استانا. 26 ءساۋىر. پارلامەنت ءماجىلىسىنىڭ دەپۋتاتتارى تۇرمەدە جازاسىن وتەۋشىلەردىڭ سالەم-ساۋقات الىپ تۇرۋلارىنا تۇسىنىستىكپەن قارادى. بۇل تۋرالى «ەكسپرەسس ك» حابارلادى.
پارلامەنت ءماجىلىسى قىلمىستىق اتقارۋ كودەكسىنىڭ جوباسىن تالقىلاۋدى اياقتاپ, وزدەرىنىڭ سوڭعى نۇكتەسىن قويدى. بۇل جوبانى قاراۋدىڭ ەندىگى كەزەگى پارلامەنت سەناتىندا.
اتالعان قۇجات ءماجىلىستىڭ قاراۋىنا 2013 جىلدىڭ قىركۇيەگىندە تۇسكەن بولاتىن. سودان بەرى وسى زاڭ جوباسىن تالقىلاۋ بارىسىندا دەپۋتاتتار بەلسەندىلىك تانىتتى. ويتكەنى, بۇل قۇجاتتىڭ تۇرمەلەردەگى 40 مىڭداي جازاسىن وتەۋشى مەن ولاردىڭ تۋعان-تۋىستارىنا تىكەلەي قاتىستى ەكەنى ويلانتسا كەرەك.
قىلمىستىق اتقارۋ جۇيەسى كوميتەتىنىڭ وكىلى دينارا ءابدىراحمانوۆا: «قىلمىستىق اتقارۋ كودەكسىنىڭ جوباسىندا كوپتەگەن جاڭا ەرەجەلەر بار. ماسەلەن, باس بوستاندىعىنان ايرىلعان ادام ءوزىن جاقسى جاعىنان كورسەتە بىلسە, ونىڭ جازاسى ءبىرشاما جەڭىلدەۋى مۇمكىن», – دەيدى.
سونداي-اق, بۇل كودەكستە سوتتالعانداردىڭ مىندەتتەرى مەن قۇقىقتارى ءبىرشاما كەڭەيتىلدى.
تاعى ءبىر ايتا كەتەر ءجايت, كودەكس جوباسىن ۇسىنۋشىلار تۇرمەلەردەگى جاعداي جاقسارا تۇسكەنىن ەسكەرە كەلە, جازاسىن وتەۋشىلەرگە وتباسى, جورا-جولداستارى, اعايىن-تۋىستارى تاراپىنان جەتكىزىلىپ تۇراتىن اس-اۋقاتتىڭ بەرىلۋىن قاجەت دەپ تاپپاعان بولاتىن. بىراق دەپۋتاتتار تۇرمەدە وتىرعانداردىڭ سالەم-ساۋقات الىپ تۇرۋ قۇقىعىنا شەكتەۋ قويمادى. تەك مۇنداي سالەمدەمەلەر ارنايى كەزدەسۋ ورنىندا عانا بەرىلۋ كەرەكتىگى ماقۇلداندى.
سونىمەن قاتار, كودەكس جوباسىنا سوتتالۋشىلارعا جاعىمسىزداۋ بولۋى مۇمكىن وزگەرىس تە ەنگىزىلىپ وتىر. ناقتىلاپ ايتساق, بۇل ەندىرىلگەن تۇزەتۋ بويىنشا, سوتتالۋشىنىڭ ءوزىن ىزدەپ كەلۋشىمەن كەزدەسۋ ۋاقىتى بۇرىنعىدان 2 تاۋلىككە قىسقارتىلدى.
كودەكستىڭ جاڭا جوباسىندا باس بوستاندىعىنان ايىرىلعانداردىڭ ارقايسىسىن جەكە كامەرادا وتىرعىزۋ ماسەلەسى دە قامتىلدى.
دينارا ءابدىراحمانوۆا: «قازاقستان بويىنشا جازاسىن وتەۋشىلەردىڭ ارقايسىسىن ءوز الدىنا جەكە كامەرامەن قامتاماسىز ەتەتىن 7 تۇرمە بار. الداعى ۋاقىتتا مۇنداي جاعدايعا تولىقتاي كوشۋ جوسپارلانۋدا», – دەيدى.
جولدىباي بازار.
دەرەككوز: «ەكسپرەسس ك».
فوتو: RG.ru.