ەۋرازيالىق ەكونوميكالىق وداق اۋماعى ينفراقۇرىلىمىن جانداندىرۋ كەرەك

استانا. 29 ءساۋىر. مەملەكەت باسشىسى نۇرسۇلتان نازارباەۆ م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىندە جۇرگىزگەن «ەۋرازيالىق وداق يدەياسىنان – ەۋرازيالىق ينتەگراتسيانىڭ جاڭا پەرسپەكتيۆالارىنا» اتتى دارىسىندە ەۋرازيالىق ەكونوميكالىق وداق اۋماعىنىڭ ينفراقۇرىلىمى جالپىقۇرلىقتا  جەتەكشى ورىندا بولۋى ءتيىس دەدى. بۇل تۋرالى egemen.kz ءتىلشىسى حابارلادى.

نۇرسۇلتان نازارباەۆ ەۋرازيالىق ەكونوميكالىق وداقتىڭ ينفراقۇرىلىمىن دامىتۋدىڭ ماڭىزدىلىعىنا توقتالا كەلىپ, ءبىرتۇتاس ەۋرازيالىق تەلەكوممۋنيكاتسيالار جەلىسىن قۇرۋ, مينسك – ماسكەۋ – استانا – الماتى باعىتى بويىنشا جۇردەك تەمىر جول ماگيسترالىن سالۋ, قازىرگى بار, اسىرەسە, باتىستا – ەۋروپالىق, شىعىستا –قىتايلىق كولىك جۇيەلەرىنە شىعاتىن اۆتوموبيل جانە تەمىر جولدار جەلىسىن جاڭعىرتۋ, سونداي-اق, «ەۋرازيا» ارناسىنىڭ «كاسپي-قارا تەڭىز» جوباسىن جۇزەگە اسىرۋ قاجەتتىگىن ايتتى. بۇدان بولەك, پرەزيدەنت: «كەلىسىلگەن جانە بىركەلكى تاريفتەر بويىنشا بۇكىل ۇلتتىق ەكونوميكالاردى گازبەن قامتاماسىز ەتەتىن بىرەگەي ىشكى گاز تاسىمالداۋ جەلىسىن قۇرۋدىڭ بولاشاق ەۋرازيالىق ەكونوميكانىڭ بەرىكتىگى ءۇشىن ماڭىزى زور. ەنەرگەتيكا كەشەنىن تەرەڭ ينتەگراتسيالاۋدىڭ جول كارتاسى رەتىندە بىرلەسكەن «ەۋرازيالىق ەنەرگەتيكا» باعدارلاماسىن ازىرلەپ, قابىلداۋ قاجەت. سونداي-اق, رەسەيمەن بىرلەسىپ, بىزدە اەس سالۋعا ءتيىسپىز», – دەدى. جولدىباي بازار. دەرەككوز: egemen.kz. فوتو: Vesti.ru.