قارۋلى كۇشتەردەگى اسكەري بولىمدەردە جاس ساربازدار وتان الدىندا ادال قىزمەت ەتۋگە انت بەردى. اۋە شابۋىلىنا قارسى قورعانىس اسكەرلەرىندە انت بەرۋ ءراسىمى ولاردىڭ قۇرىلعانىنا 30 جىل تولۋىمەن تۇسپا-تۇس كەلدى.
جالپى, اسكەري دايىندىق كۋرسىنان جانە انت قابىلداعاننان كەيىن جاس بۋىندار ەلدىڭ اۋە شەپتەرىن قورعاۋعا قاجەتتى اسكەري-ەسەپتىك ماماندىقتاردى يگەرۋگە كىرىسەدى. سونداي-اق ۇلتتىق قورعانىس ۋنيۆەرسيتەتىنىڭ بىرەگەي بولىمشەلەرىنىڭ ءبىرى بولىپ سانالاتىن اسكەري-عىلىمي ۆزۆودىنىڭ مەرزىمدى قىزمەتتەگى اسكەري قىزمەتشىلەرى دە وتانعا ادال بولۋعا انت بەردى. ولاردىڭ نەگىزگى مىندەتى – ينجەنەرلىك-تەحنيكالىق بەيىندەگى, ءىت-تەحنولوگيالار مەن كيبەرقاۋىپسىزدىك باعىتتارى بويىنشا عىلىمي جۇمىس اتقارۋ.
اسكەري-عىلىمي ۆزۆودتىڭ اسكەري قىزمەتشىلەرى وزدەرىنىڭ كۇندەلىكتى قىزمەتىندە جاۋىنگەرلىك دايارلىقتىڭ نەگىزگى پاندەرىن يگەرۋدەن باسقا قارۋلى كۇشتەردىڭ يگىلىگى ءۇشىن عىلىمي-زەرتتەۋ, تاجىريبەلىك-كونسترۋكتورلىق جانە سىناق جۇمىستارىن ورىنداۋعا تارتىلاتىن بولادى.
– ەلىمىزدىڭ جەتەكشى اسكەري جوعارى وقۋ ورنى – ۇلتتىق قورعانىس ۋنيۆەرسيتەتىنە قىزمەت ەتۋگە كەلگەنىمدى ماقتان تۇتامىن جانە وتان الدىنداعى كونستيتۋتسيالىق پارىزىمدى لايىقتى ورىنداۋ ءۇشىن بار كۇش-جىگەرىمدى سالامىن. بۇل ءۇشىن مەنىڭ اسكەرگە بارار ال- دىندا العان عىلىمي-تەحنيكالىق باعىتتاعى تاجىريبەم مەن ءبىلىمىم بار, – دەدى قاتارداعى جاۋىنگەر ارتەم ەگوروۆ.
سالتاناتتى ءىس-شاراعا قارۋلى كۇشتەردىڭ ارداگەرلەرى, ينتەرناتسيوناليست-جاۋىنگەرلەر, ساربازداردىڭ تۋعان-تۋىستارى قاتىستى.
انت قابىلداعاننان كەيىن ءداستۇر بويىنشا بولىمشە كومانديرلەرى اتا-انالارىمەن اڭگىمەلەسۋلەر وتكىزدى. قىزىقتىرعان سۇراقتارىنا جاۋاپ بەرىپ, ولاردى اسكەري بولىمدەردىڭ ينفراقۇرىلىمىمەن تانىستىردى, كازارمالار, اسحانالار مەن وقۋ سىنىپتارىن كورسەتتى.