قر پرەمەر-ءمينيسترى ءاليحان سمايىلوۆ سەنات دەپۋتاتتارىنىڭ ساۋالىنا بەرگەن جاۋابىندا قازاقستان ۇكىمەتى ەل اۋماعىنا شەتەلدىك كولىكتەردى اكەلۋدى شەكتەۋگە باعىتتالعان تەتىكتەر ازىرلەپ جاتقانىن ايتتى, دەپ حابارلايدى Egemen.kz.
«سالىق زاڭناماسىنا سايكەس تىركەمەلەردى قوسپاعاندا, قازاقستان رەسپۋبليكاسىندا تىركەلگەن نەمەسە ەسەپتە تۇرعان كولىك قۇرالدارى سالىق سالۋ وبەكتىلەرى بولىپ سانالادى. وسىلايشا, شەتەلدەن كەلگەن كولىك قۇرالدارىن ەسەپكە قويۋ ماسەلەسى كەزەك كۇتتىرمەيتىن ماسەلە بولادى دەپ ەسەپتەيمىز», دەدى ۇكىمەت باسشىسى ءوزىنىڭ جاۋابىندا.
وسى ورايدا ءاليحان سمايىلوۆ ۇكىمەت ەل اۋماعىنا شەتەلدىك اۆتوموبيلدەردى اكەلۋدى جانە پايدالانۋدى شەكتەۋگە باعىتتالعان تەتىكتەردى ازىرلەۋ جانە باسقا دا ىلەسپە ماسەلەلەر بويىنشا جۇمىس جۇرگىزىپ جاتقانىن ايتتى.
«وسىعان بايلانىستى كورشى ەلدەردەن, اتاپ ايتقاندا رەسەي, ارمەنيا, گرۋزيا, قىرعىزستاننان كەلگەن اۆتوكولىك قۇرالدارىنا تولىق رەسىمدەلگەنگە دەيىن سول جەردە ۋاقىتشا تىركەي وتىرىپ سالىق سالۋ ماسەلەسىن قاراستىرۋ ءجون دەپ سانايمىز», دەدى ول.