ميللياردەر يلون ماسك Twitter الەۋمەتتىك جەلىسىن ساتىپ الۋ كەلىسىمىنەن باس تارتقانىن مالىمدەدى, دەپ حابارلايدى Egemen.kz ۆۆس جاڭالىقتارىنا سىلتەمە جاساپ.
مامىلە 44 ميلليارد دوللارعا باعالانعان. ەندى كومپانيا كەلىسىمدى ورىنداتۋ ماقساتىندا ماسكتى سوتقا بەرمەك. ماسك ادۆوكاتتارىنىڭ سوتقا بەرگەن ماتەريالدارىندا كومپانيانىڭ وعان پلاتفورماداعى جالعان اككاۋنتتار تۋرالى تولىق مالىمەت بەرىلمەگەنى جازىلعان.
ماسك وسى جىلدىڭ ءساۋىر ايىندا جاريالانعان مامىلەدەن باس تارتادى دەگەن حاباردان كەيىن Twitter اكتسيالارىنىڭ قۇنى 6%-عا تومەندەدى. كومپانيانىڭ ديرەكتورلار كەڭەسىنىڭ توراعاسى برەت تەيلور كومپانيانىڭ قوسىلۋ كەلىسىمىن ورىنداۋ ءۇشىن زاڭدى شارا قولدانۋدى جوسپارلاپ وتىرعانىن ايتىپ جاۋاپ بەردى.
ماسك قورعاۋشىلارىنىڭ وتىنىشىندە Twitter-ءدىڭ پلاتفورماداعى جالعان نەمەسە سپام تىركەلگىلەرى تۋرالى اقپارات الۋ تۋرالى بىرنەشە سۇراۋلارعا جاۋاپ بەرمەگەنى نەمەسە جاۋاپ بەرۋدەن باس تارتقانى جازىلدى. بۇعان دەيىن ماسك ەگەر الەۋمەتتىك جەلى باسشىلىعى وعان جالعان جانە سپام اككاۋنتتارى Twitter قولدانۋشىلارىنىڭ 5%-دان اسپايتىنىن دالەلدەمەسە, مامىلەدەن باس تارتاتىنىن ايتقان.
ماۋسىم ايىندا رەتتەۋشى ورگاندارعا جولداعان رەسمي حاتىندا ماسك كومپانيانىڭ ساتىپ الۋشىسى رەتىندە Twitter-دەگى سپام اككاۋنتتار سانىن دەربەس باعالاۋعا قۇقىعى بار ەكەنىن جازدى. ماسك تاراپى Twitter وسىلايشا ساتۋ كەلىسىمىنىڭ شارتتارىن بۇزدى دەپ مالىمدەيدى.