يۋليا پۋتينتسەۆا ۇلىبريتانياداعى جارىستىڭ ءۇشىنشى اينالىمىنا شىقتى

جارىستى ەكىنشى اينالىمنان باستاعان پۋتينتسەۆا الەمنىڭ 40-راكەتكاسى, يسپانيالىق سارا سورريبەس-تورمومەن شەبەرلىك بايقاستى. تارتىستى وتكەن ءبىرىنشى پارتيادا يۋليا تارازى باسىن وزىنە اۋدارا ءبىلدى – 7:5. ەكىنشى سەتتە يۋليا 4:0 ەسەبىمەن العا كەتتى. اقىرى ماتچتى جەڭىسپەن تۇيىندەدى – 6:1. جارتى ساعاتتان استام ۋاقىتقا سوزىلعان باسەكە بارىسىندا قازاقستاندىق سپورتشى 1 ەيس جاساپ, 9 برەيك-پوينتتىڭ التاۋىن پايدالانا ءبىلدى. پۋتينتسەۆا شيرەك فينالعا شىعۋ ءۇشىن الەمنىڭ 5-راكەتكاسى, گرەكيالىق ماريا ساككاري نەمەسە دۇنيەجۇزىلىك رەيتينگتە 36-ورىندا تۇرعان ۋكراينالىق انگەلينا كالينينانىڭ بىرەۋىمەن تالاسادى.قازاقستاننىڭ ءبىرىنشى, الەمنىڭ 21-راكەتكاسى ەلەنا رىباكينا ەكىنشى اينالىمدا رەيتينگتە 114-ساتىداعى تاعى ءبىر ۋكراينالىق لەسيا تسۋرەنكومەن كەزدەسەدى.ەرلەر اراسىندا يستبورن ATP 250 تۋرنيرىندە الەكساندر نەدوۆەسوۆ پاكستاندىق ايسام كۋرەشيمەن بىرگە باستاپقى كەزدەسۋىن ءساتتى وتكىزدى. ولار ۇلىبريتانيالىقتار دجۋليان كەش – گەنري پاتتەندى 6:4, 7:6 (7:4) ەسەبىمەن ۇتىپ, شيرەك فينالعا شىقتى. ا.نەدوۆەسوۆ پەن ا.كۋرەشيدىڭ شيرەك فينالداعى قارسىلاستارى كەيىن انىقتالادى.

ايانا توعانبەك