اقتاۋدى كوگالداندىرۋ جاڭا جوبا اياسىندا جۇرگىزىلەدى

جوبا اياسىندا اقتاۋ قالا­سىن كوگالداندىرۋ, اعاشتاردى, بۇتالاردى, گۇلدەردى وتىرعىزۋ جانە جاسىل جەلەكتەر مەن اعاش­تاردى كۇتىپ-باپتاۋ جۇمىستارى جۇرگىزىلەدى.

– بەس جىلعا باعىتتالعان جوبا اياسىندا جاپىراقتى اعاش­تار­دان 20 905 دانا, قىلقان جاپىراقتى اعاشتاردان 11 750 دانا, ساندىك بۇتالاردان 1 460 دانا, بۇتالاردان 20 مىڭ شارشى مەتر, كوگالداردان 5 مىڭ شارشى مەتر, گۇلزارلاردان 652 500 دانا, راۋشان گۇلدەرىنەن 18 مىڭ دانا ەگۋ جوسپارلانعان, – دەيدى اقتاۋ قالالىق تۇرعىن-ءۇي كوممۋنالدىق شارۋاشىلىعى ءبولىمى باسشىسىنىڭ مىندەتىن اتقارۋشى انۋار تۋلياكوۆ.

مەملەكەت-جەكەمەنشىك ارىپ­تەس­تىك اياسىندا جۇمىس ىستەيتىن مەكەمە انىقتالعانعا دەيىن جىل باسىنان بەرى «اقبوتا» مكك-نىڭ كوگالداندىرۋشىلارى جاسىل جەلەكتەردى كۇتىپ-ۇستاۋ, سون­داي-اق جاڭا اعاش كوشەتتەرىن وتىرعىزۋ جۇمىستارىن جۇرگىزگەن. ولار اقپان ايىنان باستاپ 4 650 ءتۇپ اعاش وتىرعىزدى. ونىڭ 2 650 داناسى قىلقان جاپىراقتى (قاراعاي, بيوتا) 2 مىڭ داناسى جاپىراقتى اعاشتار (ايلانت, ۇيەڭكى, شاعان, كيليتەريا).

– سونىمەن قاتار قالانىڭ 9, 11, 14-شاعىن اۋداندارىن بى­رىك­تىرەتىن اينالما جولدىڭ ورتا­سىنا 112 مىڭ دانا ءبىر جىلدىق شىرايگۇل گۇلدەرى, 12-شاعىن اۋدانداعى ت.ءالنياز ۇلى ەسكەرت­كىشىنىڭ الدىنا راۋشان گۇل­دەرى ەگىلدى. وتىرعىزىلعان كوشەتتەردىڭ بارلىعى اقتاۋ قالاسىندا وسىرىلگەن, ياعني بارلىق اعاش پەن كوگالدار ماڭعىستاۋ وبلىسىنىڭ قۇرعاق كليماتىنا ءتوزىمدى, – دەيدى ا.تۋلياكوۆ.

جاسىل جەلەكتەردى سۋارۋ جۇ­مىستارى بيىل اقتاۋدا ال­­عاش رەت سۋ قۇبىرى ارقىلى جۇر­گىزىلە باس­تادى. جىلدار بويى تەڭىزگە كەتىپ جاتقان جەراستى تۇششى سۋلارىن ءتيىمدى پايدالانۋ ءۇشىن قالانىڭ ورتالىق بولىكتەرىنە, ساياباقتار مەن الاڭدارعا ۇزىندىعى 55 شاقىرىمدى قۇرايتىن قۇبىر تارتىلدى. قازىرگى تاڭدا اتالعان قۇبىرلاردىڭ 45 شاقىرىمى ىسكە قوسىلعان. قالعان 10 شاقى­رىمىنا اعىمداعى جوندەۋ جۇ­مىستارى جۇرگىزىلۋدە. ماۋسىم ايىنىڭ سوڭىنا دەيىن تولىقتاي ىسكە قوسىلماق. جاسىل جەلەكتى سۋارۋ ءۇشىن اقتاۋدا تاۋلىگىنە 1 700 تەكشە مەتر سۋ تۇتىنىلادى.

سونداي-اق شاعىن اۋدان بويىن­داعى جاسىل جەلەكتى سۋا­رۋ ءۇشىن GreenCityAktau جشس جىل سوڭىنا دەيىن تاعى 40 شاقىرىم سۋ قۇبىرىن ىسكە قوسۋدى جوسپارلاپ وتىر. قازىرگى تاڭدا ونىڭ 13 شاقىرىمى 1, 2, 3, 3ا, 3ب, 4-شاعىن اۋداندارىنا جۇرگىزىلىپ, ىسكە قوسىلدى.

– شاعىن اۋدان ىشىندەگى جاسىل جەلەكتەردى سۋارۋ ءۇشىن قازىرگى تاڭدا م ۇلىك يەلەرىنىڭ بىرلەستىگى جانە تۇرعىن ۇيلەرگە قىزمەت كورسەتۋشى مەكەمەلەرمەن كەلىسسوزدەر جۇرگىزىلىپ, كەلىسىمشارتقا وتىرماقپىز. سونداي-اق قوسىمشا 30 دانا ارنايى سۋ تاسۋشى كولىكتەر قالانىڭ جاسىل جەلەكتەرىن سۋارۋدا. ءبىرى جەر استىندا, ەكىنشىسى جەر ۇستىندە ورنالاسقان 60 تەكشە مەترلىك قوس رەزەرۆۋار بار. وپەراتور كۇن سايىن تاڭعى ساعات 6-دا كەلىپ, ناسوستاردى قوسادى. ساعات 7:30-دان كولىكتەر كەلىپ, سۋ تولتىرىپ الادى. ءبىرىنشى اۋى­سىمدا ساعات 8:00-16:00 دەيىن 80-گە جۋىق ادام جۇمىس ىستەيدى. وسى ۋاقىت ارالىعىندا كوشە بويىنداعى اعاشتاردى سۋارادى. جاسىل جەلەكتى, گازونداردى قىرقادى. ەكىنشى اۋىسىم ساعات 16:00-دە باستالادى, 20 ادام شاعىن اۋدان ءىشىن سۋارادى. ءبىر شاعىن اۋدانعا شامامەن 10 كۇندە قايتىپ كەلەدى, – دەيدى ا.تۋلياكوۆ.

قازىرگى تاڭدا GreenSity­Aktau جشس-ءى مەكەمەسى تال­داردى دەزينفەكتسيالاۋ جۇ­مىس­تارىن دا جۇرگىزىپ جاتىر. بۇل ىسكە «بي-58» جانە «كاراتە» دەپ اتالاتىن ۋ تۇرلەرى قولدانىلۋدا. قازىرگى تاڭدا قالا اۋماعىندا 40 مىڭعا جۋىق جاسىل جەلەك زارارسىزداندىرۋدان ءوتتى, بۇل جۇمىس ءالى دە جالعاسادى.

اقتاۋدا جىل سايىن قىرۋار قاراجاتقا اعاش, گۇل تۇرلەرى وسىرىلەدى. بىراق كۇننىڭ ىستىعى جانە سۋدىڭ جەتىسپەۋى سالدارىنان جەلەكتەردىڭ جايقالىپ كەت­كەنىن كورگەن جوقپىز. ەندى ىسكە مەملەكەت-جەكەمەنشىك ارىپ­تەستىك جوباسى اياسىندا كىرىسسە, قالانىڭ ءسانى كىرىپ, جەلەكتەر شاھاردىڭ شىرايىن كەلتىرەر دەپ ويلايمىز.

ماڭعىستاۋ وبلىسى