اقپارات جانە قوعامدىق دامۋ ءمينيسترى اسقار وماروۆ ۇكىمەت وتىرىسىندا مەملەكەتتىك ورگانداردىڭ جۇمىسىن باق-تا كەڭىنەن تۇسىندىرۋگە ارنالعان تاقىرىپتار بويىنشا اقپاراتتار از بەرىلەتىنىن ايتتى, دەپ حابارلايدى Egemen.kz.
«قازىرگى ۋاقىتتا مەملەكەت باسشىسىنىڭ تاپسىرمالارىن ورىنداۋ بويىنشا قر ۇكىمەتىنىڭ قىزمەتىنە جۇرتشىلىقتىڭ جوعارى قىزىعۋشىلىعى بايقالادى. الايدا جەكەلەگەن وزەكتى تاقىرىپتار بويىنشا تىركەلەتىن ازاماتتاردىڭ كەرى بايلانىسى كوبىنەسە تەرىس سيپاتقا يە بولادى», دەدى مينيستر.
وسى رەتتە اسقار وماروۆ جۇرتشىلىق پەن باق وكىلدەرى تاراپىنان سىننىڭ پايدا بولۋ سەبەپتەرىن اتادى.
«بىرىنشىدەن, مەملەكەتتىك ورگانداردىڭ جۇمىسىن باق-تا كەڭىنەن تۇسىندىرۋگە ارنالعان تاقىرىپتار بويىنشا اقپاراتتىڭ از بەرىلۋى. ەكىنشى, جەكە جانە زاڭدى تۇلعالاردىڭ, سونداي-اق باق-تىڭ رەسمي ساۋالدارى مەن سۇرانىستارىنا بەرىلەتىن جاۋاپتاردا تولىق اقپاراتتىڭ بولماۋى. ۇشىنشىدەن, باق-تا تۋىنداعان ماسەلەلەردى ءتۇسىندىرۋ بويىنشا بىلىكتىلىگى تومەن سپيكەرلەردى ۇسىنۋ. اقپاراتتىق-ءتۇسىندىرۋ جۇمىسىنىڭ ماڭىزدىلىعىن ەسكەرە وتىرىپ, اتالعان فاكتورلاردى مەملەكەتتىك ورگانداردىڭ جۇمىسىندا ەسكەرۋ قاجەت», دەدى اسقار وماروۆ.