بىلتىر شىلدە ايىندا skills.enbek.kz ونلاين كاسىپتىك وقىتۋ پلاتفورماسى ىسكە قوسىلعان ساتتەن باستاپ 22,2 مىڭنان اسا قازاقستاندىق, ونىڭ ىشىندە 14,2 مىڭ جۇمىسسىز ازامات كۋرستان وتكەنى تۋرالى سەرتيفيكات الدى. پلاتفورمادا 35,9 مىڭ ادام تىركەلدى, ونىڭ 22,4 مىڭى 2022 جىلى تىركەلگەن. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى حابارلادى.
وقۋدان وتكەن 14,2 مىڭ جۇمىسسىز ازاماتتىڭ 4,3 مىڭعا جۋىعى – نەگىزىنەن قىزىلوردا, باتىس قازاقستان, تۇركىستان, اتىراۋ جانە اقتوبە وبلىستارىنان كەلگەن جاستار.
اۆتورلار ىسكە قوسىلعان ساتتەن باستاپ پلاتفورمادا ءارتۇرلى باعىت بويىنشا 119 كۋرس جاريالادى, ونىڭ 65-ءى – تەگىن. كۋرستاردىڭ ۇزاقتىعى – 1-دەن 72 ساعاتقا دەيىن. ەڭ كوپ سۇرانىسقا يە كۋرستار – «پەرسونالدى باسقارۋ», ء«سۇتتى ءىرى قارا ءوسىرۋ», «كاسسير», «ا-دان يا-عا دەيىن قۇلپىناي ءوسىرۋ» جانە «ۇننان جاسالعان كونديتەر ونىمدەرى, جىكتەلۋى جانە دايىندالۋ تەحنولوگياسى».
پلاتفورما حالىقتىڭ ءبىلىم دەڭگەيى مەن كاسىبيلىگىن ارتتىرۋعا, مانساپتىق دامۋدى ىنتالاندىرۋعا جانە ء«ومىر بويى وقىتۋ» تۇجىرىمداماسىن ىلگەرىلەتۋگە باعىتتالعان. بۇل ماركەتپلەيس قىزمەتتەر نارىعى قاعيداتى بويىنشا ونلاين كۋرستارعا قول جەتكىزۋدى ۇسىناتىن حالىقارالىق وقىتۋ الاڭدارىنا ۇقساس قۇرىلعان. وقۋعا تىكەلەي https://skills.enbek.kz/ سىلتەمەسى ارقىلى نەمەسە ەلەكتروندى ەڭبەك بيرجاسىندا (enbek.kz) «ونلاين وقىتۋ» ءبولىمىن تاڭداۋ ارقىلى وتۋگە بولادى. پلاتفورمادا ءبىلىم الۋشى وقىتۋدىڭ قولايلى قارقىنى مەن ءتىلدى, ماتەريالدى بەرۋدىڭ ىڭعايلى قاعيداتىن ءوز بەتىنشە تاڭدايدى, ءبىلىم بەرۋ پروتسەسىندەگى ءوزىنىڭ پروگرەسىن باقىلاي الادى.
وقۋ اياقتالعاننان كەيىن ءبىلىم الۋشى 70% شەكتى دەڭگەيمەن تەستىلەۋ تاپسىرۋعا ءتيىس. ونلاين كۋرستى ءساتتى اياقتاعان جاعدايدا داعدىلاردى يگەرۋ تۋرالى سەرتيفيكات بەرىلەدى. كۋرستى اياقتاۋدىڭ مىندەتتى شارتى – ستۋدەنت تاراپىنان كۋرستى باعالاۋ. بۇل سەرتيفيكات ەلەكتروندى ەڭبەك بيرجاسىندا (enbek.kz) تىركەلگەن كەزدە ءبىلىم الۋشى جاساعان تۇيىندەمەدە اۆتوماتتى تۇردە كورسەتىلەدى. قىزمەتكەرلەردى ىزدەۋ كەزىندە الەۋەتتى جۇمىس بەرۋشى skills.enbek.kz-تە تابىستى وقۋدان كەيىن الىنعان سەرتيفيكاتتاردى كورەدى.
بۇل رەتتە 2022 جىلدىڭ 9 ناۋرىزىنان باستاپ پلاتفورمادا قولدانىستاعى فۋنكتسيونال وڭتايلاندىرىلىپ, جاڭا سەرۆيستەر ىسكە قوسىلعانىن ايتا كەتكەن ءجون. اتاپ ايتقاندا, كۋرستاردى ىزدەۋ جەتىلدىرىلدى, ساباقتاردىڭ تۇسىنىكتى قۇرىلىمى جاسالدى, وقۋ پروتسەسىن باقىلاۋ جانە كۋرس اۆتورلارىمەن جىلدام ءوزارا ارەكەتتەسۋ مۇمكىندىگى پايدا بولدى.
كۋرس اۆتورلارى ءۇشىن ىڭعايلى ساباق قۇراستىرۋ تەتىگى, جاريالانعان كۋرستاردىڭ ستاتيستيكاسى مەن تيىمدىلىگىن قاراۋ, سەرتيفيكاتتاردىڭ ءارتۇرلى ديزاينى قاراستىرىلعان, سونىمەن قاتار وقۋ قۇنىن الدىن-الا ەسەپتەۋگە ارنالعان ونلاين-كالكۋلياتور بار.
اۆتورلار مەن ازىرلەۋشىلەرگە ارنالعان پلاتفورمادا ونلاين كۋرستاردى ورنالاستىرۋ تەگىن. كۋرستار مەملەكەتتىك جانە ورىس تىلدەرىندە ورنالاستىرىلۋى مۇمكىن, اقپارات بەرۋدىڭ ءارتۇرلى فورماتتارى: ءماتىن, پرەزەنتاتسيا, بەينە جانە اۋديو ماتەريالدار, ينفوگرافيكا جانە باسقا تۇرلەرى بولۋعا ءتيىس. ۇسىنىلاتىن ونلاين كۋرستاردىڭ ۇزاقتىعى – 6-دان 144 ساعاتقا دەيىن. پلاتفورما ەرەكشە قاجەتتىلىكتەرى بار ستۋدەنتتەر ءۇشىن ينتەرفەيستى بەيىمدەۋ مۇمكىندىگىن ۇسىنادى.