تولعاۋى توقسان تىرشىلىكتىڭ قيىندىعى تاۋسىلعان با؟ جەرگىلىكتى بيلىك تاراپىنان الەۋمەتتىك ماسەلەسى وڭ شەشىم تاپپاعاندار ءماجىلىس دەپۋتاتتارىنان كومەك سۇرايدى. سونداي جاندار اتىراۋدا دا بار. ءماجىلىس دەپۋتاتى دۇيسەنباي تۇرعانوۆتىڭ قوعامدىق قابىلداۋىنا كەلگەندەردىڭ باسىم بولىگى باسپانا الۋ قيىندىعىن العا تارتتى.
مۇنىڭ سەبەبىن قوعامدىق قابىلداۋعا كەلۋشىلەر تۇرعىن ءۇي كەزەگىنىڭ جىلجىماۋىمەن تۇسىندىرەدى. ءتىپتى تۇرعىن ءۇي كەزەگىنە تۇرعانىن دالەلدەي الماي جۇرگەندەر بار. ال كاسىپكەرلەر «قارا التىن» نارىعىنداعى باعانىڭ رەتتەلگەنىن, مۇناي ونىمدەرىن رەزەرۆۋارلارعا قاتىستى ءتاريفتىڭ تومەندەگەنىن قالايدى.
دەپۋتات د.تۇرعانوۆتىڭ پىكىرىنشە, بۇل ماسەلە ماجىلىستە ءجيى كوتەرىلىپ كەلەدى. ويتكەنى سۇيىتىلعان گازدى تاسىمالدايتىن كاسىپكەرلەر باعانى قىمباتتاتىپ, حالىقتىڭ نارازىلىعىن تۋعىزعان. وسىعان بايلانىستى مۇناي-گاز نارىعىنا قاتىستى زاڭناماعا وزگەرىستەر ەنگىزۋ جوسپارلانعان. قىزىلقوعا اۋدانىنداعى قوعام بەلسەندىلەرىن ويىل وزەنىنىڭ بۇگىنگى احۋالى تولعاندىرىپ وتىر. بىرنەشە جىلدان بەرى اتالعان وزەنگە سۋ كەلمەي, قۇرعاپ كەتۋ قاۋپى تونگەن. ەندى وزەندى ساقتاپ قالۋدىڭ ءبىر عانا جولى بار. بۇل – مەملەكەت تاراپىنان كوڭىل ءبولۋ.
– قوعامدىق قابىلداۋعا كەلۋشىلەردىڭ باسىم بولىگىنىڭ ءوتىنىشى جەرگىلىكتى اتقارۋشى ورگانداردىڭ جۇمىسىمەن تىكەلەي بايلانىستى. وبلىس باسشىلارىمەن كەزدەسىپ, بۇل ماسەلەلەردى شەشۋ جولدارىن بىرلەسە قاراستىرامىز, – دەيدى د.تۇرعانوۆ.
دەپۋتاتتىڭ ايتۋىنشا, تۇرعىندار تاراپىنان تازا ەنەرگيا وندىرەتىن ەلەكتر ستانسالارىن سالۋ, باتىس ايماقتىڭ ەنەرگەتيكالىق جەلىسىن نىعايتۋ, ونى ەلىمىزدىڭ بىرىڭعاي ەنەرگەتيكالىق جۇيەسىمەن بىرىكتىرۋ, قۇرىلىس ساپاسىن ارتتىرۋ, قۇرىلىس نىساندارىنىڭ مەرزىمىندە اياقتاۋ سەكىلدى ءتۇيىندى ماسەلەلەر كوتەرىلگەن. اتىراۋلىقتاردى تۇرعىن ۇيمەن قامتاماسىز ەتۋ ماسەلەسىمەن بىرگە جەرگىلىكتى جانە رەسپۋبليكالىق ماڭىزى بار جولدىڭ جايى الاڭداتادى.
اتىراۋ وبلىسى