اقتاۋ قالاسىندا كوبەلەكتەر مەن قىزىل قوڭىزدار كۇرت كوبەيدى, دەپ حابارلايدى Egemen.kz.
ماماندار جاندىكتەردىڭ كۇرت كوبەيگەنىن ماڭعىستاۋ وبلىسىندا كوكتەمنىڭ جاڭبىرلى بولعانىمەن بايلانىستىرادى. بيولوگتاردىڭ ايتۋىنشا, بۇعان الاڭداماۋعا بولادى. سەبەبى قالادا ۇشىپ جۇرگەن جاندىكتەر – كادىمگى قىزىل قوڭىزدار مەن كوبەلەكتەر. ولار ادامعا ەش قاۋىپ توندىرمەيدى.
«اقتاۋدا بيىل كوكتەم جاۋىن-شاشىندى, ىلعالدى بولدى, سونىڭ ارقاسىندا بورتەگۇل, جوڭىشقا سياقتى وسىمدىكتەر جاقسى ءوستى. ال كوبەلەكتەردىڭ بۇل ءتۇرى وسى وسىمدىكتەردىڭ شىرىنىمەن قورەكتەنەدى. ءبىزدىڭ وڭىردە قونىس اۋداراتىن العاشقى كوبەلەكتەردى مامىر ايىنىڭ اياعىندا نەمەسە ماۋسىمنىڭ ورتاسىندا كورۋگە بولادى. بۇرىن مۇنداي جاعدايلار ماڭعىستاۋ وبلىسىندا 2019 جىلدىڭ ماۋسىمىندا, 2018 جىلدىڭ مامىرىندا جانە 2015 جىلدىڭ ماۋسىمىندا بايقالعان», دەدى ش.ەسەنوۆ اتىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەرسيتەتى جاراتىلىستانۋ عىلىمدارى كافەدراسىنىڭ مەڭگەرۋشىسى, بيولوگيا پروفەسسورى ءلاتيپا قوجامجاروۆا.
مامانداردىڭ باقىلاۋىنشا, 2019 جىلى مامىر ايىنىڭ ەكىنشى جارتىسىندا ازەربايجان مەن تۇرىكمەنستان اۋماعىندا كەزدەسكەن قونىس اۋداراتىن كوبەلەكتەر قازاقستانعا ءۇش اپتا ايىرماشىلىقپەن ۇشىپ كەلگەن. بولجام بويىنشا ولاردىڭ ەندىگى باعىتى – وزبەكستان. ەندى الداعى اپتانىڭ سوڭىنا قاراي ماڭعىستاۋ وبلىسىندا كوبەلەك پەن قىزىل قوڭىزدار سانى ازايادى دەپ كۇتىلەدى.