بۇگىندە الماتى قالاسىندا 8 جىلعا تولەم نورماسى 144 اەك بولسا, 6 جىل ىشىندە ءاربىر جىلعا 230 اەك بولۋى قاجەت. ستۋدەنتتەردىڭ اي سايىنعى تۇرۋ اقىسى مەملەكەتتىك تاپسىرىس قۇنىنا كىرمەيدى. ونىڭ كولەمىن جاتاقحانا يەسى رەتتەيدى جانە بەلگىلى ءبىر ايماقتاعى تۇرعىن ءۇي نارىعىنىڭ جاعدايلارىمەن انىقتالادى. سونداي-اق تۇرعىندار ءۇشىن (اسحانا, شاشتاراز, سپورت زالى جانە ت.ب.) كوممەرتسيالىق نىساندار قىزمەتىن ۇسىنا الادى.

الماتى