«قاشاعاننان» تارتىلعان قۇبىر تولىق اۋىستىرىلادى

 

اتىراۋ. 29 ءساۋىر. «قاشاعان» كەن ورنىنان «بولاشاق» مۇناي مەن گازدى كەشەندى دايىنداۋ قوندىرعىسىنا دەيىن تارتىلعان مۇناي جانە گاز قۇبىرىن تولىقتاي اۋىستىرۋ جوسپارلانۋدا. بۇل تۋرالى نكوك كومپانياسىنىڭ ءباسپاسوز قىزمەتى حابارلادى. وتكەن جىلدىڭ 11 قىركۇيەگىندە «قاشاعان» كەن ورنىنان مۇناي ءوندىرۋ باستالعان ەدى.  الايدا, 24 قىركۇيەكتە «D» ارالىنان «بولاشاق» زاۋىتىنا تارتىلعان جەرۇستى قۇبىرىندا گاز كولەمىنىڭ كەمۋى انىقتالدى. وسىعان بايلانىستى كەن ورنىن پايدالانۋ جۇمىستارى ۋاقىتشا توقتاتىلدى. ەرەجەلەرگە سايكەس, توتەنشە جاعدايلار دەپارتامەنتى مەن ءتيىستى باقىلاۋشى ورگاندارعا ورىن العان وقيعا جونىندە دەرەۋ حابار بەرىلدى. قۇبىرعا باراتىن جول اشىلىپ, قۇبىردىڭ ءتيىستى جىكتەرى اۋىستىرىلدى. ءوندىرىس قايتا جاڭعىرتىلدى, بىراق, 9 قازاندا كەمۋ جاعدايى انىقتالعاننان كەيىن ءوندىرىس قايتا توقتاتىلدى. اقاۋلى قۇبىرلار جاساندى ارالدان («D» ارالى) «بولاشاق» مۇناي مەن گازدى كەشەندى دايىنداۋ قوندىرعىسىنا دەيىن مۇناي مەن گازدى تاسىمالداۋعا ارنالعان. ءاربىر قۇبىردىڭ ۇزىندىعى شامامەن 90 شاقىرىمدى, ديامەترى 28 ءديۋيمدى قۇرايدى. بۇگىنگى تاڭعا دەيىن جاسالعان زەرتتەۋلەردىڭ ناتيجەلەرىنە سۇيەنە وتىرىپ, اعىمداعى باعالاۋعا سايكەس مۇناي قۇبىرى دا, گاز قۇبىرى دا تولىقتاي اۋىستىرۋدى قاجەت ەتەتىندىگى انىقتالىپ وتىر. بۇل زەرتتەۋ جۇمىستارى اياقتالعاسىن راستاۋعا جاتادى. وپەراتور قازىرگى تاڭدا قۇبىردى تولىقتاي اۋىستىرۋ جوسپارىن ازىرلەپ جاتىر. ونى بيىلعى جىلدىڭ ورتاسىنا قاراي اياقتاۋ جوسپارلانۋدا. بۇل جوسپار جابدىقتاۋشىلار مەن مەردىگەرلەردى تاڭداۋ جونىندەگى تەندەرلەردى وتكىزۋدى, قولدا بار نەگىزگى قۇرال-جابدىقتى پايدالانا وتىرىپ, ماتەريالدىڭ سپەتسيفيكاتسيالارىن انىقتاۋدى قامتيدى. مۇنداعى ماقسات – ءوندىرىستى  ىقتيمال تۇردە مەيلىنشە تەزىرەك جاڭعىرتۋدى ەسەپكە الا وتىرىپ, قۇبىرلاردى اۋىستىرۋدىڭ ەڭ وڭتايلى جوسپارىن ازىرلەۋ. الدىن-الا ساقتىق شاراسى رەتىندە جانە ۋاقىتتى جوعالتپاۋ ءۇشىن كونسورتسيۋم قۇبىر سەگمەنتتەرىن ساتىپ الۋ ءۇشىن تەندەر وتكىزۋگە كىرىسىپ كەتتى. جولداسبەك شوپەعۇل. دەرەككوز: نكوك كومپانياسىنىڭ ءباسپاسوز قىزمەتى. فوتو: kapital.kz.