دەنساۋلىق ساقتاۋ مينيسترلىگى شالعاي ورنالاسقان اۋىل تۇرعىندارى ءۇشىن مەديتسينالىق كومەكتىڭ قولجەتىمدىلىگىن ارتتىرۋ ماقساتىندا مەديتسينا ۇيىمدارى جەلىسىنىڭ مەملەكەتتىك نورماتيۆىنە وزگەرىستەر ەنگىزدى, دەپ حابارلايدى Egemen.kz.
جاڭا وزگەرىستەرگە سايكەس, ەندى حالىق سانى 50 ادامعا دەيىنگى ەلدى مەكەندەر مەديتسينا قىزمەتكەرىمەن ۇيدە قامتاماسىز ەتىلەدى. تۇرعىندار سانى 50-دەن 500 ادامعا دەيىنگى اۋىلداردا مەديتسينالىق پۋنكتەر اشۋ, حالىق سانى 500-دەن 1500 ادامعا دەيىن (بۇرىن 800-دەن 1500-گە دەيىن بولعان) ەلدى مەكەندەردە فەلدشەرلىك-اكۋشەرلىك پۋنكتەر قۇرىلادى.
جەلىنىڭ جاڭا ءنورماتيۆىن ەنگىزۋ ناتيجەسىندە 502 مەديتسينالىق پۋنكتى فاپ-قا, 185 دارىگەرلىك امبۋلاتوريانى مساك ورتالىقتارىنا قايتا ۇيىمداستىرۋ بەلگىلەنگەن. اتالعان وزگەرىستەر اياسىندا 500-دەن استام ورتا مەديتسينالىق قىزمەتكەر, فەلدشەرلەر مەن اكۋشەرلەر پايدا بولادى.
سونداي-اق حالىق سانى 1500-دەن 5000 ادامعا دەيىن ەلدى مەكەندەردە دارىگەرلىك امبۋلاتوريالار اشىلادى, سونداي-اق 5000-نان استام تۇرعىن تۇراتىن اۋىلداردا مساك ورتالىقتارى اشىلادى. اۋىل حالقىنا ۋاقتىلى شۇعىل مەديتسينالىق كومەك كورسەتۋ, «التىن ساعات» قاعيداتىن ساقتاۋ جانە جاڭا مەديتسينالىق تەحنولوگيالاردىڭ قولجەتىمدىلىگى ماقساتىندا كوپبەيىندى اۋدانارالىق اۋرۋحانالار كوپبەيىندى ورتالىق اۋداندىق اۋرۋحانالار بولىپ قايتا قۇرىلادى.
تۇرلەندىرىلگەن كواا بازاسىندا ينسۋلت ورتالىعى, از ءينۆازيۆتى كارديولوگيالىق ورتالىق (تكا ورتالىعى), مەديتسينالىق وڭالتۋ, تراۆماتولوگيا جانە ورتوپەديا, حيرۋرگيا, رەانيماتسيا جانە قارقىندى تەراپيا بولىمشەلەرى, پەريناتالدى ورتالىق نەمەسە بوساندىرۋ بولىمشەسى, ترياج جۇيەسى بار قابىلداۋ بولىمشەسى, جوعارى تەحنولوگيالىق جابدىقپەن (كت, مرت, انگيوگرافتار) جاراقتاندىرىلعان تاۋلىك بويى جۇمىس ىستەيتىن كلينيكالىق زەرتحانا قىزمەتتەرى جۇمىس ىستەۋى ءتيىس.
جوعارى اتالعان مەديتسينالىق ۇيىمدار بىرنەشە اۋداننىڭ تۇرعىندارىنا قىزمەت كورسەتەدى. بۇل شالعاي اۋداندار مەن اۋىل تۇرعىندارى ءۇشىن مامانداندىرىلعان جانە جوعارى تەحنولوگيالىق مەديتسينالىق كومەكتىڭ قولجەتىمدىلىگىن قامتاماسىز ەتەدى.