جاقىندا استانادا CHILDREN PARALYMPIC GAMES ينكليۋزيۆتى سپورت فەستيۆالى جانە پاراليمپيادالىق سپورت ءتۇرى بوچچادان ەل چەمپيوناتى ءوتتى. جارىستى التى جىل بۇرىن مۇمكىندىگى شەكتەۋلى بالالاردى تاربيەلەپ وتىرعان اتا-انالار قۇرعان «تەڭ مۇمكىندىكتەر الەمى» قوعامدىق قورى ۇيىمداستىردى.
Samruk Kazyna Trust الەۋمەتتىك جوبالاردى دامىتۋ قورىنىڭ قولداۋىمەن «تەڭ مۇمكىندىكتەر الەمى» قق بىرنەشە جىلدان بەرى بۇكىل ەل بويىنشا «سالاماتتى بولاشاق» الەۋمەتتىك جوباسىن ىسكە اسىرىپ كەلەدى. ونىڭ اياسىندا ەرەكشە بالالارعا ارنالعان بەيىمدەلگەن سپورت سەكتسيالارى اشىلدى.
كەز كەلگەن سپورتتاعى سياقتى جارىستار – جاتتىعۋ پروتسەسىنىڭ ماڭىزدى كەزەڭى. سپورت فەستيۆالىنىڭ ماقساتى – مۇمكىندىگى شەكتەۋلى بالالار مەن جاستاردى تۇراقتى فيزيكالىق بەلسەندىلىگىنە جانە سپورتپەن شۇعىلدانۋعا ىنتالاندىرۋدى ارتتىرۋ جانە بۇقارالىق سپورت بولىگىندە ەرەكشە ادامداردىڭ ماسەلەلەرىنە جۇرتشىلىق پەن بيلىكتىڭ نازارىن اۋدارۋ.
15 قالادان «سالاماتتى بولاشاق» الەۋمەتتىك جوباسى سەكتسيالارىنىڭ تاربيەلەنۋشىلەرى – بوچچا, گولبول, بەيىمدەلگەن شىعىس جەكپە-جەگى (كاراتە, تاەكۆوندو, دزيۋدو), بەيىمدەلگەن فۋتبول, ينكليۋزيۆتى حورەوگرافيا, بەيىمدەلگەن ءجۇزۋ, بەيىمدەلگەن جەڭىل اتلەتيكا, فۋتبول (7*7) سياقتى سپورت پاندەرىنە قاتىسۋ ءۇشىن مۇگەدەك بالالار مەن جاستار كەلدى.
ەرەكشە بالالارمەن قاتار فەستيۆال اياسىندا ءجۇزۋ جارىستارىنا نورموتيپتىك بالالار دا قاتىستى. ەڭ كوپ وڭىرلىك كوماندا پاۆلودار وبلىسىنان كەلدى.
سپورت تۇرلەرى بويىنشا سپورت الاڭدارىنىڭ ارقايسىسىندا سپورتشىلار دياگنوز بويىنشا جىكتەمەگە سايكەس جانە «تەڭ مۇمكىندىكتەر» قاعيداتى بويىنشا باسقا وڭىرلەردەن كەلگەن قارسىلاستارمەن جارىستى.
فەستيۆالمەن قاتار قازاقستاننىڭ مۇمكىندىگى شەكتەۋلىلەر سپورتى تاريحىندا تۇڭعىش رەت پاراليمپيادالىق سپورت ءتۇرى بوچچادان قازاقستان چەمپيوناتى ءوتتى. وعان تىرەك-قيمىل اپپاراتى اۋىر زاقىمدانعان بالالار مەن جاستار قاتىستى. چەمپيوناتتىڭ ماقساتى – الەمدىك ارەنا پاراليمپيادا ويىندارىنا ودان ءارى كوتەرىلۋ ءۇشىن ۇزدىك بوچچيستەردى انىقتاۋ. جالپى, سپورتتان جوعارى جەتىستىكتەر سپورتىنا دەيىن جەتۋ مۇمكىندىگى شەكتەۋلى بارلىق سپورتشىنىڭ ارمانى.
فەستيۆالعا 273 قاتىسۋشى, ال بوچچادان ەل چەمپيوناتىنا 47 قاتىسۋشى قاتىستى. ءاداپتيۆتى تاەكۆوندو بويىنشا جالپىكوماندالىق ەسەپتە نۇر-سۇلتان, ءاداپتيۆتى كاراتە بويىنشا – نۇر-سۇلتان, ءاداپتيۆتى دزيۋدو بويىنشا – شىمكەنت, بوچچا بويىنشا – اتىراۋ جانە پاۆلودار وبلىسى, ءاداپتيۆتى ءجۇزۋ بويىنشا – قاراعاندى جانە اقتوبە, ورتالىق فۋتبول بويىنشا – الماتى, ءاداپتيۆتى فۋتبول جانە جەڭىل اتلەتيكا بويىنشا اقتوبە كوش باستادى.
ءاداپتيۆتى كاراتەدەن ەكىنشى ورىن العان جاقسىبەك يلياستىڭ اكەسى ۇلىنىڭ جەتىستىگىنە قۋانىپ, وسىنداي جاعداي جاساپ وتىرعان ازاماتتارعا العىسىن ءبىلدىردى. ونىڭ ايتۋىنشا, ج.يلياس «تسەرەبرالدى سال اۋرۋى, وڭ جاقتى گەميپارەز, ورتاشا دارەجەسى» دياگنوزىمەن بالا كەزىنەن مەديتسينالىق تىركەۋدە تۇرادى ەكەن. ال ءاداپتيۆتى كاراتە سەكتسياسىنا قاتىسىپ جۇرگەنىنە 6 جىلدان اسىپتى. وسى سپورت ارقاسىندا بالانىڭ كوگنيتيۆتى, موتورلىق جانە بۇلشىق ەت داعدىلارىن دامىتۋ ۇزدىكسىز ءجۇرىپ جاتىر ەكەن.
«ۇياڭداۋ ۇلىم باسقا بالالارمەن وڭاي ارالاساتىن بولدى, قاتارلاستارىمەن تەز ءتىل تابىسادى. ونىڭ ءبارى ۇلىممەن جوعارى بىلىكتى ماماندار جۇمىس ىستەگەنىنىڭ جەمىسى دەپ بىلەمىن. بۇل – ءبىزدىڭ ءبىرىنشى جارىسىمىز ەمەس. ۇلىم وسىعان دەيىن ماسكەۋدە وتكەن ءاداپتيۆتى كاراتە بويىنشا, رەسپۋبليكالىق, قالالىق دارەجەدە وتكەن جارىستاردان جۇلدەلى ورىن الىپ كەلەدى. ءاربىر جارىستان سوڭ العان اسەرى ەرەكشە جانە ءبىر ورنىندا تۇرماي سپورتتىق داعدىلارىن دامىتۋ ۇستىندە. ءار جارىستان سوڭ جاڭا بەلەستەردى باعىندىرۋعا دەگەن سەنىمى مەن قۇلشىنىسى جوعارىلاپ كەلەدى», دەدى جۇلدەگەردىڭ اكەسى.